00:00:00 IGIHE NETWORK KN KINYARWANDA EN ENGLISH FR FRANCAIS

Abakozi ba NIRDA basabwe kubakira ku mateka y’ukuri barwanya abapfobya Jenoside

Yanditswe na Prudence Kwizera
Kuya 14 May 2022 saa 05:53
Yasuwe :

Ikigo cy’Igihugu cy’Ubushakashatsi n’Iterambere ry’Inganda mu Rwanda (NIRDA) kuri uyu wa Gatanu cyibutse ku nshuro ya 28 Jenoside yakorewe Abatutsi mu 1994, by’umwuhariko abari abakozi ba IRST bishwe.

NIRDA (National Industrial Research and Development Agency) ni ikigo gishya cyasimbuye icyahoze ari IRST (Institut de Recherche Scientifique et Technologique). By’umwihariko bibutse abari abakozi ba IRST bishwe muri Jenoside yakorewe Abatutsi mu 1994.

Icyo gikorwa cyabaye kuri uyu wa Gatanu tariki ya 13 Gicurasi 2022 kibanzirizwa n’urugendo rwo kwibuka rwaturutse ahahoze hari icyicaro gikuru cya IRST rwerekeza ku rwibutso rwa Kaminuza y’u Rwanda, Ishami rya Huye, bashyiraho indabo ndetse bunamira imibiri y’Abatutsi bazize Jenoside ihashyinguye.

Nyuma yaho bagarutse mu kigo cya NIRDA bashyira indabo ku rwibutso rwa Jenoside ruhari, bakomereza mu biganiro.

Komiseri ushinzwe Ubushakashatsi mu Muryango IBUKA, Bizimana Christian, yavuze ko amateka agaragaza ko hari abashakashatsi 12 bo muri IRST bagize uruhare mu gukwirakwiza ingengabitekerezo yagejeje kuri Jenoside yakorewe Abatutsi mu 1994.

Yasobanuye ko mu masezerano ya Arusha yahuzaga Leta y’u Rwanda na FPR Inkotanyi, bemeranyije ko Ingabo z’u Bufaransa zari zaje gushyigikira Perezida Habyarimana Juvenal mu ntambara, zivanwa mu Rwanda zigasimbuzwa Ingabo z’Umuryango w’Abibumbye kugira ngo zifashe kugarura amahoro mu gihugu ntaho zibogamiye.

Ati “Izi nshabwenge z’i Butare rero zandikiye Perezida w’u Bufaransa François Mitterrand ziramubwira ngo ukuye Ingabo mu Rwanda waba uhemukiye u Rwanda, umutekano ntiwakongera kuboneka. Ariko nyamara izi ngabo z’u Bufaransa birazwi neza ko zatoje Interahamwe, birazwi ko zakaga Abatutsi indangamuntu mu mabariyeri, birazwi neza ko umushinga wa Jenoside ziwufitemo uruhare. Izi nshabwenge zari zishingiye ku ngengabitekerezo ya Jenoside.”

Yakomeje avuga ko iyo baruwa yasinyweho n’abantu 300 barimo abakozi 34 bo muri Kaminuza Nkuru y’u Rwanda na 12 bo muri IRST kandi benshi muri bo bagize uruhare muri Jenoside yakorewe Abatutsi.

Yasomye amazina yabo avuga ko ari Ayobagira François Xavier, Hakiza Jean Baptiste, Munyaneza Survellant, Nshimiyimana Jean Damascène, Murengezi Ildephonse, Dr. Nsekuye Bizimana, Uyisabe Emmanuel, Nsabimana Alexandre, Mugabutsinze Jean Pierre, Rugira Jean Bernard, Gasengayire François na Mpakiwumwami Joseph.

Kaneza Monique wari uhagarariye imiryango ifite abayo biciwe muri IRST yavuze ko Jenoside yakorewe Abatutsi yamutwaye abantu benshi mu muryango we.

Ati “Narokotse mu muryango w’abana umunani nsigara ndi umwe. Uku kwibuka uko duteraniye hano nk’Abanyarwanda nsaba Imana iteka ngo ntihazongere kuba Jenoside.”

Umuyobozi Mukuru wa NIRDA, Dr. Sekomo Christian, yavuze ko muri iki gihe hari benshi bahakana bakanapfobya Jenoside yakorewe Abatutsi, bityo kubarwanya ari uruhare rwa buri wese kandi abantu bakaba bakwiye kubikora bubakira ku mateka y’ukuri.

Ati “Gupfobya Jenoside no kuyihakana byafashe indi ntera, ntabwo ari mu mugambo gusa twari tumenyereye, ubu ku mbuga nkoranyambaga iyo ugiyeho uhasanga ibintu bitangaje aho umuntu ahagarara akavuga ibintu ukibaza niba atekereza. Ni urundi rugamba tugomba kurwana kandi bisaba ingufu nyinshi cyane.”

Yakomeje avuga ko muri IRST habitswe inyandiko nyinshi zerekana uko mu gihe cy’ubukoloni hakorwaga ibarura n’ibindi bijyanye n’amoko y’abantu n’aho batandukaniye n’ibindi.

Ati “Rero iyi ngengabitekerezo ya Jenoside hari aho yahereye ni kera, abazungu ubwabo babaye muri iki gihugu nk’abakoloni bafite ibyo bazanye mu nyungu zabo, hari ibyo babibye mu Banyarwanda ariko ikibabaje cyane ni uko Abanyarwanda baje kubyemera.”

Abakozi ba IRST 19 bishwe muri Jenoside yakorewe Abatutsi, bose bashyinguye mu rwibutso rwa Jenoside rwa Kaminuza y’u Rwanda Ishami rya Huye.
Dr. Sekomo yavuze ko kuba hari abashakashatsi n’abahanga bagize uruhare muri Jenoside, bakishora mu bwicanyi bakica abo bakoranaga, byabasigiye umukoro wo gukumira ko Jenoside yazongera kuba ukundi.

Yavuze kandi ko nk’abashakashatsi bazakomeza gukoresha ubuhanga bwabo mu guteza imbere igihugu no kurwanya abahakana n’abapfobya Jenoside yakorewe Abatutsi.

Umuyobozi Mukuru wa NIRDA, Dr. Sekomo Christian, yashyize indabo ku rwibutso mu rwego rwo guha agaciro abazize Jenoside yakorewe Abatutsi mu 1994
Umujyanama wa Komite Nyobozi y'Akarere ka Huye yashyize indabo ku rwibutso
Urwibutso rwa Jenoside yakorewe Abatutsi ruri muri NIRDA
Urwibutso rwa Jenoside yakorewe Abatutsi ruri muri Kaminuza y'u Rwanda i Huye rufite urukuta ruriho amazina y'abazize Jenoside
Komiseri ushinzwe Ubushakashatsi mu Muryango IBUKA, Bizimana Christian, yavuze ko amateka agaragaza ko hari abashakashatsi 12 bo muri IRST bagize uruhare mu gukwirakwiza ingengabitekerezo yagejeje kuri Jenoside yakorewe Abatutsi mu 1994
Kaneza Monique wari uhagarariye imiryango ifite abayo biciwe muri IRST yavuze ko Jenoside yakorewe Abatutsi yamutwaye abantu benshi mu muryango we
Abakozi ba NIRDA bunamiye abazize Jenoside yakorewe Abatutsi mu 1994
Umushinga w'umwana w'umwe mu bakozi ba IRST bazize Jenoside yakorewe Abatutsi watewe inkunga
Hakozwe urugendo rwo kwibuka
Abakozi 19 ba IRST bazize Jenoside yakorewe Abatutsi aho bashyinguye mu rwibutso rwa Kaminuza y'u Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .