Abanyarwanda bitabajwe mu kurwanya nkongwa yibasiye Sri Lanka

Yanditswe na Bukuru JC
Kuya 3 Mutarama 2021 saa 10:31
Yasuwe :
0 0

Itsinda ry’Abanyarwanda batandatu ryageze muri Sri Lanka gufasha icyo gihugu guhangana n’icyonnyi cya nkongwa imaze iminsi yibasiye ibinyampeke birimo ibigori.

Izo nzobere zageze muri icyo gihugu mu minsi ishize nkuko ikinyamakuru Ada Derana cyo muri Sri Lanka cyabitangaje, zikaba zarahageze zitwaje litilo 1000 z’umuti uzifashishwa mu guhashya ibyo byonnyi.

Iyo nkongwa yibasiye Sri Lanka yahawe izina rya Sena Caterpillar.

Minisitiri w’ubuhinzi n’ubworozi muri Sri Lanka, Mahindananda Aluthgamage yavuze ko izo nzobere ziri muri icyo gihugu gutanga ubufasha mu bya tekinike. Bagiyeyo ku butumire bwa Perezida Gotabaya Rajapaksa.

Ni nyuma y’impungenge zagaragajwe na bamwe bibaza impamvu hatakoreshejwe inzobere z’imbere mu gihugu.

Kuwa Gatanu tariki ya 1 Mutarama 2021 izo nzobere zavuye mu Rwanda zasuye agace ka Anuradhapur kibasiwe kurusha utundi.

Hashize imyaka ibiri zimwe mu ntara zigize Sri Lanka zibasiwe na nkongwa, bikaba byaragabanyije umusaruro w’ubuhinzi. Abaturage bavuga ko nibura 80 % by’ibinyampeke bahinze byangijwe na nkongwa.

Mu mpera za Werurwe 2017 mu bice bitandukanye by’u Rwanda naho hateye nkongwa idasanzwe yibasira ibihingwa cyane ibigori, igaragara mu Mirenge 108, mu Turere 23.

Iyo nkongwa ikigaragara, inzego zinyuranye zatangije ibikorwa byo guhangana nayo haterwa umuti wica udusimba uzwi nka ‘Pyretrum EWC’, wakorewe mu Rwanda na sosiyete ya SOPIRWA itunganya ibikomoka ku bireti.

Igisirikare cy’u Rwanda (RDF) cyatabaranye ingoga maze gikwirakwiza uwo muti mu bice binyuranye cyifashishije indege ya kajugujugu ndetse ingabo zitanga umusanzu mu kuwutera mu mirima.

Nkongwa imaze imyaka ibiri yibasiye ibihingwa byo muri Sri Lanka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .