Abijuru wigaga Uganda yambuwe moto, akorerwa iyicarubozo yoherezwa mu Rwanda ari intere

Yanditswe na Evariste Nsengimana
Kuya 22 Nzeri 2019 saa 08:47
Yasuwe :
0 0

Abijuru Ernest, umunyarwanda wigaga mu gihugu cya Uganda yatezwe n’abantu batazwi bamukorera iyicarubozo, bamwambura moto yifashishaga agiye ku ishuri, barangije bamutegera imodoka imugeza mu Rwanda ari indembe.

Abijuru w’imyaka 26, ukomoka mu Murenge wa Nyamiyaga mu Karere ka Kamonyi, yagiye muri Uganda mu 2016 agiye kwiga.

Nyuma yo kugera muri iki gihugu giherereye mu Majyaruguru y’u Rwanda yaguze akamoto kamufasha mu rugendo rwe rwa buri munsi agiye ku ishuri.

Ku cyumweru gishize nibwo yisanze aryamye mu bitaro i Kampala muri Uganda yarakubiswe bikomeye. Avuga ko yibuka ko yari atwaye umuntu mu murwa mukuru Kampala ku wa Gatandutu ari mu masaha y’umugoroba nibwo yatezwe n’abantu atabashije kumenya bamuhondagura mu mavi no mu gahanga ku buryo bamusize atabasha no guhumeka.

Kuri uyu wa 21 Nzeri ubwo itangazamakuru ryamusuraga aho arwariye mu bitaro byo mu Rwanda, Abijuru yavuze ko nyuma yo gukubitwa n’abo bantu yahise ata ubwenge, bwongera kugaruka abona ari mu bitaro i Kampala.

Afite ibikomere byinshi ku maguru yombi, cyane cyane mu mavi no mu gahanga ku buryo wagira ngo ni amabuye cyangwa inyundo bamukubise ariko we ntabwo yibuka uko byagenze kuko bamusize ari indembe.

Ati “Hari nka saa tatu zishyira saa yine z’umugoroba ntashye ari nimugoroba mvuga nti reke njye kwambara njye ku ishuri kwiga, mbona umuntu mutwara kuri moto muri Kampala hagati. Nagiye kubona ku cyumweru mu gitondo ndi kwa muganga.”

Yakomeje agira ati “Sinibuka igihe byabereye, sinibuka icyo bangize, nongeye kubona ndi kwa muganga mu bitanda ndimo serumu banteye n’inshinge, abaganga bakavuga ngo babonye banzana.”

Yavuze ko abaganga bo kuri ibyo bitaro bamubwiye ko kumuvurira muri Uganda bitakoroha nta n’amafaranga afite yo kwishyura ibizami, bamugira inama yo gutaha mu Rwanda akaza kwitabwaho n’igihugu cye.

Ati “Bankoze ibyo ndavuga nti ‘Ubu ni abantu bashakaga kunyica, moto yanjye baba barayitwaye.”

Abijuru yasobanuye ko hari abantu bavugaga Ikinyarwanda bahise bamutegera imodoka imuzana mu Rwanda ariko ubuzima bwe bumeze nabi cyane kubera ibikomere bamuteye. Ati “Umutwe n’amaguru nibyo mbabara.”

Nyuma yo kugera muri Gare ya Nyabugogo, yahise afata moto imugeza kwa sekuru mu Karere ka Kamonyi ari naho yavanywe ajyanwa mu bitaro arwariyemo uyu munsi.

Uyu musore aho aryamye ku gitanda cyo kwa muganga ubona afite imbaraga nke. Yasobanuye ko ashobora kuba yarazize ko ari umunyarwand kuko yavugaga ko yitwa Abijuru abandi aho kurimuhamagara bakamwita ‘Kagame’.

Abijuru yagiriye inama abanyarwanda bafite ibitekerezo byo kujya Uganda ko bashatse babyihorera kuko nta mutekano uhari.

Abijuru si umunyarwanda wa mbere uhohoterewe muri Uganda uretse ko uburyo yahohotewemo butandukanye n’ubwo abandi benshi bagiye boherezwa mu Rwanda.

Inshuro nyinshi u Rwanda rwagiye rwakira abaturage barwo baherejwe na Uganda, bagatanga ubumya bw’uburyo bagiye bafatwa n’inzego z’umutekano bagafungwa, bagakorerwa iyicarubozo, bamwe bagashishikariza kujya mu mitwe irurwanya n’ibindi bibangamira uburenganzira bwa muntu birimo no gupfa nta cyaha na kimwe kibahama.

Urugero ni nk’ Abanyarwanda 32 barekuwe ku wa 12 Uku kwezi, batigeze bagezwa imbere y’inkiko. Abarekuwe bavuga ko hari amagana y’abakiri muri gereza z’Urwego rushinzwe Ubutasi mu gisirikare cya Uganda, nta n’umwe ugezwa imbere y’urukiko.

Hari kandi Hategekimana Silas watawe muri yombi ku wa 25 Gicurasi 2019, afungirwa muri Uganda, aza kurekurwa ajugunywa ku mupaka wa Kagitumba ku wa 12 Kamena 2019 nyuma akaza gupfa bitewe n’itotezwa n’iyicarubozo yakorewe muri gereza zaho.

Hari kandi nka Augustin Rutayisire watawe muri yombi muri Gicurasi 2018, agafungirwa muri Gereza ya Luzira akorerwa iyicarubozo ririmo gukubitwa, kwicishwa inzara, kurazwa hasi n’ibindi.

Afite ibikomere byinshi ku maguro yombi, cyane cyane mu mavi no mu gahanga ku buryo wagira ngo ni amabuye cyangwa inyundo bamukubise
Mu gahanga ahafite ibikomere byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza