Ifoto y’umunsi: Imiterere y’urwasaya rw’imvubu

Yanditswe na Iradukunda Serge
Kuya 13 Kanama 2020 saa 07:13
Yasuwe :
0 0

Imvubu ni imwe mu nyamaswa zitangarirwa na benshi,ahanini kubera imiterere yayo haba mu buryo ibayeho n’uko umubiri wayo uteye, kimwe mu bitangaza abantu cyane kuri iyi nyamaswa ni urwasaya runini n’amenyo atyaye biyiha ubushobozi bwo kuba yacamo kabiri ubwato buto igihe iburumye.

Iyi nyamaswa y’inyamabere inaboneka mu Rwanda by’umwihariko muri pariki y’Akagera ituruka mu muryango w’izitwa ‘Hippopotamidae’.

Imvubu iri mu nyamaswa nini ku Isi dore ko ishobora gupima ibiro biri hagati ya toni 1.5 na toni 1.8 ndetse ikagira uburebure bushobora kugera kuri metero 5.2.

Iyi nyamaswa kandi ishobora kubaho imyaka iri hagati ya 40 na 50 igihe hatagize ikiyisagarira ngo ipfe imburagihe.

N’ubwo imvubu ari indyabyatsi, umubare w’abantu bicwa n’imvubu muri Afurika uruta uwo izindi nyamaswa zose zica zishyize hamwe. Nubwo igaragara nk’idakaze kuko wenda ari nini, wakwibwira ko ari inebwe, imvubu ni inkazi cyane ndetse igira umuvuduko mwinshi.

Iyi nyamaswa ikunze kwimarira igihe cyayo kinini mu mazi ni imwe muzororoka gake, dore ko ibyara rimwe mu myaka ibiri.

Iramutse ikwirukankanye ngo ikugirire nabi, hari uburyo bubiri wayihungamo nta ntwaro ukoresheje: kurira igiti cyangwa se kwitegereza inzira yiruka iganamo bityo ugahindura wihuse kuko ngo imvubu ntizijya zoroherwa no guhindura amayira.

Kubera uburyo igira umunwa munini n’amenyo atyaye, birahagije ko iruma rimwe gusa ingona ifite umbyimba wa metero 1.2 ikayicamo kabiri.

Umufotozi wa IGIHE, Niyonzima Moïse, yasuye imvubu zo muri Pariki y’Akagera, abasha gufata amwe mu mafoto agaragaza imiterere y’urwasaya rwazo.

Imvubu ishobora kwasama kuri dogere 150
Imvubu ibyara rimwe mu myaka ibiri
Igira amenyo atyaye ashobora gutuma icamo ingona kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .