Ni uruzinduko Minisitiri Uwamariya yakoze binyuze mu bukangurambaga bwo gushishikariza abaturage kubaka umuryango ushoboye kandi utekanye.

Mu gitondo cyo kuri uyu wa Gatatu ni bwo yasuye umuryango wa Ndayisaba na Tuyisabe mu Murenge wa Rubengera, wahoze ubana mu makimbirane ariko uyavamo ufashijwe n’inzego z’ibanze n’inshuti z’Umuryango.

Amakuru dukesha Minisiteri y’Uburinganire n’Iterambere ry’Umuryango avuga ko uyu muryango wasobanuriye Minisitiri Uwamariya ko amakimbirane yabo yaterwaga n’ubusinzi bw’umugabo, inshuti mbi, bigatuma aheza umugore ku mitungo bashakanye.

Uyu mugabo n’umugore bavuze ko nyuma yo kugirwa inama baretse amakimbirane bakaba batekanye, babayeho neza, abana biga, bafatanya mu iterambere.

Minisitiri Uwamariya yashimye uyu muryango kuba warumvise inama nziza ukareka amakimbirane yawuhezaga mu bukene no kubaho nabi kw’abana. Yawusabye gukomeza gufatanya no kwiteza imbere kugira ngo babere abandi urugero, babigisha ibyiza byo gushyira hamwe kw’abagize umuryango.

Muri Kanama ni bwo Dr Uwamariya Valentine wari Minisitiri w’Uburezi yagizwe uw’Uburinganire n’Iterambere ry’Umuryango.

Minisitiri @Dr_Uwamariya yashimye uyu muryango kuba warumvise inama nziza ukareka amakimbirane yawuhezaga mu bukene no kubaho nabi kw'abana, abasaba gukomeza gufatanya bakiteza imbere kandi bakaba itara rimurikira abandi, babigisha ibyiza byo gushyira hamwe kw'abagize umuryango. pic.twitter.com/0nrvibPtNz

— Ministry of Gender & Family Promotion | Rwanda (@RwandaGender) September 13, 2023

Minisitiri w’Uburinganire n’Iterambere ry’Umuryango, Uwamariya Valentine, yasuye uyu muryango w’i Karongi wabanaga mu makimbirane