00:00:00 IGIHE NETWORK KN KINYARWANDA EN ENGLISH FR FRANCAIS

Ni umunyarugwiro: Amabyiruka ya Miss Uwimana Jeannette ufite ubumuga bwo kutumva no kutavuga (Video)

Yanditswe na Prudence Kwizera
Kuya 3 April 2022 saa 07:40
Yasuwe :

Ni imfura mu muryango w’abana barindwi, akunda abantu akagira urugwiro kuko nubwo atabasha kumva no kuvuga, aho ari nta rungu kandi akunda gusenga.

Mukabutera Collette ubyara Miss Uwimana Jeannette yaganiriye na IGIHE ahishura byinshi ku mukobwa we uherutse kwegukana ikamba rya Miss Innovation mu marushanwa ya Nyampinga w’u Rwanda 2022.

Tariki ya 13 Mutarama 1996 nibwo Miss Jeanette Uwimana yaboneye izuba mu Kagari ka Cyerezo mu Murenge wa Mukingo mu Karere ka Nyanza.

Kuva mu 2009 bagiye gutura mu Mujyi wa Nyanza mu Mudugudu wa Gakenyeri A, mu Kagari ka Nyanza mu Murenge wa Busasamana. Nyina ni Mukabutera Collette naho se ni Gasana Sylidion [yitabye Imana mu 2016].

Mukabutera Collette asobanura ko nyuma y’icyumweru kimwe amubyaye yaketse ko afite ubumuga bwo kutumva atangira kubigenzura.

Ati “Nari ndi ku kiriri noneho numva ikintu kikubise hasi njya kureba, nsohotse ndibeshya nkubita urugi cyane kandi umwana yari atangiye kwibikira (gusinzira) nsubiza amaso inyuma ngo ndebe ko umwana nta kibazo agize mbona arakomeje arasinziriye. Nahise mbona ko ashobora kuba afite ikibazo, noneho ni bwo twatangiye kureba amadebe tugakomanga ngo turebe ko yikanga tubona akomeje kwisinzirira, ni cyo cyatubwiye ko atumva.”

Bihutiye kumujyana kwa muganga kumuvuza bakomeza no kumwitaho, agize imyaka ine y’amavuko bamujyana kwiga mu Kigo cy’Aba-Frères giherereye i Ngoma gisanzwe cyigamo abana bafite ubumuga bwo kutumva no kutavuga.

Muri iyo myaka ine baramureze yigishwa n’ururimi rw’amarenga akajya yerekeza mu biruhuko nk’uko bisanzwe. Nyuma y’aho yatangiye kwiga mu mashuri abanza i Ngoma mu Karere ka Huye ariko agataha muri cya Kigo cy’Aba-Frères.

Amaze kuhiga imyaka ine yakomereje ku Kigo cya Saint Joseph i Nyanza ahamara umwaka umwe, asubira i Ngoma ahasoreza amashuri abanza.

Amashuri yisumbuye yayatangiriye i Nyamirambo mu Mujyi wa Kigali mu ishuri ryigamo abana bafite ubumuga bwo kutumva no kutavuga, ahamara umwaka umwe.

Yahise ajya kwiga mu Kigo cyita ku bafite Ubumuga cya HVP Gatagara i Nyanza aharangiriza icyiciro cya mbere cy’amashuri yisumbuye, yoherezwa gukomereza icyiciro cya kabiri mu ishami ryacyo riri mu Karere ka Huye mu Ishami ry’Imibare, Mudasobwa n’Ubukungu.

Yakuze ari umwana udasanzwe…

Mukabutera Collette yabwiye IGIHE ko umukobwa we yakuze akunda kubyina bya Kinyarwanda kugeza n’ubu mu rugo iwabo ubwo habaga ibirori, yarabyinaga agasabana n’abandi.

Akomeza avuga ko ubwo umukobwa we yigaga mu cyiciro cya kabiri cy’amashuri yisumbuye ari bwo yamubonyemo impano yo kwitabira amarushanwa y’ubwiza kuko babyinnye, bakina n’imikino yo kwiyerekana abona yitwaye neza.

Yagize ati “Njyewe kuva nabona Jeannette nabonaga ari umwana udasanzwe ushaka kuzakora ibidasanzwe n’ubu kandi mbona bizakomeza.”

Mu 2019 ni bwo yabwiye nyina ko ashaka kuzitabira amarushanwa ya Nyampinga w’u Rwanda atangira kubitegura ndetse yiyandikisha mu 2022.

Umuryango we wakomeje kumushyigikira no kumubwira amagambo amutera umurava, yitabira amarushanwa atsinda ku rwego rw’Intara y’Amajyepfo ndetse atoranywa no mu bakobwa 20 berekeje mu mwiherero nyuma yo guhiga abandi 70 bari bahanganye mu gihugu hose.

Muri ayo marushanwa yose Miss Uwimana yari afite umuntu ugomba kumusemurira aho yajyaga hose. Ku munsi wa nyuma w’irushanwa rya Nyampinga w’u Rwanda 2022 Akanama Nkemurampaka katangaje ko kasanze umushinga we wo korora ingurube ari wo uhiga iy’abandi bose bahanganye maze yambikwa ikamba rya Miss Innovation 2022.

Umubyeyi we avuga ko ikamba Miss Uwimana yambitswe baryakiriye neza kandi n’inyigisho bahawe mu mwiherero yazikunze kuko hari byinshi zamwigishije.

Ati “Ikintu mbona byamufashije ni ukutita ku bantu hanze babashuka, babakanguye mu bwenge cyane. Na we yambwiye ko bize ibintu byiza byinshi mu biganiro bagiye bahabwa n’abayobozi batandukanye bagiye babasura kandi nanjye nagiye mbikurikira kuri YouTube nkabona ni byiza cyane.”

Yavuze ko bazakomeza kumushyigikira kugira ngo ashyire mu bikorwa umushinga we wo kwita ku bana bafite ubumuga bwo kutumva no kutavuga no kubakorera ubuvugizi.

Miss Uwimana Jeannette yabwiye IGIHE ko ikamba yambitswe yaryishimiye kandi yiteguye gushyira mu bikorwa umushinga we.

Yashimiye "abantu bose bamubaye hafi by’umwihariko umuryango we, abizeza ko atazabatenguha."

Mu buzima busanzwe akunda kunywa amata no kurya umuceri n’ifiriti. Mu bijyanye no kwambara akunda kwambara ipantalo cyangwa ikanzu.

Umuntu w’icyitegererezo mu buzima bwe ni nyina kuko amutoza imico myiza. Ikintu gikomeye cyamushimishije mu buzima ni ukwitabira irushanwa rya Nyampinga w’u Rwanda akabasha no kwambikwa ikamba naho icyamubabaje ni ukubura se akiri muto.

Yagiriye inama abantu bafite ubumuga yo kwitinyuka kuko bashoboye, asaba Leta y’u Rwanda n’abafatanyabikorwa bayo gukomeza kubashyigikira no kubakuriraho inzitizi zibangamira iterambere ryabo.

Umuturanyi wabo witwa Iradukunda Rosine yabwiye IGIHE ko bishimiye uburyo Miss Uwimana yitinyutse akajya mu marushanwa ya Nyampinga w’u Rwanda kandi agatahana intsinzi.

Yavuze ko ari ikintu cyiza kizatinyura n’abandi bakobwa by’umwihariko abafite ubumuga bakumva ko bashoboye.

Uwimana yegukanye ikamba rya Nyampinga ufite umushinga udasanzwe [Miss Innovation] aho afite umushinga wo Korora ingurube uzaterwa inkunga na Banki ya Kigali.

Uyu mukobwa yavuze ko amafaranga azakura mu mushinga we azayashora mu bworozi bw’ingurube, ariko akanashinga gahoro restaurant cyangwa Hotel izamwitirirwa.

Kuva mu 2009 bagiye gutura mu Mujyi wa Nyanza mu Murenge wa Busasamana
Miss Uwimana yabwiye IGIHE ko umuntu w'icyitegererezo kuri we ari nyina kuko amutoza imico myiza
Mukabutera Collette yatewe ishema n'ikamba umukobwa we yegukanye
Mukabutera Collette ubyara Miss Uwimana Jeannette yaganiriye na IGIHE ahishura byinshi ku mukobwa we
Mukabutera Collette n'umwana we Miss Uwimana bari bafite akanyamuneza
Miss Uwimana Jeannette afite ishyaka ryo gushyira mu bikorwa umushinga we w'ubworozi bw'ingurube
Miss Uwimana azwiho guhora yishimye
Akigera mu rugo yasanze bamuteguriye ibirori byo kwishimira ikamba yegukanye
Ikamba yegukanye ryishimiwe n'abo mu muryango we
Abavandimwe ba Miss Uwimana n'inshuti bishimiye ikamba yegukanye
Miss Uwimana Jeannette ni imfura mu muryango w'abana barindwi
Uwimana Jeannette yakuranye akanyamuneza, na n'ubu ntarahinduka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .