Ishusho y’amakuru y’ingenzi yaranze icyumweru mu mafoto

Yanditswe na IGIHE
Kuya 13 Nzeri 2020 saa 11:30
Yasuwe :
0 0

Icyumweru kigana ku musozo cyaranzwe n’ibikorwa bitandukanye ku isonga biyobowe n’ibijyanye no gukomeza ingamba zo kwirinda ikwirakwira ry’icyorezo cya COVID-19.

Mu ntangiriro z’icyumweru, ku wa Mbere, Guverinoma y’u Rwanda yakiriye ibikoresho byo kwirinda COVID-19 byatanzwe na Misiri, bifite agaciro k’ibihumbi $150, asaga miliyoni 145 Frw.

Minisitiri w’Ubuzima, Dr Daniel Ngamije, yavuze ko iyo nkunga irimo udupfukamunwa, ibikoresho abaganga bambara ku mubiri no ku mutwe, n’inkweto zigenewe abakora kwa muganga, cyane cyane ahashyirwa ibikoresho biba byifashishijwe mu kwita ku barwayi banduye COVID-19.

Ati “Biba bigaragaraho ubwandu bwinshi bwa COVID, bijya ahantu nk’aho mbese habigenewe kuko ntabwo dupfa kwandarika ibintu nk’ibyo ngibyo tuba twifashishije mu kwita ku barwayi ba COVID-19 n’ibindi byinshi twifashisha cyane kwa muganga.”

Ibikoresho u Rwanda rwakiriye bizafasha amavuriro yita ku barwayi ba COVID-19, cyane ko u Rwanda rurimo kongera ayo hanze ya Kigali bikazafasha no kurinda abakozi bo kwa muganga n’abarwayi babagana.

Ku wa 7 Nzeri 2020 kandi Perezida Paul Kagame yakiriye muri Village Urugwiro Umuyobozi w’Inama y’Ubuyobozi y’Ihuriro Nyafurika ku iterambere ry’Ubuhinzi (AGRA), Hailemariam Desalegn wabaye Minisitiri w’Intebe wa Ethiopia na Perezida w’iryo huriro, Dr. Agnes Kalibata.

Bahuye hitegurwa Inama mpuzamahanga y’iryo huriro yiga ku Buhinzi muri Afurika yabereye mu Rwanda hifashishijwe ikoranabuhanga ku wa 8-11 Nzeri 2020.

Mu zindi nkuru zaranze icyumweru harimo iya Rusesabagina Paul ukurikiranyweho ibyaha birimo iby’iterabwoba, watangiye gukurikiranwa no kubazwa n’Ubushinjacyaha nyuma yo gushyikirizwa dosiye, aho yitabye ku cyicaro cyabwo ku Kimihurura, ku wa Gatatu, tariki ya 9 Nzeri 2020

Ibyaha ashinjwa byakorewe mu duce turimo Nyabimata mu Karere ka Nyaruguru, ahabaye ibitero muri Kamena 2018 no mu nkengero za Nyungwe mu Karere ka Nyamagabe mu Ukuboza 2018, byose byigambwe n’umutwe witwara gisirikare wa FLN, ushamikiye ku mpuzamashyaka MRCD Rusesabagina yari ayoboye.

IGIHE yakusanyije amafoto agaragaza ibihe by’ingenzi byaranze iminsi irindwi ishize yo ku wa 7-13 Nzeri 2020.

Guverinoma y’u Rwanda ku wa Mbere yakiriye ibikoresho byo kwirinda icyorezo cya COVID-19 byatanzwe na Misiri, bifite agaciro k’ibihumbi 150 by’amadolari ya Amerika, ni ukuvuga asaga miliyoni 145 Frw. Iyi nkunga irimo udupfukamunwa, ibikoresho abaganga bambara ku mubiri no ku mutwe n’inkweto zigenewe abakora kwa muganga
Ku gicamunsi cyo ku wa Mbere tariki 7 Nzeri, Perezida Paul Kagame yahuye n’Umuyobozi w’Inama y’Ubuyobozi y’Ihuriro Nyafurika ku Iterambere ry’Ubuhinzi (AGRA), Hailemariam Desalegn na Perezida w’iryo huriro Dr. Agnes Kalibata, mbere y'itangira ry'inama mpuzamahanga y’iryo huriro yiga ku Buhinzi muri Afurika yabaye hifashishijwe ikoranabuhanga
Mu Mujyi wa Kigali hari gukorwa ubusitani bwuhirwa ku buryo amazi adashobora gutembera hasi
Rusesabagina Paul ukurikiranyweho ibyaha birimo iby’iterabwoba, yatangiye gukurikiranwa n’Ubushinjacyaha nyuma yo gushyikirizwa dosiye, aho yitabye ku cyicaro cyabwo ku Kimihurura, ku wa Gatatu, tariki ya 9 Nzeri 2020
Urwego rw’Igihugu rw’Ubugenzacyaha, RIB, rwataye muri yombi itsinda ry’abantu 24 biyita “Abamen” bo mu Karere ka Rusizi bafatiwe mu bikorwa by’ubwambuzi bukoresheje amayeri mu bihe bitandukanye
Imiryango 271 itishoboye imaze kubakirwa, indi 390 ituye mu nzu z’amanegeka yatekerejweho
Guhera ku wa Kabiri tariki 8 Nzeri 2020, Miss Nishimwe Naomie wegukanye ikamba rya Miss Rwanda 2020 yatangiye igikorwa kizamara icyumweru cyose aganira n’abangavu bo mu Karere ka Nyaruguru babyariye iwabo
Ku wa Kabiri, mu Mujyi wa Kigali mu Murenge wa Gisozi ahazwi nko mu Gakinjiro habereye impanuka ikomeye y’ikamyo yari ifite umuvuduko mwinshi, yagonze imodoka ebyiri ndetse n’abamotari, abantu babiri bahita bitaba Imana
Umuyobozi wa Volcano Express Ltd; Habonimana Patrick Emery hamwe na Visi Perezida wa Mukura VS; Sakindi Eugène bamaze gushyira umukono ku masezerano. Ikigo gicuruza imodoka cya Hyundai Rwanda n’icya Volcano Express Ltd gitwara abantu mu modoka rusange, byasinyanye amasezerano na Mukura Victory Sports, afite agaciro k’asaga miliyoni 70 Frw mu gihe cy’umwaka umwe
Hailemariam Desalegn Boshe (iburyo) wabaye Minisitiri w’Intebe wa Ethiopia yagaragaje akanyamuneza nyuma yo gusura ingagi zo muri Pariki y’Igihugu y’Ibirunga, anashima umuhate w’u Rwanda mu kwita ku rusobe rw’ibinyabuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .