Abagororwa basaga igihumbi banditse basaba guhuzwa n’imiryango biciye muri Jenoside

Yanditswe na Evariste Nsengimana
Kuya 8 Ugushyingo 2019 saa 10:36
Yasuwe :
0 0

Abagororwa 1035 bahamijwe icyaha cya Jenoside yakorewe Abatutsi bafungiye muri Gereza ya Nyarugenge iherereye i Mageragere mu Karere ka Nyarugenge, bandikiye ubuyobozi bwayo basaba guhuzwa n’imiryango biciye abayo bakayisaba imbabazi.

Urwego rw’Imfungwa n’Abagororwa(RCS) rugaragaza ko abagororwa bafungiye muri Gereza ya Mageragere bagaragaje ko ako Karere ariko gafite abashaka gusaba imbabazi benshi bagera 373, Kicukiro 159 naho Gasabo 262.

Muri rusange Umujyi wa Kigali niwo ufite benshi mu bashinjwa ibyaha bya Jenoside byo kwica bagera kuri 794, Intara y’Amajyepfo 113, Amajyaruguru 36, Uburengerazuba 28 naho Iburasirazuba bakaba 15.

RCS igaragaza ko hari n’abandi bakoze ibyaha bya Jenoside by’urukozasoni harimo abagabo 31 n’abagore 28 bo mu Karere ka Nyarugenge.

Umuyobozi ushinzwe ibikorwa byo kugorora muri RCS, ACP Kabanda Jean Bosco, avuga ko igikorwa cyo gusaba imbabazi ku bahamijwe ibyaha bya Jenoside aricyo “ gituma tugera ku makuru y’ahantu hatabwe imibiri y’abazize Jenoside yakorewe Abatutsi itarashyingurwa mu cyubahiro.”

Yavuze ko imibare ishobora kwiyongera igihe icyo aricyo cyose kuko muri Gereza ya Nyarugenge ariho bikorwa cyane ariko n’ahandi ubukangurambaga nibukomeza gukorwa bakazagenda bazisaba bakanatanga amakuru y’ahantu hakiri imibiri y’abazize Jenoside itarashyingurwa mu cyubahiro.

ACP Kabanda yavuze ko hakiri imbogamizi ikomeye y’abagororwa binangiye gutanga amakuru bafite imyumvire y’uko FDLR izaza ikababohoza, bigatuma bakomeza kwinangira. Ati “Turacyafite akazi ko kwigisha.”

CNLG ivuga ko abantu bafite amakuru y’ahari imibiri y’abazize Jenoside itarashyingurwa mu cyubahiro n’abahamijwe ibyaha byayo ariko bakaba barinangiye gutanga amakuru ari imbogamizi ku rugendo rw’ubumwe n’ubwiyunge mu banyarwanda.

Amakuru atangwa n’Abagororwa bafungiye muri Gereza ya Nyarugenge iherereye i Mageragere agaragaza ko mu Mujyi wa Kigali gusa hari ibyobo bishobora kuba bibitse imibiri y’abazize Jenoside bisaga 120 birimo 76 biherereye mu Karere ka Nyarugenge, 24 muri Kicukiro na 29 muri Gasabo.

Abagororwa 1035 bahamijwe icyaha cya Jenoside yakorewe Abatutsi bafungiye muri Gereza ya Nyarugenge iherereye i Mageragere mu Karere ka Nyarugenge, bandikiye ubuyobozi bwayo basaba guhuzwa n’imiryango biciye abayo bakayisaba imbabazi.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza