00:00:00 IGIHE NETWORK KN KINYARWANDA EN ENGLISH FR FRANCAIS

Abacuruzi bo mu Isoko rya Nyarugenge basuye Urwibutso rwa Jenoside banaremera Abayirokotse

Yanditswe na Ntabareshya Jean de Dieu
Kuya 27 April 2022 saa 08:51
Yasuwe :

Abakorera ubucuruzi butandukanye mu Isoko rya Nyarugenge bagaragaje ko kwibuka Jenoside yakorewe Abatutsi bibereka uruhare abari abacuruzi n’abanyemari bayigizemo, bityo bagaharanira gufata ingamba zo gukora ubucuruzi butabiba amacakubiri.

Amateka agaragaza ko mu gutegura Jenoside yakorewe Abatutsi abacuruzi babigizemo uruhare aho bateye inkunga ibyo bikorwa bafatanyije na Leta yariho icyo gihe.

Kuri uyu wa 27 Mata 2022, abakorera mu Isoko rya Nyarugenge bayobowe na Sosiyete ya ‘Kigali Investment Company’ yubatse iyi nyubako ari nayo iyigenzura, basuye Urwibutso rwa Jenoside yakorewe Abatutsi ruri i Kigali, bunamira inzirakarengane zihashyinguye.

Aba bacuruzi batemberejwe ibice bitandukanye bigize uru rwibutso bigishwa n’amateka mabi yaranze u Rwanda yagejeje kuri Jenoside yakorewe Abatutsi mu 1994, ndetse banasobanurirwa ubutwari bwaranze Inkotanyi zayihagaritse ndetse zikimika ubumwe n’ubwiyunge mu Banyarwanda.

Mu kiganiro gicukumbuye bagejejweho n’Umushakashatsi ku mateka muri Minisiteri y’Ubumwe bw’Abanyarwanda n’Inshingano Mboneragihugu, Mafeza Faustin, yagaragaje uruhare abari abacuruzi bagize muri Jenoside yakorewe Abatutsi.

Umukozi ushinzwe Iterambere ry’Abacuruzi muri Minisiteri y’Ubucuruzi n’Inganda, Karangwa Cassien, yagaragaje ko abacuruzi bakwiye gukora ubucuruzi bugamije kubaka no kurandura ivangura.

Ati “Nk’abikorera bagira n’uruhare mu iterambere ry’Igihugu, ni inshingano bafite zo kwibuka Jenoside yakorewe Abatutsi. Bamwe mu bacuruzi bagize uruhare mu Jenoside yakorewe Abatutsi yaba ari mu itegurwa ryayo, batanga inkunga harimo no kugura ibikoresho. Ubutumwa umuntu yagenera abacuruzi ni uko bakora ubucuruzi bwa kinyamwuga, bugamije kubaka igihugu, butaganisha ku gusenya igihugu kandi butarimo amacakubiri.”

Yavuze ko bivuye mu mateka bize bakwiye kuyigiraho bakabiba urukundo kandi aho bajya hose bakiyemeza kurwanya ingengabitekerezo ya Jenoside no mu mahanga cyane ko abacuruzi baba bagenda mu bihugu bitandukanye.

Umuyobozi wari uhagarariye Inama y’Ubutegetsi ya Kigali Investment Company, Rudasingwa James, yagaragaje ko guhuriza hamwe abacuruzi byari muri gahunda yo kongera kubafasha kwiga amateka no kuyazirikana, hagamijwe kuyigiraho.

Uyu muyobozi yagaragaje ko nk’abantu bari mu bucuruzi biyemeje kuremera Abarokotse Jenoside yakorewe Abatutsi babiri bahawe ikibanza cyo gucururizamo muri iri Soko n’igishoro cyo gutangiza kiri hagati y’ibihumbi 400 Frw na 500 Frw kuri buri umwe.

Umuyobozi w’Isoko rya Nyarugenge, Kayumba Godfroid yasabye abacuruzi bagenzi be kumenyereza abo bafashijwe mu mirimo mishya bagiye kwinjiramo no kubafasha uko bashoboye mu buzima bwabo bwa buri munsi.

Abacururiza muri Iri Soko bagaragaje ko gusura uru Rwibutso byabafashije kwiga amateka y’u Rwanda biyemeza guhangana n’ikibi icyo ari cyo cyose cyashaka gutanya Abanyarwanda.

Umuyobozi w'Isoko rya Nyarugenge, Kayumba Godfroid yasabye abakorera muri iri Soko kwibuka biyubaka
Umukozi ushinzwe Iterambere ry'Abacuruzi muri Minisiteri y'Ubucuruzi n'Inganda, Karangwa Cassien, yasabye abacuruzi kugira uruhare mu gukumira ingengabitekerezo ya Jenoside yakorewe Abatutsi
Aba bacuruzi bahawe ubuhamya mu buryo bw'amashusho
Nsengiyumva Alphred yemerewe igishoro cyo gutangira ubucuruzi mu Isoko rya Nyarugenge
Mugorenejo Leatitia nawe yaremewe
Aba bacuruzi basabwe gushyigikira bagenzi babo binjiye mu bucuruzi
Aba bacuruzi bashyize indabo ku mva
Basobanuriwe amateka ya Jenoside yakorewe Abatutsi
Aba bacuruzi basabwe kwigisha amateka bize kuri bagenzi babo
Abacuruzi b'abanyamahanga nabo bitabiriye iki gikorwa
Aba bacuruzi bagaragaje ko gusura Urwibutso rwa Jenoside yakorewe Abatutsi ari ingenzi

Amafoto: Ntabareshya Jean de Dieu


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .