Amaganya n’impungenge ku mibereho bya Aimable Karasira wiyemerera ko yashutswe

Yanditswe na Musangwa Arthur
Kuya 21 Kanama 2020 saa 10:28
Yasuwe :
0 0

Hashize icyumweru Aimable Uzaramba Karasira uzwi nka Professor Nigga, yirukanywe muri Kaminuza y’u Rwanda, ishami ry’Ikoranabuhanga, aho yari amaze imyaka 14 yigisha ibijyanye na mudasobwa.

Ibaruwa yanditswe n’Umuyobozi wa Kaminuza y’u Rwanda, Prof Philip Cotton, ku wa Gatanu tariki 14 Kanama 2020, yavugaga ko azize amakosa atandukanye amaze iminsi akora ahabanye n’amategeko agenga abakozi ba Leta.

Mu byo Karasira yirukaniwe harimo kuba yari amaze iminsi anyuza ku mbuga nkoranyambaga amagambo yateza imyivumbagatanyo muri rubanda kandi atesha agaciro urwego akorera n’inzego za Leta muri rusange.

Yashinjwaga n’amakosa y’imyitwarire mibi arimo kudakurikiza ingamba Kaminuza iba yarashyizeho mu kunoza imyigishirize, guhabwa amahirwe yo kuzamura impamyabumenyi ye akabyanga n’ibindi.

Na mbere yo kwirukanwa, Karasira yari umuntu utavugwaho rumwe mu Rwanda, bamwe bamufata nk’ufite ikibazo cyangwa ufite abamushuka kujya gutangaza amakuru asebya Leta, abandi bakamubona nk’umuntu utagira ubwoba.

Nyuma y’umunsi umwe yirukanywe, Karasira yasubiye mu itangazamakuru, yemera ko hari abantu baba hanze y’u Rwanda bamushukaga kugira ngo atangaze ibibi ku Rwanda, anabavuganire.

Ubwo yaganiraga n’umurongo wa Youtube witwa Real Talk yagize ati “Ntabwo banshutse ngo Karasira vuga ibi, ariko mu byo twaganiraga hatumaga havamo ibyo njye nganira by’amarangamutima yabo.”

Yakomeje agira ati “Abo bantu barambwiraga bati wakatuvugiye ibi bintu ntabwo aribyo, ni gute badushyiraho ingengabitekerezo twaravutse ejobundi ngo ni uko dukomoka kuri ba kanaka, abandi bati turi impunzi dukeneye gutaha. Hari abasenyerwaga, bati mu basenyerwa harimo bene wacu, bikaba byatuma mbiganira.”

Karasira guhera mu minsi ishize yari yarashinze umurongo wa YouTube anyuzaho ibiganiro, ari nabyo byiganjemo ibyahereweho yirukanwa ashinjwa gusebya urwego akorera.

Yavuze ko abo bantu bamushukaga, bamufashije mu gushaka ibikoresho by’uwo murongo wa YouTube, bakaba ari nabo bamusaba buri gihe kuvuga ibibi mu Rwanda.

Ati “Leta yacu ifite ibyiza byinshi ikora ariko ifite n’ibibi ikora. Njye rero iyo banyerekaga mu nguni y’ibibi niho nigumiraga. Ni nk’uko bavuga bati hari iburyo n’ibumoso mu izamu, nibajya bagutera penaliti ujye wigira ibumoso gusa.”

Ntabwo Karasira yatangaje abamushukaga abo aribo ariko ibiganiro bye kenshi byasamirwaga hejuru n’abatavuga rumwe na Leta y’u Rwanda baba hanze barimo n’abari mu mitwe u Rwanda rufata nk’iyiterabwoba nka RNC, FDLR n’indi.

Hairi nubwo yatumirwaga ku maradiyo y’abo bantu barwanya Leta y’u Rwanda, ndetse bakamutegeka ibyo avugaho nabi u Rwanda.

Ati “Hari ibiganiro najyaga mbamo umutumirwa by’amaradiyo aba hanze, benshi barwanya Leta, akenshi rero babona ibibi kuruta ibyiza, wenda uwo mutego nawugwagamo kuko narebaga ibibi gusa kuruta ibyiza.

Ubwo yari amaze kwirukanwa, abari muri iyo mitwe bahise batangira kwisuganya batangiza ubukangurambaga bugamije kumushakira amafaranga yo kumutunga, nyuma yo kwirukanwa muri Kaminiza.

Karasira yabajijwe niba abamushutse bazakomeza kumufasha na nyuma yo kwirukanwa, avuga ko nawe aribyo ategereje kureba.

Ati “Reka turebe noneho umuntu ageze mu byago. Niba ari abantu koko bifatanyije nanjye bazamfasha muri ibi bizazane ndimo […] Igihe ni iki, nibanyereka ko banshyigikiye, bamfashe ntabwo nkibona umushahara wanjye wa buri kwezi, nibishyire hamwe bamfashe niba atari bya bindi bya wa muheto ushuka umwambi bitari bugeraneyo."

Nubwo Karasira yirukanywe muri Kaminuza y’u Rwanda, agaragaza kwicuza nk’uwashutswe kuko yari akihakeneye.

Aherutse kubwira IGIHE ko iyo bamuhitishamo kureka ibiganiro yirirwa atambutsa ku mbuga nkoranyambaga n’akazi, yari guhitamo akazi.

Yagize ati “Urumva akazi kuko ariko gatunze, umuntu yahitamo akazi, ariko yaba abangamiwe.”

Nyuma y’umunsi umwe yirukanywe yavuze ko aramutse ahawe andi mahirwe muri Kaminuza, agahabwa n’inama yazumvira.

Ati “Nibampa inama twakumvikana. Nibyo koko harimo inyungu z’umutekano w’igihugu, inyungu z’amateka y’igihugu […]”

Mu magambo akomeye Kaminuza yahereyeho imusaba ibisobanuro bikaza kurangira anirukanwe, Karasira yabajijwe ku magambo yatangaje ku mbuga nkoranyambaga, harimo nk’aho kuwa 3 Nyakanga anyuze ku rubuga rwa YouTube, yavuze ko “u Rwanda rudaha agaciro umunsi w’Ubwigenge”.

Tariki 20 Nyakanga 2020, ngo yagize ati “Mu Rwanda hari ubuzima bubi" kandi ko atifuza "gushyingiranwa n’umunyarwanda ndetse atifuza kuba umunyarwanda”.

Imyitwariye ya Karasira hanze y’ishuri kandi nayo ntivugwaho rumwe. Hari nk’amashusho amaze amezi make agiye hanze amugaragaza asinziriye ku meza ahacururizwa inzoga, biboneka ko yaharaye yasinze.

Umwe mu bahungu bari muri ayo mashusho yumvikana amubwira ngo “mwagiye munywa izo mushoboye’.

Karasira wavukiye mu ntara y’amajyepfo mu yahoze ari Butare mu 1977, mu mwaka wa 1980, umuryango we wimukiye mu mujyi wa Kigali, yiga amashuri ye abanza ku ishuri ribanza rya EPA rihereye ku Gitega. Yakomereje muri Lycée de Kigali.

Yize muri Kaminuza Nkuru y’u Rwanda ayivamo mu 1998 afite impamyabumenyi y’icyiciro cya kabiri cya Kaminuza mu bumenyi n’Ikoranabuhanga. Icyiciro cya gatatu yagikomereje muri Suède.

Karasira yemeye ko yagiye ashukwa n'abatavuga rumwe na Leta y'u Rwanda ngo avuge ibibi gusa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .