00:00:00 IGIHE NETWORK KN KINYARWANDA EN ENGLISH FR FRANCAIS

Imyiteguro irarimbanyije mu Kinigi izakira umuhango wo ‘Kwita Izina’ (Amafoto)

Yanditswe na Shumbusho Djasiri
Kuya 31 August 2022 saa 04:50
Yasuwe :

Imyiteguro irirarimbanyije mu Kinigi mu Karere ka Musanze, ahazabera umuhango wo kwita izina abana b’ingagi 20 bavutse muri uyu mwaka.

Ni imyiteguro igaragara ucyinjira muri Musanze, aho hamanitswe ibyapa bigaragaza ko uyu mujyi witegura umuhango wo Kwita Izina ugiye kuba bwa mbere mu buryo bw’imbonankubone nyuma y’imyaka ibiri kubera icyorezo cya COVID-19.

Mu Kinigi ahabera uyu muhango nyirizina naho hatangiye kurimbishwa, hamaze gutegurwa ibibumbano by’ingagi ndetse imirimo yo kubaka amahema abazitabira uyu muhango bazicaramo nayo igeze kure.

Bamwe mu baturage usanga barimo gutunganya imigano yifashishwa mu kubaka abandi bakomeje kubaka ibishushanyo by’ingagi no kubaza ibikoresho bitandukanye mu kurimbisha iyi site.

Ku ruhande rw’abikorera bo mu Murenge wa Kinigi mu Karere ka Musanze, nabo akanyamuneza ni kose ndetse bahamya ko biteguye neza kuzakira ababagana, cyane ko bemeza ko ibi ari bimwe mu birori bisiga babonye icyashara.

Kugeza ubu hamaze gutangazwa urutonde rw’abazagira uruhare muri iyi gahunda yo Kwita Izina rugaragaraho abantu batandukanye barimo Igikomangoma cya Wales mu Bwami bw’u Bwongereza, Charles, Didier Drogba wamenyekanye cyane mu Mupira w’Amaguru n’abandi.

Kuva mu 2005 uyu muhango wo Kwita Izina watangizwa, abana b’ingagi basaga 354 nibo bamaze guhabwa amazina.

Inzira zigana mu Kinigi zose zamaze gushyirwaho ibyapa bigaragaza ko hagiye kubera umuhango wo Kwita Izina
Abikorera bo mu Kinigi biteze ko uyu muhango uzabasigira amafaranga
Mu Kinigi hari kurimbishwa
Ukigera ahabera umuhango wo kwita izina ubona ko hitegura kwakira ibirori bikomeye
Iki ni kimwe mu bihangano byamaze gukorwa
Ibibumbano by'ingagi byamaze gutunganywa
Amahema azicaramo abantu bazitabira uyu muhango yamaze kubakwa
Umuhango wo Kwita Izina uha benshi akazi

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .