Intumwa yihariye ya Museveni yabeshye itangazamakuru ku mubano wa Uganda n’u Rwanda

Yanditswe na Musangwa Arthur
Kuya 26 Ugushyingo 2020 saa 10:26
Yasuwe :
0 0

Uhagarariye Uganda mu Muryango w’Abibumbye, akaba n’intumwa yihariye ya Perezida Yoweri Museveni, Adonia Ayebare, yavuze amakuru atari yo kuri iki Cyumweru mu kiganiro yagiranye na NBS TV, aho yashimangiye ko abayobozi b’u Rwanda na Uganda bakomeje guhura kandi ko ibibazo byose ibihugu byombi byari bifitanye biri gukemurwa.

Ikiganiro na NBS TV cyabereye mu biro bya Ayebare i New York, cyavugaga ku mubano w’u Rwanda na Uganda. Yagize ati "Abayobozi bakomeje kugenda bahura kandi ibibazo byose biri gukemuka. Uko mbizi nta kibazo kigihari, ibihugu byombi bikomeje kubana neza."

Ni imvugo itangaje ku mudipolomate nka Ayebare. Hari abatunguwe no kumwumva avuga atyo, mu gihe bike aribyo byakozwe nyuma y’amasezerano ibihugu byombi byasinye muri Kanama umwaka ushize, ku buhuza bwa Angola na RDC. Ibyavuzwe na Ayebare, hari inzobere zisanga ari ukuyobya abantu.

Birazwi neza ko Uganda imaze igihe ikora ibihabanye n’amasezerano yasinywe n’ibihugu byombi. Amasezerano asinywa, hagaragajwe ibibazo birindwi bigomba kubanza gukemurwa ngo umubano usubire uko wahoze. Icya mbere ni uko ibihugu byirinda kujya mu bikorwa byahungabanya umutekano w’ikindi.

Nubwo ari gutyo bimeze, byagaragaye ko Uganda yakomeje gushyigikira ibikorwa bya RNC ya Kayumba Nyamwasa, isana uwo mutwe wanegekaye cyane nyuma y’ibitero by’ingabo za Congo byo guhashya imitwe y’inyeshyamba ikorera mu burasirazuba bw’icyo gihugu.

Perezida Museveni na Kayumba Nyamwasa bamaze kubura ayo bacira n’ayo bamira, bungutse ikindi gitekerezo cyo gukuraho ubutegetsi i Kigali.

Amakuru avuga ko uwo mugambi ugizwe no gushakira RNC abandi barwanashyaka bashya, babakuye mu nkambi zirimo Abanyarwanda muri Uganda ndetse no mu tundi duce dutuwe n’abantu bavuga Ikinyarwanda.

Nyuma yo guha amahugurwa n’imyitozo abo barwanashyaka bashya mu ishuri rya Bugolobi riherereye i Kampala, basubizwa mu miryango yabo gukora ubukangurambaga bugamije gushaka abandi bayoboke no gukwirakwiza icengezamatwara ryangisha abandi u Rwanda.

Urwego rushinzwe ubutasi bwa gisirikare, CMI, nirwo rugira uruhare mu guhuza ibyo bikorwa, aho rukorana bya hafi n’abakozi ba RNC i Kampala nka Prossy Bonabaana na Sulah Nuwamanya.

Ibyo bikorwa bihabanye n’amasezerano ibihugu byombi byasinye kuko bigamije guhungabanya umutekano w’u Rwanda. Hari kandi abo babiri bakabaye boherezwa mu Rwanda ngo baburanishwe kuri ibyo bikorwa byo gushishikariza abantu kujya mu mutwe w’iterabwoba ugamije kuruhungabanyiriza umutekano no kurwangisha abantu, nyamara Uganda aho kubohereza yabahaye uburinzi bukomeye n’inzu zirinzwe na CMI i Kampala.

Ibyo bituma umuntu yibaza uburyo Ayebare ashobora gutinyuka kuvuga ko ibibazo biri gukemuka, azi ibyo igihugu cye kiri gukora.

Mu minsi ishize, hahishuwe ko umuyobozi ushinzwe urubyiruko muri RNC, Frank Ntwari usanzwe ari muramu wa Kayumba Nyamwasa, yagiye i Kampala mu bukangurambaga no mu myitozo ihabwa abarwanashyaka bashya. Ntwari kandi uretse guhura na Bonabaana na Nuwamanya; yanahuye n’abayobozi bakuru ba CMI n’abandi bo mu nzego z’umutekano.

Muri urwo ruzinduko, Ntwari yahuye na murumuna wa Perezida Museveni, Gen Salim Saleh, umwe mu bavuga rikijyana mu gisirikare cya Uganda, UPDF.

Mu kiganiro na NBS TV, Ayebare yababajijwe ku kibazo cy’umupaka wafunzwe ugahagarika ubucuruzi, bigateza igihombo gikomeye abacuruzi bo muri Uganda.

Ku ruhande rw’u Rwanda, rwakunze kwerekana ko Uganda ariyo nyirabayazana bitewe n’ibikorwa bigamije guhungabanya umutekano warwo.

Hari umwe mu bakoresha Twitter wigeze kuvuga ati “Niba Uganda iha agaciro cyane ibikorwa bigamije guhungabanya umutekano w’u Rwanda, yibagirwe isoko ry’u Rwanda, nigende ijye ikorana ubucuruzi na RNC, FDLR cyangwa RUD Urunana n’indi mitwe bicuditse i Kampala.”

Ibi byose Ayebare abirenza ingohe, agatinyuka kujya kuri televiziyo akavuga ko ‘nta kibazo kiri hagati ya Uganda n’u Rwanda’ ndetse ko ‘abayobozi bakomeje guhura ngo bacoce ibibazo’.

Ibinyamakuru bishinzwe icengezamatwara rya Kampala kandi nabyo byakomeje akazi. Ibyinshi muri byo byishyurwa na CMI iyobowe n’umuvandimwe wa Ayebare, ari we Maj Gen Abel Kandiho, ngo byandike bisebya u Rwanda.

Nka Commandonepost iherutse gushinja inzego z’umutekano z’u Rwanda kwinjiza intwaro muri Uganda, ‘ngo zifashishwe n’abatavuga rumwe na Leta’.

Ntibyatinze icyo kinyoma cyambitswe ubusa n’ibimenyetso simusiga, byagaragaje ko ahubwo izo mbunda zatumijwe na Leta ya Uganda, ko ntaho u Rwanda ruhuriye nazo.

Ambasaderi Ayebare yabeshye itangazamakuru ko ibibazo by'u Rwanda na Uganda byakemutse kandi Uganda igikomeje gukorana n'imitwe nka RNC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .