Tariki ya 4 Nyakanga nibwo u Rwanda rwizihiza Umunsi wo Kwibohora. Kuri iyi nshuro uyu muhango wabereye mu Karere ka Nyagatare, ahatashywe Umudugudu w’Icyitegererezo wa Gishuro wubatse mu Murenge wa Tabagwe.

Uyu mudugudu wubatse ahafite amateka akomeye mu rugamba rwo kubohora igihugu kuko ari ho ingabo zahoze ari iza RPA zafashe ubutaka bwa mbere mu Rwanda buzwi nka ‘Gasantimetero’, watashywe na Perezida wa Repubulika Paul Kagame.

Wubatswe n’Ingabo z’u Rwanda ku bufatanye n’izindi nzego za Leta uzacumbikirwamo imiryango 64. Buri muryango wahawe inzu ifite ibyumba bibiri, uruganiriro, ubwogero n’ubwiherero. Wubatswemo irerero, ivuriro ryo ku rwego rwa Poste de Santé, agakiriro n’icyumba mberabyombi.

Muri iki cyumweru kandi Abanya-Kigali batangiye gupimwa Coronavirus mu mihanda mu kureba uko iki cyorezo gihagaze mu banyamujyi. Iki gikorwa cyatangiye mu gitondo cyo ku wa Kane aho Ikigo cy’Igihugu cy’Ubuzima (RBC) cyatangiye igikorwa cyo gupima abantu batandukanye.

Abapimwa babanza gutanga imyirondoro yabo, abo babana, aho batuye, icyo bakora n’ibindi byose byakwifashishwa mu gihe hakurikiranwa uwanduye kugira ngo afashwe ndetse n’abahuye na we.

Ni igikorwa cyatangiriye kuri Stade Amahoro, ariko kinakomereza mu bindi bice bitandukanye by’umujyi, birimo i Nyamirambo na Kicukiro mu rwego rwo kumenya ishusho nyayo y’iki cyorezo ku butaka bw’u Rwanda.

IGIHE yakusanyije amafoto y’ibihe by’ingenzi byaranze icyumweru kigana ku musozo.

Ku wa Kabiri, u Rwanda n’u Bufaransa binyuze mu Kigo cyabwo gishinzwe Iterambere (AFD), byasinye amazerano afite agaciro ka miliyari 53 Frw yo kwifashisha mu guhangana n’icyorezo cya Coronavirus no guteza imbere imyigishirize y'imyuga n'ubumenyingiro. Yashyizweho umukono na Minisitiri w’Imari n’Igenamigambi, Dr Uzziel Ndagijimana na Chargé d'affaires w’u Bufaransa mu Rwanda, Jérémie Blin.

Perezida wa Repubulika Paul Kagame yayoboye Inama y’Abaminisitiri ku wa Kabiri yize ku ngingo zitandukanye zirimo n’ingamba zo guhashya ikwirakwira rya COVID-19

Rutahizamu w’Ikipe y’Igihugu ‘Amavubi’ na Simba SC yo muri Tanzania, Meddie Kagere, yasuye umuryango w’umuhanzi Diamond Platnumz, ahura n’umubyeyi we, Kasim Sanura [uzwi nka Bi Sandra cyangwa Mama Dangote mu itangazamakuru ryo muri Tanzania] iwe mu rugo

CSP Kanyamihigo na Gen Maj Emmanuel Ruvusha bashyikiriza abakuru b'imidugudu amagare yatanzwe na Perezida Paul Kagame akaba n’Umugaba w’Ikirenga w’Ingabo z’u Rwanda, RDF. Aya magare 589 yahawe abakuru b’imidugudu igize imirenge 18 ikikije ishyamba rya Nyungwe, mu kubashimira uruhare bakomeje kugira mu kwicungira umutekano

Kanakuze Eugénie, umufasha wa Bushayija Pascal arahira imbere y'amategeko, birori byabereye mu Murenge wa Nyakabanda

Ku myaka 63 Bushayija Pascal yakoze ubukwe bw’agatangaza na Kanakuze Eugénie nyuma y’imyaka 19 ishize umugore we wa mbere babyaranye abana babiri b’abakobwa yitabye Imana

Ku wa 2 Nyakanga 2020, Ambasaderi Vincent Karega yashyikirije Perezida wa Repubulika Iharanira Demokarasi ya Congo, Félix Tshisekedi impapuro zo guhagararira u Rwanda muri icyo gihugu

Kuva mu gitondo cyo ku wa Kane, Ikigo cy’Igihugu cy’Ubuzima (RBC) cyatangiye igikorwa cyo gupima icyorezo cya COVID-19 Abanyarwanda batandukanye batuye mu Mujyi wa Kigali

Abapimwa babanza gutanga imyirondoro yabo, abo babana, aho batuye, icyo bakora n'ibindi byose byakwifashishwa mu gihe hakurikiranwa uwanduye kugira ngo afashwe ndetse n'abahuye na we

Polisi y’u Rwanda yerekanye abantu barenze ku mabwiriza yo kwirinda icyorezo cya Coronavirus bagakora ibikorwa bihabanye n’amabwiriza yashyiriweho kwirinda ikwirakwira ryacyo ndetse n’abandi bafatiwe mu bikorwa bya magendu

Perezida wa Repubulika Paul Kagame yatashye Umudugudu w’Icyitegererezo wa Gishuro wubatse mu Murenge wa Tabagwe, Akarere ka Nyagatare, ahafite amateka akomeye mu rugamba rwo kubohora igihugu kuko ari ho ingabo zahoze ari iza RPA zafashe ubutaka bwa mbere mu Rwanda buzwi nka ‘Gasantimetero’. Ni igikorwa cyahuriranye no kwizihiza Isabukuru y'imyaka 26 ishize u Rwanda rwibohoye, wabaye ku wa 4 Nyakanga 2020

Ku wa Gatandatu, abakunzi b’ikipe ya Liverpool iheruka kwegukana igikombe cya Shampiyona mu Bwongereza, bo mu Rwanda, baremeye abarokotse Jenoside yakorewe Abatutsi mu 1994 bo mu Karere ka Rulindo, babaha inka enye mu rwego rwo kubafasha kwiteza imbere