Abareganwa na Urayeneza Gérard ibyaha bya Jenoside i Gitwe bahakanye ibyo bashinjwa

Yanditswe na Akimana Jean de Dieu
Kuya 11 Ukuboza 2020 saa 11:27
Yasuwe :
0 0

Urubanza ruregwamo Urayeneza Gérard uhagarariye ibitaro bya Gitwe mu mategeko na bagenzi be, kuri uyu wa Kane bongeye kwiregura bahakana ibyaha bashinjwa birimo ibya Jenoside, icyaha cyo kuzimiza cyangwa gutesha agaciro ibimenyetso cyangwa amakuru yerekeye jenoside.

Ni urubanza rwatangiye rutinze kubera ibibazo bikomoka ku ikoranabuhanga ryakoreshwaga mu rwego rwo kwirinda icyorezo cya Coronavirus.

Uwatangiye yiregura ni Nyakayiro Samuel watangiye ahakana ko ibyaha byose aregwa n’ubushinjacyaha birimo icyaha cya Jenoside no guhisha amakuru yerekeye ahajugunywe imibiri.

Nyakayiro yavuze ko ari we wahawe akazi ko gucukura ibi birombe mu 1992-1993 bigenewe kwakira imyanda yavaga mu bitaro bya Gitwe, yongera guhabwa akazi ko kubisiba ubwo Jenoside yari irangiye.

Yavuze ko atari azi ko iyo myobo yajugunywemo imibiri y’abatutsi kuko ntabyo yabwiwe kandi ko iyo abimenya atari kwanga gutanga amakuru dore ko hari abo mu muryango we bishwe ku buryo iyo abimenya yari kujya kureba ko aribo.

Ati “Ntabwo nari kuba nzi aya makuru ngo nyabike kuko hari abavandimwe banjye bishwe ndetse hakiyongeraho n’abana banjye nabo bishwe ntazi aho biciwe bityo iyo menya amakuru nari kuyatanga kugira ngo nanjye ndebe ko ari abana banjye n’abavandimwe.”

Hari umutangabuhamya wavuze ko Nyakayiro yari abizi ko muri iyo myobo harimo imibiri y’abatutsi bishwe muri Jenoside ariko akaryumaho.

Uregwa n’umwunganira mu mategeko bavuze ko ntabyo yari azi, bagakemanga n’ubuhamya bw’umutangabuhamya kuko bibaza impamvu ayo makuru atayatanze mbere.

Uwunganira Nyakayiro yavuze ko umukiriya we kuba yaracukuye iyi myobo bitamushyiraho icyaha kuko nta wari uzi ko bizajugunywamo abatutsi bishwe muri Mata 1994.

Uruhande rw’abaregera indishyi rwavuze ko Nyakayiro yemeye ko yacukuje iyo myobo yakuwemo imibiri ndetse akongeraho ko yongeye kwemera ko muri Nyakanga 1994 yahungutse agasanga abantu benshi barimo abapfuye, yanarunguruka mu myobo agasangamo umuntu umwe, akanemera ko ari we wasibye iyo myobo bityo ko yari abizi ko harimo imibiri y’abantu.

Umwanya wahawe Nsengiyaremye Elisée na we uri mu baregwa, yavuze ko guhisha amakuru bitari kumushobokera nubwo yari akuriye inyangamugayo za Gacaca. Yavuze ko bari bafite umuntu wandika ubuhamya bw’ibyavuzwe kandi atari we wabikaga ahanditswe amakuru bityo ko atakwemera icyo cyaha.

Yavuze ko atumva kandi impamvu ari we ukurikiranywe wenyine kandi abayoboye Inteko ya Gacaca i Gitwe ari benshi.

Uwunganira Nsengiyaremye yavuze ko umuntu yatangaga amakuru mu ruhame kandi uwo amakuru ye adahawe agaciro yazamuka akajya kuyatanga ku rwego rw’umurenge n’ahandi.

Ku bijyanye n’abatangabuhamya, uruhande rw’uregwa rwasabye urukiko gushishoza, ngo kuko bitumvikana uburyo umuntu yamarana amakuru imyaka 26 atarayatanga.

Banavuze ko kandi batumva uburyo umwe mu bari bagize Gacaca y’aho Nsengiyaremye yayoboraga, yatanze amakuru amushinja ariko we ntafatwe kandi ibyakozwe barabaga bari kumwe.

Uhagarariye abaregera indishyi yavuze ko uregwa yabaye mu nyangamugayo za Gacaca akora no mu bitaro bya Gitwe. Amakuru y’imibiri iri muri ibyo myobo ngo yari azwi mu bitaro bya Gitwe ariko Nsengiyaremye ntiyayaha agaciro kandi yari mu bagize Gacaca.

Munyampundu Leo alias Kinihira yahoze ari umuzamu w’ibitaro bya Gitwe ndetse byubakwa ni we wahawe akazi ko kubirarira. Yavuze ko nta ruhare na rumwe afite muri ibi byaha akurikiranyweho ndetse ko no muri Gacaca yaburanye akaba umwere.

Uwunganira Munyampundu yavuze ko nyuma y’ifatwa ry’umukiliya we bandikiye Komisiyo y’igihugu yo kurwanya Jenoside, ariko ntigaragaze amakuru y’imyanzuro y’inkiko Gacaca ku byo umukiliya we ashinjwa.

Yavuze ko imvugo z’abatangabuhamya zishingirwaho n’ubushinjacyaha zirimo gushidikanya bityo mu gihe bigaragara ko zigenda zivuguruzanya umukiliya we yagirwa umwere kuko aregwa ibinyoma.

Ku cyaha cyo kunyereza amakuru, uruhande rw’uregwa rwagihakanye kuko avuga ko na we yari yarahunze kandi yasize iyo myobo nta muntu n’umwe wari wajugunywemo.

Uruhande rw’abaregera indishyi rwemeza ko Munyampundu yagize uruhare mu iyicwa ry’abatutsi i Gitwe. Bavuze ko abatangabuhamya bamushinja n’abantu bagiye baca i Gitwe mu gihe cya Jenoside bavuga ko ari we wajyaga kujugunya abatutsi bishwe muri iyo myobo.

Urubanza ruzakomeza tariki 10 Mutarama 2021 humvwa uruhande rw’abasaba indishyi.

Ingoro y'Ubutabera y'urukiko rwisumbuye rwa Muhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .