Coronavirus ku wa 10 Mata: Muri Amerika abantu 1900 bapfuye mu munsi umwe

Yanditswe na Habimana James
Kuya 10 Mata 2020 saa 09:21
Yasuwe :
0 0

Leta Zunze Ubumwe za Amerika zongeye kugira umubare w’abantu benshi bapfuye kubera icyorezo cya Coronavirus kurusha ibindi, kuko mu masaha 24 ashize yapfushije abantu 1900 nyuma y’aho tariki 9 Mata nabwo yari yapfushije abantu 1881.

Mu gitondo cyo kuri uyu wa Gatanu tariki ya 10 Mata 2020, imibare y’ubwandu bushya n’abahitanywe n’iki cyorezo yakomeje kuzamuka hirya no hino ku Isi kuko abamaze kwandura ari 1 605 343, abamaze gupfa ni 95 752 naho abamaze gukira ni 356 941.

Inzego z’Ubuzima muri Leta Zunze Ubumwe za Amerika zivuga ko abantu bose bamaze gupfa ari 16,697 kandi imibare irakomeza kuzamuka.

Kugeza ubu abantu 468 895 nibo bamaze kwandura Coronavirus muri Leta Zunze Ubumwe za Amerika.

Igiteye impungenge muri iki gihugu ni uko Umujyi wa New York wonyine ufite abantu benshi banduye iki cyorezo kurenza igihugu icyo ari cyo cyose ku Isi.

Imibare igaragaza ko abantu 161,504 aribo banduye coronavirus muri New York mu gihe 7,067 bamaze gupfa.

Espagne ifite abanduye 153,222, abamaze gupfa ni 15,447, u Butaliyani abanduye ni 143,626 mu gihe abamaze gupfa ari 18,279.

Mu gihugu cy’u Bufaransa abamaze kwandura ni 117,749 naho abamaze gupfa ni 12,210, mu Budage abanduye bamaze kuba 118,235 mu gihe abapfuye ari 2,607.

Mu Bushinwa aho iki cyorezo cyatangiriye mu Mujyi wa Wuhan, abaturage bavanywe mu kato bari bamazemo ibyumweru 11, abanduye baracyari ku 81,907 naho abapfuye ni 3,336.

Mu Bwongereza, Minisitiri w’Intebe, Boris Johnson, mu ijoro ryakeye yafashe telefoni ahamagara umukunzi we, Carrie Symonds nyuma yo kuvanwa mu cyumba cy’indembe aho ari amaze iminsi itatu kubera icyorezo cya Coronavirus.

Inzego z’ubuzima mu gihugu zivuga ko uyu muyobozi arimo korohererwa.

Kugeza ubu Leta Zunze Ubumwe za Amerika, Espagne, u Butaliyani, u Budage n’u Bufaransa ni byo bihugu bikomeje kuza imbere mu kugira abanduye benshi ndetse n’amaze gupfa.

Ku mugabane wa Afurika, ibihugu 52 kuri 54 nibyo ubu bwandu bumaze kugeramo, abantu 11 878 bamaze kwandura, 608 bamaze gupfa mu gihe abandi 1,548 bamaze gukira.

Algeria niyo ifite abantu benshi bapfuye aho bamaze kuba 235 mu gihe 1666 bamaze kwandura, naho muri Afurika y’Epfo ariyo ifite abanduye benshi kuko ari 1,934, abantu 18 bamaze gupfa.

Mu muryango wa Afurika y’i Burasirazuba, Kenya ifite abarwayi 184, batandatu bamaze gupfa naho 12 barakize, u Rwanda rufite abarwayi 113, barindwi bamaze gukira, Uganda ifite abarwayi 53, u Burundi batatu, Tanzania ifite 25 umwe yarapfuye naho Sudani y’Epfo yo ifite abarwayi batatu.

Mu masaha 24 muri Amerika hapfuye abantu 1900 bishwe na coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .