00:00:00 IGIHE NETWORK KN KINYARWANDA EN ENGLISH FR FRANCAIS

Abadepite bongeye gusaba BNR gushyiraho impinduka mu biciro by’ibigo by’ubwishingizi

Yanditswe na Kanamugire Emmanuel
Kuya 18 May 2022 saa 12:42
Yasuwe :

Inteko Ishinga Amategeko, Umutwe w’Abadepite yaasabye Banki Nkuru y’Igihugu kugira icyo ikora kugira ngo imikorere y’ibigo by’ubwishingizi idashyira imbere inyungu z’abakiliya ihagarare.

Ni bimwe mu byo bagarutseho kuri uyu wa 17 Gicurasi ubwo bagezwagaho raporo ya Komisiyo y’Ubukungu n’Ubucuruzi ku isesengura rya raporo y’ibikorwa bya Banki Nkuru y’u Rwanda y’umwaka wa 2020-2021.

Depite Rwaka Pierre Claver, yavuze ko kuba sosiyete z’ubwishingizi zarahuje ibiciro ari ikibazo kuko bibangamiye ihame ryo guhiganwa.

Yavuze ko ko BNR yasobanuraga ko impamvu yo guhuza ibiciro ari ukurinda ko urwego rw’ubwishingizi ruhomba ariko ko ibintu byatangiye kugenda neza.

Yibaza niba hari igihe sosiyete z’ubwishingizi zizagira uburenganzira mu gushyiraho ibiciro kuko zitanganya ubushobozi kandi ibiciro bikaba bishyirwaho hatitawe ku bushobozi bwo guhaha Abanyarwanda bafite.

Depite Rwaka kandi yagarutse ku kibazo cy’abafata ubwishingizi bwa buri kintu cyose (Tout Risque) ariko bakora impanuka bagasabwa kwishyura ibihumbi 200 by’amafaranga y’u Rwanda, ibyo asanga bidakwiye.

Ati “Iki kintu kimaze igihe kivugwa sinumva impamvu BNR isa n’aho ikigihagazeho. Numva bakwiye kuvugira impande zombi ntibibande ku bigo by’ubwishingizi hatariho kurengera umuguzi.”

Perezida wa Komisiyo y’Ubukungu n’ubucuruzi mu Nteko Ishinga Amategeko, Depite Munyangeyo Théogène, yavuze ko kuringaniza ibiciro byakozwe ari uko bigaragaye ko ibigo by’imari byari bigiye guhomba.

Yagaragaje ko ibi bigo bidashyira imbaraga mu kongera serivisi bitangwa ndetse n’izashyizweho n’iteka zikaba zidashyirwa mu bikorwa.

Ati “Nk’inzu ziteraniramo abantu benshi kuba zaba zifite ubwishingizi bw’inkongi, restarurant kuba zakwishyura ugize ikibazo. Hari byinshi bagakoze.”

Yabwiye abadepite ko hari icyizere ko inyigo Banki Nkuru iri gukora izakemura ibyo bibazo.

Ku bijyanye n’ibihumbi 200 Frw bisabwa abafata ubwishingizi bwa ‘Tout Risque’, Depite Munyangeyo yavuze ko na byo byashyizweho nk’uburyo bwo gutabara kubera ko ibigo byari byatangiye guhomba.

Ati “Baratubwiraga ngo n’ugiye kwivuza agira ‘ticket moderateur’ ariko noneho tubakabaza tuti niba ‘ticket moderateur’ ari 10%, ubwo buri modoka igize impanuka ifite ubwishingizi bwa byose, amafaranga make ashoboka ni miliyoni ebyiri? Ni yo mpamvu twabigaruye kugira ngo babitugaragarize muri iyo nyigo mu buryo busobanutse.”

Amakuru ku nguzanyo n’inyungu by’amabanki bigirwa ibanga ni igihombo ku baturage

Hashize imyaka itatu, Inteko Ishinga Amategeko isabye Banki Nkuru y’u Rwanda gusaba amabanki n’ibigo by’imari kujya bitangaza ibyerekeye inyungu ku nguzanyo n’inyungu bitanga ku mafaranga abikijwe.

Banki Nkuru na yo yasabwe kujya icyegeranyo kiri muri uwo mujyo ariko abadepite bagaragaje ko ari ikibazo kuba bitarakorwa.

Depite Bizimana Minani Deogratias yagize ati “Ibi tujya kubisaba byari mu nyungu z’abaturage. Banki zigira inyungu zitandukanye. Twifuzaga ko BNR yajya ikora icyegeranyo kubera ko ari iyo ikuriye amabanki noneho umuturage agahitamo banki akorana nayo bimworoheye.”

“Banki Nkuru ya Uganda irabikora, hari n’izindi banki zibikora kugira ngo umuturage yegerezwe serivi z’imari. Nkaba ntumva impamvu kuva mu 2017/2018 kugeza ubu, BNR itigeze ibasha gushyira mu bikorwa uyu mwanzuro.”

Depite Munyangeyo yavuze ko hari icyizere ko mu mabwiria BNR iri gutegura azajyana n’itegeko rirengera umuguzi wa serivisi z’imari iki kibazo na cyo kizahabwa umurongo.

Ati “Mu rwego rw’Akarere hose barabitangaza, nta mpamvu n’imwe twe bitakorwa.”

Abadepite bagaragaje ko hari imyanzuro yahawe BNR mu myaka itatu ishize ikaba itarashyizwe mu bikorwa
Inteko Rusange y'Umutwe w'Abadepite, ubwo bagezwagaho raporo ya Komisiyo y’Ubukungu n’Ubucuruzi ku isesengura rya raporo y’ibikorwa bya Banki Nkuru y’u Rwanda y’umwaka wa 2020-2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .