Amafoto y’icyumweru: Uduce tw’i Kigali twasubijwe mu rugo, i Nyaruguru hagabwa igitero

Yanditswe na IGIHE
Kuya 28 Kamena 2020 saa 10:00
Yasuwe :
0 0

Iminsi irindwi y’icyumweru kigana ku musozo yaranzwe n’ibikorwa bitandukanye birimo icyemezo cyo gusubiza imidugudu itandatu yo mu Mujyi wa Kigali mu bihe bidasanzwe byo Kuguma mu rugo mu kwirinda Coronavirus.

Ku mugoroba wo ku wa 25 Kamena 2020, Leta y’u Rwanda yategetse imidugudu itandatu yo mu turere tubiri two mu Mujyi wa Kigali kubahiriza gahunda ya ‘Guma mu Rugo’ mu gihe cy’iminsi 15, mu rwego rwo gukumira ikwirakwira ry’icyorezo cya COVID-19.

Imidugudu yashyizwe mu rugo irimo Kamabuye na Zuba yo mu Kagari ka Nyarurama; Umudugudu wa Nyenyeri wo mu Kagari ka Bwerankori byose byo mu Murenge wa Kigarama ndetse n’Umudugudu wa Ruganwa I, mu Kagari ka Kinunga, Umurenge wa Gikondo mu Karere ka Kicukiro.

Hari kandi n’imidugudu ibiri ariyo Kadobogo na Gisenga yo mu Kagari ka Kigali, Umurenge wa Kigali, mu Karere ka Nyarugenge.

Inzego z’ibanze n’izishinzwe umutekano nizo zasabwe gukurikirana ishyirwa mu bikorwa ry’amabwiriza mashya.

Mu bindi bikorwa by’ingenzi byagarutsweho muri iki cyumweru ni amakuru y’igitero cyagabwe i Nyaruguru.

Ahagana saa Sita z’ijoro ryo ku wa 27 Kamena 2020 nibwo abagizi ba nabi baturutse mu Burundi, bateye ibirindiro by’Ingabo z’u Rwanda biherereye mu Murenge wa Ruheru mu Karere ka Nyaruguru.

Ahabereye kurasana hasigaye ibimenyetso by’amasasu ndetse abagizi ba nabi bane barishwe, abandi batatu bafatwa mpiri.

IGIHE yifashishije abanyamakuru bayo bafata amafoto ndetse n’izindi mbuga zitandukanye yakusanyije ibihe by’ingenzi byaranze icyumweru cyo ku wa 22-28 Kamena 2020.

Ku wa 27 Kamena 2020, nibwo mu Karere ka Musanze, mu Kigo cy'Amagare (Africa Rising Cycling Center) hatangijwe ku mugaragaro ubukerarugendo bushingiye ku Igare, aho ababukora baryifashisha basura ibice nyaburanga mu Rwanda
Major (Rtd) Habib Mudathiru wahoze mu Mutwe witwaje Intwaro wa P5, hamwe na bagenzi be ku wa 22 Kamena 2020 bagejejwe imbere y’Urukiko Rukuru rwa Gisirikare ngo baburanishwe ku byaha bashinjwa bijyanye no kugambirira guhungabanya umutekano w’igihugu
Abaturage bo mu Murenge wa Nyabirasi mu Karere ka Rutsiro, bishimiye kugezwaho umuriro w’amashanyarazi bafataga nk’inzozi. Umurenge wa Nyabirasi uri mu Mirenge 10 iherutse kuvugwaho ko itagerwagamo na gato amashanyarazi afatiye ku muyoboro mugari. Abaturage bishimiye uyu muriro bagejejweho
Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe Umuryango wa Afurika y’Iburasirazuba, Prof Nshuti Manasseh, yarahiriye guhagararira Leta mu Nteko Ishinga Amategeko y’Umuryango wa Afurika y’Iburasirazuba (EALA)
Nyampinga Foundation, ihuriro ry’abakobwa begukanye amakamba ya Miss Rwanda mu bihe bitandukanye, ku wa 24 Kamena 2020 basuye Umudugudu wa Nyarugunga utuwe n’imiryango y’abamugariye ku rugamba rwo kubohora igihugu
Sosiyete y’Itumanaho ya MTN Rwanda yasinyanye amasezerano y’ubufatanye na Sosiyete Nyarwanda y'Abahanzi (RSAU) yerekeye gukoresha ibihangano by’abahanzi mu buryo bukurikije amategeko
Imiryango 431 igizwe n’abantu barenga 2000 yiganjemo iy’abarimu baturuka muri Repubulika ya Demokarasi ya Congo bigisha mu mashuri yigenga mu Ntara y’Iburasirazuba n’abandi bakozi bahagarikiwe amasezerano kubera ingaruka za Coronavirus, bahawe ibiribwa mu rwego rwo kubafasha guhangana n’ibi bihe
Aline Bizimana Mushikiwabo yahawe igihembo cyitwa “Woman of Valor Award" cy’umwaka wa 2020 gitangwa n’Ishyirahamwe rihuza abadipolomate muri icyo gihugu ryitwa “Ambassadors' Club of Israel''. Yari kumwe n'umugabo we Ambasaderi w’u Rwanda muri Israel, Rutabana Joseph
Ingabo z’u Rwanda (RDF) zemeje ko abantu bagera ku 100 bitwaje intwaro zirimo n’inini baturutse mu Burundi, bateye ku birindiro byazo mu Murenge wa Ruheru mu Karere ka Nyaruguru, zibicamo benshi zinabatesha ibikoresho birimo intwaro, mu gihe abasirikare batatu bakomeretse byoroheje. RDF yafashe bimwe mu bikoresho by'abagabye igitero
Ku mugoroba wo ku wa 25 Kamena 2020, Leta y’u Rwanda yafashe icyemezo gitegeka imidugudu itandatu yo mu turere tubiri two mu Mujyi wa Kigali kubahiriza gahunda ya ‘Guma mu Rugo’ mu gihe cy’iminsi 15, mu gukumira ikwirakwira rya COVID-19. Abashinzwe umutekano bashyizwe ahashoboka hose mu rwego rwo gukumira ingendo zose zitari ngombwa
Perezida Kagame ku wa 26 Kamena 2020yayoboye Inama ya Komite Nyobozi yaguye ya FPR Inkotanyi yabereye ku Cyicaro cy’uyu muryango giherereye i Rusororo mu Karere ka Gasabo. Aha nibwo yageraga i Rusororo ari kumwe n'Umunyamabanga Mukuru wa FPR Inkotanyi, François Ngarambe
Ku wa 26 Kamena 2020, abahanzi babashije gutsinda mu cyiciro cya kabiri cy’irushanwa rya MNI baherewe ibihembo kuri Televiziyo Rwanda, Tonzi wabaye uwa mbere ashima abateguye iki gikorwa
Mu myiteguro yo kongera kwakira abayoboke bayo, Kiliziya Gatolika yabimburiye andi madini kwitegura kwakira abakirisitu, ishyiraho ibimenyetso bigaragaza uburyo bashobora kuzajya bahana intera mu gihe baje mu misa
Ubuzima bwongeye kugaruka mu Kinigi bitewe n’isubukurwa ry’ibikorwa by’ubukerarugendo mu Rwanda nyuma y’igihe bihagaritswe bitewe n’ingamba zashyizweho mu kwirinda ikwirakwira rya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .