Amashyirahamwe y’abanyarwanda mu Bubiligi yamaganye Laure Uwase muri komisiyo izafasha kwiga ku bukoloni

Yanditswe na IGIHE
Kuya 8 Kanama 2020 saa 09:15
Yasuwe :
0 0

Amashyirahamwe y’abanyarwanda mu Bubiligi, IBUKA Mémoire et Justice Asbl n’umuryango w’abanyarwanda baba mu Bubiligi, yamaganye itoranywa rya Laure Uwase ukunze kumvikana ahakana jenoside yakorewe Abatutsi, muri komisiyo izafasha Abadepite b’icyo gihugu kwiga ku mateka y’ubukoloni icyo gihugu cyakoze mu Rwanda, Repubulika ya Demokarasi ya Congo n’u Burundi.

Laure Nkundakozera Uwase yabaye Umunyamabanga Mukuru wa Jambo Asbl ihuriyemo abahakana Jenoside, anaba umwanditsi mukuru wa Jambo News. Ni umukobwa wa Anastase Nkundakozera wahamijwe n’Inkiko Gacaca ibyaha bya Jenoside yakorewe Abatutsi, ndetse nyina Agnès Mukarugomwa yari umurwanashyaka ukomeye wa MRND, ubu ni umuyobozi wa Ikondera Libre, ikinyamakuru gisebya leta y’u Rwanda.

Ni umwe mu mpuguke batoranyijwe mu kanama gategerejweho kuzatanga raporo ya mbere bitarenze Ukwakira 2020, bikazashyira ahabona ukuri gushingiye ku bushakashatsi, ku mateka y’u Bubiligi mu bihe by’ubukoloni.

Urutonde rw’izo nzobere rukimara kujya hanze, rwamaganiwe kure na benshi mu banyarwanda.

Kuri uyu wa Gatanu tariki 7 Kanama, IBUKA Mémoire et Justice Asbl na Diaspora nyarwanda mu Bubiligi, banditse itangazo rigenewe abanyamakuru ryamagana Laure Uwase muri ako kanama.

Iyo miryango yavuze ko gushyira Uwase muri ako kanama, ari igitutsi hakurikijwe amateka ye, ay’umuryango Jambo asbl n’ibindi.

Bagize bati “Twibuke ko muri Werurwe 2018, inama y’abaperezida mu Nteko yaburijemo inama yari yateguwe na Jambo asbl mu nteko y’umuryango w’ubumwe bw’u Burayi, bagaragaza ko iryo tsinda rifite aho rihuriye n’agatsiko k’iterabobwa nka FDLR igamije gukwirakwiza ingengabitekerezo ya Jenoside bashaka guhuza abayizize n’abayikoze.”

“Kuba umwe mu bagize Jambo ari muri komisiyo ni igitutsi ku mateka y’ukuri ndetse no ku bagizweho ingaruka nayo.”

Iyo miryango yavuze ko niba uruhare rw’iyo komisiyo ari ukugaragaza ukuri, ntacyo yakwizerwaho mu gihe abayigize ubwabo batavugwaho rumwe.

Iyo miryango ivuga ko yari yatanze amazina y’abo itekereza ko ari inzobere kandi bafite icyo bazi ku mateka y’ubukoloni mu karere k’ibiyaga bigari, gusa ngo batunguwe no kuba mu bo batanze nta n’umwe wagaragayemo.

Bavuze ko kubera iyo mpamvu, bitandukanyije n’ishyirwaho ry’iyo Komisiyo. Bati “IBUKA Belgique na Diaspora nyarwanda ntabwo bazihanganira abashaka kwandika andi mateka ku byabaye mu Rwanda kandi twitandukanyije n’iryo shyirwaho (ry’inzobere) n’imikorere y’iyo Komisiyo bigaragara ko ihabanye n’ukuri.”

Mu bandi bashyizwe muri ako kanama harimo Dr Zana Mathieu Etambala ukora muri Musée d’Afrique akanigisha muri KULeuven, akaba umuhanga mu mateka y’ubukoloni; Dr Gillian Mathys wigisha muri Kaminuza ya Gent, akaba umuhanga mu mateka n’umushakashatsi; Prof Elikia M’Bokolo wo muri Kaminuza ya Kinshasa, akaba umuhanga mu mateka; Anne Wetsi Mpoma, umunyamateka y’ubugeni na Musenyeri Mgr Jean-Louis Nahimana, wayoboye Komisiyo y’Ukuri n’Ubwiyunge mu Burundi.

Biteganyijwe ko abari muri iyi komisiyo bazahura n’abantu batandukanye ndetse bagakora n’ibindi bintu mbere y’uko bakora raporo ya nyuma, mu gihe cy’umwaka umwe ushobora kongerwa bibaye ngombwa. Ni raporo yitezweho kuzaba inatanga ibitekerezo ku cyakorwa.

U Bubiligi bwakolonije u Rwanda mu 1922–1962, muri icyo gihe amateka akagaragaza ko ari bwo ivanguramoko ryigishijwe cyane rikinjizwa no mu biranga abantu n’imitegekere y’igihugu, bikageza kuri Jenoside yakorewe Abatutsi mu 1994.

Mu minsi ishize nibwo Umwami w’u Bubiligi Philippe Léopold Louis Marie yasabye imbabazi Repubulika iharanira Demokarasi ya Congo (RDC), abinyujije mu ibaruwa yandikiye Perezida Félix Tshisekedi, kuri iyi tariki ya 30 Kamena 2020, umunsi RDC yizihizaho ubwigenge ku nshuro ya 60.

U Bubiligi bwakolonije RDC mu cyiswe Congo Belge, hagati ya 1908 na 1960, amateka avuga ko muri icyo gihe abaturage b’icyahoze ari Zaïre babarirwa mu miliyoni bapfuye, bazira indwara, iyicarubozo n’imirimo y’agahato.

Ishyirwaho rya Uwase ntabwo rivugwaho rumwe bitewe n'amateka ye yo guhakana Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .