00:00:00 IGIHE NETWORK KN KINYARWANDA EN ENGLISH FR FRANCAIS

Stade Huye irarabagirana (Amafoto)

Yanditswe na Igirubuntu Darcy
Kuya 30 August 2022 saa 12:42
Yasuwe :

Stade Huye igeze ku musozo nyuma y’amezi ane ivugururwa amanywa n’ijoro kugira ngo u Rwanda rubone stade ishobora kwakira imikino yo ku rwego mpuzamahanga, rureke gukomeza gusembera mu mahanga.

Mu mpera z’icyumweru gishize, IGIHE yasuye iyi stade byitezwe ko igomba kuba yarangiye kuvugururwa muri uku kwezi kwa Kanama mbere y’uko Ikipe y’Igihugu Amavubi yakira Ethiopia mu mikino yo gushaka itike ya CHAN.

Iyi stade uyirebeye inyuma n’imbere mu kibuga, yamaze kuzura impande zose. Ikibuga cyaravuguruwe gusa ubwatsi bwari busanzwemo ni bwo bwagumishijwemo kuko bwo bugifite igihe cyo gukora kugeza mu mwaka utaha wa 2023.

Mu nkengero z’ikibuga, hashyizwe tapis nshya yifashishwa n’abakinnyi bari kwishyushya, mu gihe ibiti by’amazamu byashyizwemo na byo ari bishya. Ikindi gishya cyashyizwemo, ni tapis yifashishwa n’abasiganwa ku maguru kuko na yo yavuguruwe bitandukanye ikajyanishwa n’igihe.

Intebe zo kwicaraho guhera mu myanya y’icyubahiro kugeza ku myanya isanzwe nazo zamaze gushyirwamo, bibarwa ko ifite imyaka igera ku bihumbi 10. Ku wa Kane w’icyumweru gishize, mu mirimo ya nyuma yakorwaga, ni ugutunganya aho abanyamakuru bandika bazajya bicara, hashyirwaho ameza, umuriro na internet ku buryo bitazongera kubaho ko umunyamakuru akikira mudasobwa ye ku bibero.

Mu myanya abanyacyubahiro bashobora kwicaramo bakaganira, ho huzuye cyera, intebe zishyirwamo, televiziyo, utubati two gushyiramo ibyo kubazimanira n’ibindi.

Ubwo IGIHE yasuraga iyi stade, igice cyari kikivugururwa cyari urwambariro kuko uko rwari rwarakozwe, byageze mu kwezi gushize bisaba ko rukorerwa amavugurura ku buryo rushyirwamo utundi tubati n’imitako igaragaza umwihariko w’u Rwanda imeze nk’imigongo.

Iyi ni ishusho ya Stade ya Huye mbere y'iminsi itatu ngo yakirirweho umukino wa mbere mpuzamahanga nyuma y'amezi ane yari imaze ivugururwa. Umukino wabereyeho ku wa 3 Nzeri 2022, warangiye Ethiopia itsinze u Rwanda igitego 1-0 irusezerera mu rugendo rwo gushaka itike ya CHAN 2023
Inyuma y'ikibuga hashyizwe tapis yifashishwa n'abakinnyi bishyushya
Nta migina ikiri mu kibuga ahubwo cyatunganyijwe neza ku buryo kiringaniye
Harimo indangururamajwi zifasha abari muri stade kumva amatangazo aba atambutswa
Mu myanya y'icyubahiro haratunganyijwe ku buryo abazajya bahicara bashobora no gusangira ibinyobwa bitandukanye ari nako bareba umukino
Ni stade yubatse ku rwego mpuzamahanga ku buryo hateganyijwe n'aho abantu bashobora kwicara bakaganira ibyihariye
Aha ni ahazajya hatunganyirizwa ikawa, abayikunda bashyizwe igorora
Hashyizwemo utubati dushya tuzajya twifashishwa n'abakinnyi mu kubika ibikoresho byabo
Urwambariro rwaravuguruwe neza rushyirwamo imitako igaragaza imyubakire ya Kinyarwanda
Abari muri stade bashobora no gukurikira umukino bifashishije écran nini iri muri stade
Iyi ni imyanya yagenewe abanyamakuru aho bazajya bakora akazi kabo nk'abari mu biro
Abogeza imipira nabo bashyiriweho ibyumba byihariye
Iyi stade ifite camera 43 zifashishwa mu gucunga umutekano
Camera zifashishwa mu gucunga umutekano ziri mu bice byose bya stade
Abanyacyubahiro bazaba bafite ahantu heza bashobora kwicara bakaganira mu gihe bategereje ko umukino utangira
Muri Stade hashyizwemo utwuma dutanga internet
Aho abantu binjirira hashyizwe intebe bashobora kwicaraho mu gihe bategereje kwakirwa gusa ziracyafunze mu gihe stade itarafungurwa ku mugaragaro
Mu bice bikoreshwa n'abanyacyubahiro hashyizwemo indabo zituma hasa neza
Uzamutse izi ngazi uhita uhindukira mu gice cyahariwe abanyacyubahiro
Winjira mu rwambariro ni uku hateguye
Izi ntebe nizo zizajya zifashishwa n'abasimbura hamwe n'abatoza
Aho umusifuzi wa kane na komiseri w'umukino bazajya bicara naho harateguwe
Intebe zegereye mu myanya y'icyubahiro mu gice gitwikiriye ni uku ziteye
Stade ifite amatara amurika neza ku buryo imikino izajya iba mu masaha y'ijoro nta nkomyi
Hari gahunda yo kuzavugurura iyi stade ku buryo izongererwa imyanya ariko byo bizakorwa mu cyiciro gikurikiraho
Ni Stade igaragara mu isura itandukanye n'uko yari imeze mbere
Iki gice kiri mu bidatwikiriye, kizajya cyifashishwa n'abafana bishyuye make
Intebe zizajya zikoreshwa n'abasimbura zamaze gushyirwaho
Winjiriye ku marembo y'ahazajya hakoreshwa n'abanyacyubahiro, ni uku hameze

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .