00:00:00 IGIHE NETWORK KN KINYARWANDA EN ENGLISH FR FRANCAIS

BK Insurance yateye ingabo mu bitugu abatubuzi b’imbuto y’ibirayi babaye indashyikirwa

Yanditswe na Ndikumwenayo Thierry
Kuya 19 Ugushyingo 2022 saa 02:25
Yasuwe :

Akanyamuneza kari kose ku batubuzi b’imbuto y’ibirayi ubwo bashyikirizwaga ibihembo na Sosiyete y’Ubwishingizi, BK Insurance kubera ko babaye indashyikirwa mu bikorwa byabo.

Iki gikorwa cyabereye mu Karere ka Musanze ubwo hasozwaga icyumweru cyahariwe kwita ku gihingwa cy’ibirayi, ku wa 18 Ugushyingo 2022 hatangwa ibikoresho bitandukanye bizafasha mu kazi kabo ka buri munsi.

Nizeyimana Antoinette ukorera ubutubuzi bw’imbuto y’ibirayi mu Karere ka Nyamagabe, yavuze ko “iyo baguhaye igihembo biba bivuga ko bagushimye, ni byiza gushimwa kuko bitera imbaraga bigatuma umutu yiminjiramo agafu aho atakoraga neza akongera.”

Karani Enock akorera ubuhinzi n’ubutubuzi mu Karere ka Nyabihu yavuze ko kuba abonye imashini ikoresha ikoranabuhanga mu gutera imiti no kuhira bigiye kumufasha bigabanye ibihombo yahuraga na byo ndetse binamufashe gukoresha abakozi bake.

Ati “Mu gihe cy’izuba duhura n’ingaruka nyinshi, cyane ko aho dukorera ni mu misozi amazi aba ari make. Rimwe na rimwe izuba ryavaga kare rigasanga imyaka itarera, tukavomerera bitugoye rimwe na rimwe imyaka igapfa. Ubu dufite icyizere ko cya gihombo tutazongera kukibona kubera iyi mashini.”

Nkenuye Museveni Jean Bosco uyobora urubyiruko rwize ubuhinzi, kuri ubu rutuburira ibirayi mu Murenge wa Kinigi, yatangaje ko guhabwa igihembo ari ibintu bakiriye neza kuko bigiye kubaha ingufu zizatuma bakomeza guha uyu mwuga ireme.

Aba bahinzi n’abatubuzi batangaje ko bishimiye gahunda ya BK Insurance aho igiye kujya yishingira ubutubuzi bw’ibirayi. Bavuga ko hari ubwo habonekaga ibiza bitunguranye bigatuma umusaruro w’imbuto uba muke, ibi byanagiraga ingaruka ku birayi biribwa.

Umuyobozi Mukuru wa Sosiyete y’Ubwishingizi ya Banki ya Kigali (BK Insurance, Alex Bahizi yasobanuye ko imbuto ari ingenzi mu buhinzi bw’ibirayi ikaba ari nayo mpamvu bahembye abatubuzi.

Ati “Abantu bakora muri urwo rugendo rwo gushaka imbuto, ubwoko bwayo, ubwiza bwayo, ubwinshi ndetse n’umusaruro izatanga; ni abantu bakomeye . Niyo mpamvu rero mu bantu twahembye harimo abantu batubuye imbuto neza kandi cyane bakazigeza no ku bahinzi, kugira tubashimire ko baba bakoze igikorwa cy’ingenzi.”

Yanavuze ko bajya kubaha ibi bihembo kwari ukubatera ingabo mu bitugu bitewe na zimwe mu mbogamizi babonaga bafite harimo ikiguzi, ugereranyije n’urugendo bakora kugira ngo batubure imbuto kugeza aho igereye ku muhinzi kuko rusaba ubwenge kandi rukanatwara igihe.

BK Insurance yatanze ibihembo mu byiciro birimo urubyiruko, abagore ndetse n’abagao bose babaye indashikirwa mu butubuzi. Ibikoresho byatanzwe bifite agaciro k’asaga miliyoni eshanu z’amafaranga y’u Rwanda.

BK Insurance imaze umwaka n’igice yishingira igihingwa cy’ibirayi, igiye gutangira kwishingira imbuto y’ibirayi binyuze mu masezerano n’ikigo gikora ubutubuzi bw’ibanze SPF/Ikigega; aho umutubuzi uzajya agura imbuto muri iki kigo azajya aba afite ubwishingizi.

Abayobozi batandukanye bashimira umwe mu babaye indashyikirwa mu butubuzi bw'imbuto y'ibirayi
Nyuma yo gushyira umukono ku masezerano y'ubufatanye hagati ya SPF Ikigega na BK Insurance
Umuyobozi uhagarariye urubyiruko rwize ubuhinzi rukaba rukora ubutubuzi bw'imbuto y'ibirayi, Nkenuye Museveni Jean Bosco ashyikirizw aigihembo
Umuyobozi wa BK Insurance, Alex Bahizi yavuze ko abatubuzi bagiye kujya bishingirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .