Abigaga ubuvuzi i Gitwe bashyizwe muri Kaminuza y’u Rwanda baracyari mu gihirahiro

Yanditswe na Evariste Nsengimana
Kuya 11 Ugushyingo 2019 saa 09:39
Yasuwe :
0 0

Bamwe mu banyeshuri bigaga amashami y’ubuvuzi muri Kaminuza ya Gitwe aheruka gufungwa bagashyirwa muri Kaminuza y’u Rwanda bavuga ko bataribona nk’abanyeshuri bayo kuko bashyirwaho amananiza kandi ntibemererwe byinshi mu byemerewe abayigamo.

Muri Mutarama uyu mwaka nibwo Ishami ry’Ubuganga (Medicine and Surgery) n’irya Laboratwari (Medical Laboratory Technology) muri Kaminuza ya Gitwe yahagaritswe na Minisiteri y’Uburezi nyuma y’aho ishuri rinaniriwe kuzuza ibyo ryari ryasabwe mu 2017 ngo amasomo atangwe neza.

Ayo mashami amaze guhagarikwa abayigaga bagera kuri 373 boherejwe kwiga muri Koleji y’Ubuvuzi ibarizwa muri Kaminuza y’u Rwanda, bashyirirwa gahunda yo kwiga kugira ngo bagere ku rwego rwumwe n’abandi, nyuma y’amezi atandatu batakamba, basaba kurenganurwa.

Kuri ubu abo banyeshuri bavuga ko amasomo basabwe kwiga bari barayize kandi bagasabwa kuyishyurira amafaranga y’umurengera. Bavuga ko isomo rimwe baryishyuzwa amafaranga ibihumb 17Frw mu gihe abandi banyeshuri ba Kaminuza y’u Rwanda baryishyura 12.500Frw.

Aba banyeshuri bavuga ko barimo abatangiranye na Kaminuza ya Gitwe mu 2013, bazimukira mu mwaka wa kane nibasoza amasomo yihariye abashyira ku rwego rumwe n’abandi mu 2020 nyuma yo gukora ikindi kizamini kigamije kureba niba bujuje ibisabwa.

Iki kizamini abanyeshuri bavuye muri Kaminuza ya Gitwe bakibona nk’imbogamizi bashyiriweho hagamijwe kugabanya umubare wabo bitewe n’uko abandi banyeshuri bavuye mu mahanga icyo kizamini batagikora.

Bavuga ko igitangaje kurusha ibindi ari uko mu 2017 ubwo kaminuza ya Gitwe bigagamo yaharikwaga bari bageze mu mwaka wa kane ariko nibamara gukora icyo kizamini mu 2020 aribwo bazajya mu mwaka wa kane muri Kaminuza y’u Rwanda, bakigana n’abatangiye mu myaka itatu ishize.

Aba banyeshuri bavuga ko nibura hari abanyeshuri barindwi bazwi bamaze kureka kwiga kubera izo mbogamizi bagiye bahura nazo zirimo no kubura amafaranga y’ishuri.

Umwe muri abo banyeshuri witwa Kayitesi Kami Bernardine aheruka gusohora inyandiko ndende igaragaza ibibazo bitandukanye abo banyeshuri bagize birimo iby’amikoro no kuba kugeza uyu munsi badafatwa nk’abanyeshuri ba kaminuza y’u Rwanda nubwo bemerewe kuyigamo bitewe n’uko batemerewe gusaba inguzanyo y’amafaranga y’ishuri nk’uko abandi babikora.

Umuyobozi ushinzwe guteza imbere imyigishirize muri Kaminuza y’u Rwanda, John Mugarura, yabwiye itangazamakuru ko hari amasomo abo banyeshuri batize uko bikwiye nk’uko byagaragaraga ubwo bemererwaga kwiga muri UR.

Igenzura ryakozwe kuri abo banyeshuri ryagaragajemo 25 batari bujuje ibyangomba byo kwiga amashami y’ubuvuzi muri Kaminuza y’u Rwanda.

Ubuyobozi bw’ishuri ry’ubuvuzi muri Kaminuza y’u Rwanda(CMHS) buvuga ko nta makuru ahagije bufite ku kibazo cyo kuba abanyeshuri bavuye muri Kaminuza ya Gitwe bishyuzwa amafaranga atandukanye n’ay’abandi gusa ngo siko byakabaye bigenda.

Bamwe mu banyeshuri bigaga amashami y’ubuvuzi muri Kaminuza ya Gitwe aheruka gufungwa bagashyirwa muri Kaminuza y’u Rwanda bavuga ko bataribona nk’abanyeshuri bayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza