00:00:00 IGIHE NETWORK KN KINYARWANDA EN ENGLISH FR FRANCAIS

Uko Uwibona yinjiye mu buvumvu n’intambwe yamugejeje ku ruganda ruto rutunganya ubuki

Yanditswe na IGIHE
Kuya 13 Ugushyingo 2021 saa 11:53
Yasuwe :
0 0

“N’ubu wabona uruyuki ruje kunsuhuza! Aho nimukiye hose haba hari inzuki; zirankunda...” Aya ni amagambo ya Jeanne Sheila Uwibona, rwiyemezamirimo winjiye mu buvumvu, umwuga ukunze gukorwa n’abagabo mu Rwanda.

Uwibona yinjiye muri uyu mwuga nyuma y’igitekerezo yagize ashaka icyamwongerera ubushobozi bwo gufasha abagore bagenzi be bafite ubumuga n’abafite ubwandu bwa virusi itera Sida.

Ubusanzwe yakoraga ubucuruzi burimo kugemura imboga n’imbuto muri restaurants mu Mujyi wa Kigali kuva mu 2017, mu byo yinjizaga akagira umugabane agenera abo bagore batishoboye ubafasha mu mibereho yabo y’ibanze.

Ni ibikorwa yatangiye ubwo yari ahagaragariye Inama y’Igihugu y’Abagore mu Kagari ku Kamutwa mu Murenge wa Kacyiru.

Mu buhamya bwe yavuze ko icyo gihe yari afite ubushobozi buke bituma atekereza igikorwa kiramba cyamuzamura kikanamufasha gukomeza ibikorwa by’ubufasha yari yaratangiye ari na bwo yatangiye ubucuruzi bw’ubuki.

Ku ikubitiro yaguraga ubuki mu bavumvu akabutunganya akabugurisha, buza gukundwa by’umwihariko n’abanyamahanga bituma na we ubwe atangira korora inzuki, kuri ubu afite imitiba isaga 260 i Kabuga mu Karere ka Gasabo.

Yavuze ko uko yatunganyaga ubwo buki ari na ko yageragezaga kwiyungura ubumenyi bituma ashyiramo akarusho atangira kubuvanga n’ibindi bintu, kuri ubu afite uruganda ruto ruzwi nka ‘Sheila Honey’, rukora ‘produits’ zigera kuri 12 zikomoka ku buki.

Ati “Natangiye nkusanya ubuki mu bavumvu nkabutunganya abantu barabukunda. Nyuma natekereje guhanga agashya ko gufata ubuki nkongeramo tungurusumu, tangawizi, moringa, macadamia n’ibindi bifasha mu buzima bw’umuntu. Abanyamahanga barabikunze bavuga ko bashaka ko nzajya mbibashyira muri Amerika n’ahandi ariko nta bushobozi nari mfite bwo kubikora.”

Nyuma ngo yaje kubona umufatanyabikorwa wabonye ko akora ibintu bidasanzwe bigaragaza ko ubuki bwifashishwa no mu bindi bintu by’ubuzima.

Isoko ry’ubuki rirahari

Uwibona yavuze ko kuri ubu afite amakoperative atatu y’abavumvu akorana na yo ariko ateganya gutangiza ikusanyirizo ry’ubuki muri buri karere ndetse agashyiraho gahunda yo guhugura aborozi b’inzuki ku bijyanye n’uko bakwitwararika umwuga wabo ukababyarira umusaruro ufatika.

Ati “Ubu turimo turategura uko twashyiraho ikusanyirizo ry’ubuki muri buri karere. Turashaka kumenyesha abavumvu bo hirya no hino mu gihugu ko hari isoko rinini ry’ubuki ariko ntabwo dufite ubuhagije.”

Buri koperative mu zo bakorana igemura ibiro biri hagati ya 500 na 1000 buri cyumweru akaba ashishikariza abavumvu kongera umusaruro akanabafasha gufata neza ubuki by’umwihariko mu gihe cyo guhakura kugira ngo ubuziranenge bwabwo bubungabungwe.

Ati “Hari nk’ubuki butakaza ubuziranenge kubera ko bwahakuwe nabi. Hari nk’abahakurisha umuriro w’ibisheshe; ibyo bifite ibyo byica mu buziranenge bw’ubuki noneho hakaza no kubutwara nabi. Ibyo byose ni byo dushaka kujya tubahuguramo ngo babashe kubona uko babyitwararika, bitwararike n’ubworozi bwabo bamenye no kurwanya udusimba twica inzuki. Twabonye ko umuvumvu abashije gukora neza umurimo we byamuzamura bikazamura n’igihugu.”

Yakomeje ati “Umuntu nubwo yaba afite imitiba 50 igihe cyo guhakura iyo kigeze akabura isoko biba bibabaje kandi hari isoko rinini hanze, twabasha kubukusanya tukabujyana."

Ibyo umuvumvu akwiye kwitwararika

Ikoreshwa ry’imiti yica udusimba mu bikorwa by’ubuhinzi ni kimwe mu bitera impungenge ko n’inzuki zishobora kuzagera igihe zigacika nyamara zari zifite umumaro ukomeye ku kiremwa muntu.

Uwibona uvuga ko amaze kugira ubumenyi bwisumbuye mu myororere yazo yagaragaje bimwe mu bikorwa umuvumvu akwiye kwitwararika.

Birimo kwirinda guhinga hafi y’ahashyizwe imizinga ahubwo hagaterwa indabo n’ibindi biti byose inzuzi zikenera. Ibyo ngo bizirinda kuzerera aho zashoboraga guhurira n’ibihingwa byateweho imiti yica udusimba.

Ati “Bisaba umwanya no kwitanga ukamenya uko urinda inzuki, amazi akaba ahari mu buryo buhoraho. Mbere tukigera aho twororera hari nko mu butayu washyira inzuki mu mutiba zigahunga tuza kwiga ubwenge bwo gutera ibintu byose zijya gushaka. Iyo zifite indabo, amazi n’ibiryo [nk’ubu dufite ibiryo tuzigaburira biva mu Misiri] n’imiti yo kuzivura ibintu bigenda neza.”

“Ikindi inzuki zigenda iyo urwamikazi rwapfuye cyangwa rwimutse. Bisaba ko umuvumvu amenya igihe ruvanwamo rugashyirwa ahantu harwo. Nkanjye ubu nsigaye mpora nsoma ibyerekeye inzuki kugira ngo menye uko mbitwararika.”

Sheila Honey ikoresha abakozi bagera kuri 20 barimo abakurikirana abavumvu, abahanga mu biribwa, abakurikirana iby’ubucuruzi n’abandi. Ikorera mu Murenge wa Kinyinya, AKarere ka Gasabo. Itunganya ubuki bw’umwimerere n’ubwongewemo ibindi birimo tangawizi, moringa, tungurusumu, sesame, urusenda, chocolat n’ibindi.

Uwibona asobanura ibikorwa akora n'uko yabitangiye
Bimwe mu bikorwa mu buki na 'Sheila Honey'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .