00:00:00 IGIHE NETWORK KN KINYARWANDA EN ENGLISH FR FRANCAIS

Bite by’umushinga wo kwagura Pariki y’Ibirunga?

Yanditswe na Ndahayo Emmanuel
Kuya 8 June 2022 saa 10:00
Yasuwe :

Kubera imbaraga zashyizwe mu kurengera ingagi zo mu misozi miremire, umubare wazo umaze kwiyongera ku buryo umaze kurenga 1000 muri Pariki y’Ibirunga.

Ibi ubwabyo ni byiza, ariko iyo ingagi ziyongera ku butaka butiyongera, bigira ingaruka zirimo kwiyongera kw’amakimbirane hagati yazo ndetse no kuba zirushaho kuzamuka hejuru mu misozi hakonja cyane, zikagira uburwayi by’umwihariko abana bazo bakaba bahapfira ku bwinshi.

Niyo mpamvu umusaruro w’ingamba za Leta zo kurengera ingagi, wagombaga gukurikirwa no kwagura aho ingagi ziba kugira ngo zirusheho kugira ubuzima bwiza.

Mu kiganiro na IGIHE, Umuyobozi Mukuru w’Urwego rw’Iterambere, RDB, Clare Akamanzi, yavuze ko ibikorwa byo kwagura iyi Pariki biri gukurikiranwa.

Ati "Turimo kubikoraho, tugomba kwiga ibintu bibiri. Icya mbere ni uburyo tugomba kubona amafaranga akenewe kugira ngo bikorwe. Turimo kuganira n’abantu batandukanye kugira ngo dushyireho imbonera y’amafaranga akenewe kugira ngo bikorwe."

"Icya kabiri ni ukumenya ese abantu batuye ahantu dushaka kwagurira Pariki, basanzwe bahinga cyangwa bakora ibindi bikorwa, tugomba gutekereza uko bazabaho baduhaye ubwo butaka. Icyo dushaka ni uko bagomba kubaho neza kurusha uko bameze ubu kuko nta mpamvu yo kwagura Pariki ariko bigahungabanya imibereho myiza y’abantu bayituriye."

Yavuze ko ubu hari kurebwa icyakorwa kugira ngo abaturage bazimurwa bazabeho neza kurusha uko babayeho uyu munsi, ati "[Turi kwibaza tuti] ’Ese bazakora iki?’ Abana babo baziga he? [Ubwo] tugomba kubaka amashuri. Tugomba kubaka inzu. Tugomba kubaka ibikorwaremezo bitandukanye, ibyo byose turi kubikoraho. Niba abo bantu bahinga, ni gute twabafasha kubona amafaranga menshi kurusha ayo babona ubu."

Yatanze icyizere cy’uko mu myaka ine iri imbere umushinga wose uzaba wasojwe.

Akamanzi kandi yagarutse ku kamaro k’Ikigo cya Ellen DeGeneres Campus mu guteza imbere ubukerarugendo bushingiye ku bushakashatsi.

Ati "Tubona ko iki Kigo kizafasha kubungabunga ingagi, bitume abashakashatsi mu bya siyansi baza hano mu Rwanda bakiga, bagakora ubushakashatsi, natwe tugakoresha ibyo batubwira [byavuye mu bushakashatsi bwabo] mu kubungabunga ingagi."

Yongeyeho ati "Nk’urugero, barimo kwiga ibiti bikura hano, kugira ngo tumenye ibiti bifasha ingagi kubaho neza nk’uko biba bikwiriye...bazatugira inama ku biti tugomba gutera hafi ya Pariki kugira ngo ingagi zibeho ubuzima zikwiriye."

Yavuze ko ubu bushakashatsi burimo no gukorwa muri Laboratwari, aho bari "Kureba uko umubiri w’ingagi ukora, niba hari ingagi yagize ikibazo ni kubera iki? Kugira ngo tubone amakuru atuma dufata icyemezo bifatika."

Yanagarutse kandi ku kamaro k’iki Kigo mu guteza imbere ubukerarugendo, ati "Ni Ikigo cyiza cyubatse neza, ndakeka ko abantu benshi bajya kureba ingagi, bazahagarara hano barebe iki Kigo."

Uyu Muyobozi yavuze ko iki Kigo kizagira uruhare mu gukurura abashakashatsi mpuzamahanga.

Ati "Izi ngagi ziba mu bihugu bitatu, u Rwanda, Uganda na Repubulika Iharanira Demokarasi ya Congo. Iki Kigo kizabafasha bose kugira ngo bakore ubushakashatsi, ndetse ayo makuru asangirwe, nabo babone akamaro kayo."

Yongeyeho ko ubushakashatsi buzakorerwa muri iki Kigo buzajya bukorwa no ku zindi nyamaswa ziri mu cyiciro kimwe n’ingagi. Ingagi zitari izo mu misozi ziri mu bihugu nka Gabon n’ibindi byo mu Burengerazuba bwa Afurika nazo zizakorwaho ubushakashatsi.

Hagati aho, Ikigo cya Ellen DeGeneres Campus kirateganya gushyiraho aho abantu bashobora kuryama mu gihe bazamara igihe kinini mu bushakashatsi. Turifuza ubukerarugendo bwongera ubumenyi ku Isi yose."

Akamanzi yavuze ko urwego rw’ubukerarugendo ruri kuzahuka, ariko rutaragera ku kigero rwariho mu 2019, ubwo rwinjizaga hafi miliyoni 500$.

Umuyobozi Mukuru w'Urwego rw'Iterambere, Claire Akamanzi, yavuze ko umushinga wo kwagura Pariki y'Ibirunga ukiri kuganirwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .