00:00:00 IGIHE NETWORK KN KINYARWANDA EN ENGLISH FR FRANCAIS

Ba rwiyemezamirimo 4000 batyarijwe ubumenyi mu guhangana n’ingaruka Covid-19 yabagizeho

Yanditswe na Mugisha Christian
Kuya 27 May 2022 saa 10:40
Yasuwe :

Kuva icyorezo cya Covid-19 cyagera mu Rwanda, imishinga myinshi irimo n’iy’ubucuruzi yasubiye inyuma mu buryo bugaragara, ku buryo ba rwiyemezamirimo, biganjemo abagitangira, bagowe no gukomeza ibikorwa byabo mu buryo burambye.

Muri urwo rwego, Ikigo cya African Management Institute (AMI) giteza imbere ba rwiyemezamirimo bo ku Mugabane wa Afurika binyuze mu kubongerera ubumenyi, cyiyemeje gushyiraho uburyo bwo kubongerera ubumenyi mu rwego rwo kubashyigikira muri ibi bihe bitoroshye.

Iki kigo cyakoranye na ba rwiyemezamirimo barenga 2000 mu Rwanda kugira ngo bahabwe ubumenyi binyuze mu mahugurwa yagombaga gutuma imishinga yabo idahagarara ndetse n’umusaruro w’ibyo bakora ukiyongera.

Ba rwiyemezamirimo bahawe aya mahugurwa bavuga ko yagize impinduka zikomeye kuko yabafashije kuzahura imishinga yabo.

Umwe mu bahuguwe waganiriye na IGIHE, Juvenal Kabagambe, yavuze ko amasomo bahawe yabagiriye akamaro.

Yagize ati “Nari nsanzwe mfite umushinga wo gukora uturima tw’igikoni, nyuma nza kugira igitekerezo cyo kwagura umushinga nkakora n’imashini zifashishwa mu buhinzi.”

Mu bindi byagarutsweho mu mahugurwa harimo kigisha ba rwiyemezamirimo uburyo bakoresha ikoranabuhanga mu rwego rwo kwagura imishinga yabo, uburyo bwo kwegera abakiliya n’ibindi.

Rushema Thierry, ufite umushinga witwa ‘Better Fashion Design Limited’ mu Karere ka Huye ukora imideli, yavuze ko yatangiye kubona inyungu ziturutse muri aya mahugurwa kuko umusaruro w’ibyo bakora wiyongereye.

Yagize ati “Dutangira umushinga twabonaga abakiliya bake, bari hagati ya 15 na 20 ku munsi. Ariko mu rugendo rwo gushyira mu bikorwa ibyo twahuguwe harimo kwita ku bakiliya, kugira igenamigambi no kwifashisha ikoranabuhanga, ubu dushobora kwakira n’abarenga 40 ku munsi.”

Claudine Niyonzima ufite umushinga witwa San Tech Limited wibanda ku gufasha urubyiruko rwiga ikoranabuhanga, yavuze ko amahugurwa yahawe yagize akamaro gakomeye ku bucuruzi bwe kuko yatumye amenya uko acunga abakozi, agakora igenamigambi ry’umushinga ndetse no kwiha intego.

Muri uyu muhango, ba rwiyemezamirimo 31 bitabiriye Hanga Pitchfest21 bari bayitabiriye, aho bashyikirijwe imbamyabumenyi ndetse hanahembwa batanu bitwaye neza muri aya mahugurwa, aho buri wese yashyikirijwe miliyoni 1 Frw.

Umuyobozi w’Ibikorwa muri AMI, Elvine Binamungu, yavuze ko aya mahugurwa azateza imbere ba rwiyemezamirimo bayanyuzemo.

Yijeje kandi ba rwiyemezamirimo n’Abanyarwanda muri rusange ko ikigo AMI kitazahwema guharanira iterambere ryabo binyuze mu gutanga ubumenyi mu ngeri zitandukanye.

Uwari uhagarariye MasterCard Foundation muri uyu muhango, Livingstone Nkusi, yashimiye umuhate wa ba rwiyemezamirimo bagira mu gushaka icyatuma imishinga yabo itera imbere.

Yagize ati “Turashimira byimazeyo ba rwiyemezamirimo ku byo bamaze kwigezeho. Reka ibyo mwakoze byatumye mugera hano uyu munsi, bizagire uruhare mu kugaragariza ba rwiyemezamirimo batandukanye bakizamuka ko nabo bashobora kugera ku ntsinzi, cyane abo mu gihugu cyacu.”

Aya mahugurwa yateguwe na AMI ku bufatanye n’ikigo MasterCard Foundation, aho yahawe abasaga ibihumbi bine mu turere twose tw’igihugu.

Livingstone Nkusi wari uhagarariye MasterCard Foundation muri uyu muhango, yashimiye umuhate wa ba rwiyemezamirimo mu kwiteza imbere
Claudine Niyonzima ufite umushinga witwa San Tech Limited wibanda ku gufasha urubyiruko rwiga ikoranabuhanga, yavuze ko amahugurwa yahawe yagize akamaro gakomeye ku bucuruzi bwe
AMI yashimiwe uruhare igira mu guteza imbere ba rwiyemezamirimo
Ba rwiyemezamirimo 31 bitabiriye Hanga Pitchfest21 bari muri aya mahugurwa, aho bashyikirijwe imbamyabumenyi
Ba rwiyemezamirimo bahembwe miliyoni 1 Frw bari bafite ibyishimo

Amafoto: Nezerwa Salomon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .