CNLG yagaragaje ko idashyigikiye ishyirwaho ry’ikigega cy’indishyi z’ibyangijwe muri Jenoside

Yanditswe na Evariste Nsengimana
Kuya 14 Ugushyingo 2019 saa 11:06
Yasuwe :
0 0

Umunyamabanga Nshingwabikorwa wa Komisiyo y’igihugu yo kurwanya Jenoside(CNLG), Dr Bizimana Jean Damascène, yatangaje ko nta mpamvu yo gushyiraho ikigega gishinzwe gutanga indishyi z’imitungo yangijwe muri Jenoside, abayangije bananiwe kwishyura bagihari.

Dr Bizimana yabivuze asubiza ibibazo by’Abagize Inteko Ishinga Amategeko ubwo yabagezagaho raporo y’ibikorwa bya Komisiyo ahagarariye by’umwaka wa 2018/2019 n’ibiteganyijwe mu wa 2019/2020.

Iyi raporo igaragaza ko bimwe mu bibazo abacitse ku icumu bagifite binabangamiye inzira y’ubumwe n’ubwiyunge n’ubutabera muri rusange, ari uko hari abacitse ku icumu batarishyurwa imitungo yabo kandi abayangije baratsinzwe imanza.

Visi Perezida wa CNLG, Mutakwasuku Yvonne wabagejejeho ibikubiye muri iyo raporo, yagize ati “Mu bibazo bijyanye no kurangiza imanza z’imitungo zaciwe n’Inkiko Gacaca, imibare ihari ni imanza 52 226 zigomba kurangizwa.”

Abagize Inteko Ishinga Amategeko bavuze ko ari ikibazo gikomeye gikwiye gushakirwa umuti uhamye, kuko ku bangirijwe imitungo, gukomeza kubona abayangije barinangiye kubishyura bibasubiza inyuma.

Depite Mbonimana Gamaliel yagize ati “Bakwiye gutekereza, bagakorana n’izindi nzego, bakareba uburyo ki hajyaho ikigega cy’indishyi, cyavuzwe kuva cyera, ntabwo ari ubwa mbere gitanzweho ibitekerezo.”

Uyu mudepite yavuze ko Jenoside yakorewe abatutsi umuryango w’abibumbye urebera, ndetse raporo zigaragaza ko imiryango mpuzamahanga n’ibihugu bimwe byayigizemo uruhare ku buryo bishobora no kugira icyo bishyira muri icyo kigega.

Ati “Hakwiye gutekerezwa uburyo cyajyaho, Leta ikaba yafatanya n’ibindi bihugu hakaba hajyaho ikigega ku buryo cyakemura ibibazo bigenda bigaruka buri mwaka, imyaka 25 ikaba ishize.”

Dr Bizimana yabasubije ko “Namwe muzi Politiki y’igihugu cyacu aho igana, igenda itera imbere. Simpamya ko ubu turi mu murongo wo gushyiraho ikigega cy’indishyi ahubwo umurongo uhari ni uko abangirije abandi imitungo nibayishyure. Hakorwe ibishoboka byose yishyurwe.”

Dr Bizimana yavuze ko nubwo bamwe bibwira ko icyo kigega kiramutse gishyizweho amahanga yashyiramo amafaranga, bishobora kudakunda.

Ati “Ntabwo mpamya ko byakunda duhereye n’uko imiterere y’amategeko iteye.”

Kuvuga ko ingabo za Loni zaje mu Rwanda Jenoside yakozwe zirebera bityo imiryango mpuzamahanga yashyirwa amafaranga muri icyo kigega, Dr Bizimana yavuze ko izo ngabo zaje zifite amategeko zigenderaho, kandi amasezerano yari hagati y’umuryango w’Abibumbye yateganyaga ko ikibazo kizagaragara gishingiye ku mikorere yazo gishyikirizwa Loni mu mezi atatu zivuye mu Rwanda.

Ati “Murumva rero igihe cyararenze, kujya gusaba iyo ndishyi haba ku muntu ku giti cye cyangwa n’undi muryango wigenga. Numva umurongo twakomeza ari uwo gukomeza kubanisha abanyarwanda neza no gusaba abangije babe aribo bishyura iby’abandi bangije.”

CNLG igaragaza ko izi manza, cyane cyane izidafite ibibazo, inzego z’ibanze zahawe itariki ntarengwa ya 21 Ugushyingo yo kuba zarangijwe zose.

Dr Bizimana yavuze ko nubwo bamwe bibwira ko icyo kigega kiramutse gishyizweho amahanga yashyiramo amafaranga, bishobora kudakunda.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza