Ubutumwa bwa Ambasade y’u Rwanda muri Amerika, bwagaragaje ko Umuyobozi wungirije wa Ambasade y’u Rwanda muri Leta Zunze Ubumwe za Amerika, Arthur Asiimwe, yagiranye ibiganiro n’abafite umushinga wo guhinga imizabibu, gukora umuvinyo no kubihuza n’ubukerarugendo mu Rwanda.

Ibiganiro impande zombi zagiranye byibanze ku gushyira imbaraga muri uwo mushinga, guteza imbere ubukerarugendo no kongera umusaruro w’imizabibu binyuze kugira umurima wayo wihariye mu mushinga bise VINMUSA.

VINMUSA ni umushinga uzashyirwa mu bikorwa mu Karere ka Musanze witezweho kuzafasha u Rwanda mu kweza imizabibu mu murima wayo wihariye, urimo uruganda ruyitunganya ikavamo umuvinyo kandi bigahuzwa n’ubukerarugendo.

Iyi gahunda isanze mu urwego rw’inganda zitunganya imivinyo mu Rwanda n’ubuhinzi rutaratera imbere.

Mu mwaka wa 2019, u Rwanda n’intara ya Rhineland-Palatinate yo mu Budage byiyemeje guteza imbere ubufatanye mu buhinzi, by’umwihariko mu gukoresha ikoranabuhanga rigezweho, no guteza imbere ubuhinzi burambye bw’imizabibu.

Muri ayo masezerano, u Budage buri mu bihugu 15 bya mbere ku Isi mu gukora divayi, bukaba buri ku mwanya wa 10 mu bwinshi bw’ikorwa bwiyemeje gufasha u Rwanda mu by’ikoranabuhanga rigezweho mu buhinzi, ubushakashatsi n’ubumenyi bukenewe mu gutangira guhinga imizabibu ikoreshwa mu gukora umuvinyo utukura, uw’umweru n’uw’iroza (rosé), ikoreshwa ku isoko mpuzamahanga.

Abanyamerika bashimangiye umushinga mugari wo guhinga imizabibu mu Rwanda

Abanyamerika bashaka kugira umurima mugari w'imizabibu i Musanze

Divayi izatunganyirizwa mu Rwanda yitezweho kuzamura ubukerarugendo bushingiye ku buhinzi