00:00:00 IGIHE NETWORK KN KINYARWANDA EN ENGLISH FR FRANCAIS

Byinshi ntibibera ku Gisimenti- Dr Mpabwanamaguru asubiza abahahuza n’ubwiyongere bw’ibyaha

Yanditswe na Kanamugire Emmanuel
Kuya 7 July 2022 saa 09:11
Yasuwe :

Umuyobozi Wungirije w’Umujyi wa Kigali ushinzwe Imiturire n’Ibikorwaremezo, Dr Mérard Mpabwanamaguru, yavuze ko agace kahariwe abanyamaguru (Car Free Zone) k’i Remera mu Mujyi wa Kigali kashyizweho hagamijwe gufasha abantu kuruhuka kandi ko bidakwiye ko gahuzwa n’ubwiyongere bw’ibyaha biwukorerwamo.

Yabivuze mu biganiro ubuyobozi bw’Umujyi wa Kigali bwagiranye na Komisiyo ishinzwe Ubukungu n’Imari muri Sena kuri uyu wa Kane, tariki 7 Nyakanga 2022.

Abasenateri bashimye igitekerezo cyo gushyiraho aho abantu bidagadurira ariko bagaragaza impungenge z’uko hari ababangamirwa n’urusaku rurenze urugero by’umwihariko abasanzwe batuye muri ako gace.

Senateri Kanyarukiga Ephrem yibajije uko hakwitwa muri Car Free Zone ariko hakaba nta mutuzo uharangwa.

Ati “Niba ari Car Free Zone ngira ngo umutuzo nta wuhari. Hari ikindi gihe nigeze kubaza ikibazo nk’iki bansubiza ko hari abakunda urusaku ariko rufite uko rwagenzurwa.”

Mureshyankwano Marie Rose ati “Ntabwo tubigaya ariko hari abantu basanzwe bahatuye urusaku nirubasanga mu rugo byagenda bite?”

Dr Mérard Mpabwanamaguru yavuze ko Car Free Zone zashyizwe Mu Mujyi wa Kigali zifite imiterere yihariye kandi zihari kubera impamvu.

Ati “Urusaku ruba rurimo hariya imbere ntabwo ari urw’imodoka kandi burya urusaku hari abo ruruhura. Hari abantu bashaka imiziki cyane kugira ngo baruhuke. Hategurwa nka Car Free Zone ni cyo cyari kigambiriwe. Icyo usanga mu Biryogo, si cyo usanga ku Gisimenti, si cyo usanga mu Imbuga City Walk. Uyu ni umujyi udaheza, buri wese agomba kwibonamo.”

Uretse urusaku rw’imiziki inyuranye, abahatemberera, abasore, inkumi abagabo n’abagore baba bizihiwe. Mu minsi ya mbere yakurikiye ifungurwa ryaho impaka zari zose by’umwihariko ku mbuga nkoranyambaga ikigarukwaho ari uko ibyaberaga mu bwihisho byashyizwe ku karubanda ndetse bishobora kugira ingaruka ku bana babireba.

Dr Mérard Mpabwanamaguru yakomeje avuga ko guhuza ibibera ku Gisimenti n’ubwiyongere bw’ibyaha bikorerwa mu mujyi atari byo.

Ati “Hari n’ababihuza n’ubwiyongere bw’ibyaha bikorerwa mu mujyi. Ibyaha byinshi mu mujyi ntabwo bibera ku Gisimenti. Hari ibindi byaha […] dufite n’utundi duce tuzwi tuberamo ibyaha ariko utwinshi turi mu miturire y’akajagari. Gukemura ikibazo cy’imiturire y’akajagari hari n’ibindi bibazo biba bikemuwe mu rwego rwo kugabanya ibyaha bikorerwa mu mujyi.”

Ubusanzwe Agace Gisimenti iherereyemo kagenewe ibikorwa by’imyidagaduro nk’uko Dr Mpabwanamaguru yabisobanuye.

Yavuze ko kuva mu 2007 hashyirwaho igishushanyombonera mu Mujyi wa Kigali no kuva mu 2013 Akarere ka Gasabo gashyiraho icyako cyagutse hari hagenewe ubucuruzi.

Kuva ahari Beauséjour Hotel kugeza ku muhanda ujya Kibagabaga hagenewe ibikorwa by’imyidagaduro.

Igice cya Rukiri ari na ho hari Car Free Zone ya Gisimenti kigenewe ibikorwa by’ubucuruzi bifitanye isano n’imyidagaduro ni ukuvuga utubari, amahoteli, utubyiniro n’ibindi.

Kuva ahahoze Hotel Amahoro kugeza ku muhanda wo kwa Rwahama hagenewe ibikorwa bya siporo ikaba ari yo mpamvu hamwe no kuvugurura stade hazanubakwa ibindi bikorwaremezo bya siporo birimo za Piscine, ibibuga bya Tennis n’ibindi.

Kuva kwa Rwahama kugeza kuri Station hagenewe ibikorwa by’uburezi naho mu Bibare na Nyagatovu hafi ya Controle Technique kimwe na Nyabisindu hashobora guturwa mu buryo bwa ‘Apartements’ cyangwa hakaba amahoteli.

Ku Gisimenti hahurira abantu benshi muri weekend

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .