Ubutwari bwa Soeur Kamuzima, umurinzi w’igihango warokoye Abatutsi bahungiye i Shangi

Yanditswe na Sitio Ndoli
Kuya 3 Gashyantare 2020 saa 04:51
Yasuwe :
0 0

Kamuzima Marciana (Soeur Magdalena) ari mu barinzi b’igihango 17 bashimiwe ku bikorwa by’indashyikirwa byatumye atera intambwe yo guharanira uburenganzira bw’ikiremwamuntu agahisha Abatutsi bicwaga muri Jenoside yakorewe Abatutsi mu gace ka Shangi.

Soeur Kamuzima yashimiwe mu muhango wahuriranye n’isozwa ry’Ihuriro rya Cyenda ry’Umuryango Unity Club ryabaye mu Ugushyingo 2016.

Uyu mubikira yahembwe kubera uruhare rwe mu kurokora Abatutsi 130 bari bahungiye mu Ishuri ryisumbuye rya Mutagatifu François d’Assise Shangi, riherereye mu Karere ka Nyamasheke.

Yanze gusiga abantu bari bamuhungiyeho muri icyo kigo cy’ababikira cy’Abapenitente cya Shangi n’abari bahungiye kuri Paruwasi Gatolika ya Shangi, akabashakira ibyo kurya n’imiti yo kubavura.

Mu gihe cya Jenoside, Soeur Kamuzima w’ imyaka 84 wari Umuyobozi wa St François d’Assise Shangi, yavuze ko Jenoside igitangira hari abanyeshuri n’Abatutsi bahahungiye kandi ko nta we bigeze basubiza inyuma.

Yagize ati “Hari abantu bahungiye hano turihisha, uwazaga wese twaramwakiraga, bamwe bakihisha mu nzitiro. Uje akomeretse tukamuvura, tukabashakira icyo kurya n’ibindi.”

Avuga ko hari Interahamwe zajyaga gushaka abantu babahungiye, agakoresha amayeri yo kubahisha.

Ati “Nuko nyine hano hari hafunze ariko ibitero byanyuraga inyuma tukabyumva, hari abagabo babiri bajyanye bari baje bakurikiranye tutashoboraga guhisha kuko bari bababonye. Hari abari bahishe mu bisenge, mu kigega cy’amazi, bihishaga hirya no hino. Nimugoroba nibwo twabashyiraga ibyo kurya.”

Ngiruwonsanga Théoneste warokokeye muri St François d’Assise Shangi avuga ko Soeur Kamuzima yakoze ibintu byinshi byiza kuko yagumanye na bo, akanga kubasiga bonyine.

Ati “Muri biriya bihe abantu bakizaga amagara yabo, igihe cyarageze hanzurwa ko abihayimana bahava bakagenda tugasigara twenyine. We yanze kugenda ndetse na bagenzi bari kumwe baragumana kugira ngo bakomeze kuturwanaho.”

Gahongayire Honorine avuga ko yahahungiye bakamwakira bakamwambika impuzankano z’abanyeshuri kugira ngo Interahamwe zitamwica.

Yagize ati “Nari ntuye hano hafi ndaza, ababikira baramfungurira barambwira ngo nimpite nambara umwenda w’ishuri; bambwiye ko umuntu wese uzaza kudushaka tuzavuga ko turi abanyehuri bo muri zone y’intambara. Byari uburyo bwo kugira ngo tubashe kubaho. Ntabwo wabona icyo umuha, yadufashe nk’abana be, ni igikorwa cy’ubutwari, iyo haza kubaho abantu bameze nkawe abantu benshi bari kurokoka.”

Soeur Kamuzima yasabye abantu kureka inabi bakimakaza ubumuntu buturutse ku Mana kuko nabo imbaraga zayo arizo zabahaye kumva ko badakwiriye kurebera abantu bapfa bareba.

Ati “Biterwa n’umutima wa muntu, Inyigisho duhora duhabwa ni ukumenya mugenzi wacu, ni ukutagira nabi, ni ugushaka amahoro aho gushaka inabi. Imbaraga ntizituruka muri twe, twazihawe n’Imana, niyo yadutinyuraga tukumva ko umuntu adakwiriye gupfa turebera.”

Abarokokeye muri St François d’Assise Shangi bemeza ko Soeur Kamuzima na bagenzi be ari intwari zikwiriye gushimirwa kuko babarokoye mu gihe kigoye maze abarenga 130 bari bahahungiye.

Mu kuzirikana ubutwari bwe, abarokokeye i Shangi baremeye Marciana Kamuzima (Soeur Magdalena) bamuha inka ebyiri. Iki gikorwa cyahuriranye n’ibirori byo kwizihiza ku nshuro ya 26 Umunsi w’Intwari ku wa 1 Gashyantare 2020.

Muri Gicurasi 2019, nibwo Soeur Kamuzima Marciana yaherukaga gushyikirizwa ishimwe yagenewe n’Umuryango Unity Club Intwararumuri n’inka y’Ingororano nk’Umurinzi w’Igihango ku rwego rw’Igihugu.

Soeur Kamuzima uvuka mu Karere ka Nyamasheke ari naho akorera ubutumwa i Shangi. Yagaragaje ubutwari mu gihe cya Jenoside yakorewe Abatutsi kandi na we yarahigwaga.

Yareze imfubyi nyinshi atarobanuye agamije kuzifasha mu myigire, azigisha umuco wo kubabarira no kwimakaza amahoro. Icyo kigo yari akuriye harokokeye abantu basaga 100 kandi ntibigeze bicwa n’inzara cyangwa inyota.

Kamuzima yagize kandi uruhare mu kuvura inkomere nyuma y’igitero cy’Interahamwe yitwa Yusouf Munyakazi cyasize inkomere nyinshi i Shangi.

Kamuzima Marciana mu 2016 yahembwe nk'umurinzi w’igihango kubera ibikorwa by’indashyikirwa yakoze byo kurokora Abatutsi
Kamuzima Marciana yahawe inka ebyiri z'ishimwe n'abo yarokoye
Soeur Kamuzima Marciana na bamwe mu barokokeye i Shangi n'abayobozi b'Akarere ka Nyamasheke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .