00:00:00 IGIHE NETWORK KN KINYARWANDA EN ENGLISH FR FRANCAIS

Kagirimpundu uri mu bashinze Uzuri K&Y yagaragaye ku byapa by’i New York

Yanditswe na Iradukunda Serge
Kuya 9 June 2022 saa 05:35
Yasuwe :

Kevine Kagirimpundu uri mu bashinze Uruganda rukora inkweto mu Rwanda rwa Uzuri K&Y yagaragaye ku byapa byo Mujyi wa New York muri Leta Zunze Ubumwe za Amerika ahazwi nka ‘Times Square’.

Times Square ni agace gaherereye mu Mujyi wa New York rwagati gakorerwamo ibikorwa by’ubucuruzi n’ubukerarugendo. Inyubako zaho ziriho ibyapa (bose babireba) binyuzwaho amashusho yamamaza ibikorwa bitandukanye.

Ni ahantu hazwi nka Nasdaq Tower ku buryo umuntu wese usuye New York aba ari itegeko kuhagera bitabaye ibyo ntacyo waba warabonye. Bibarwa ko ku mwaka, hasurwa n’abantu barenga miliyoni 41. Ibyapa byaho byamamazwaho ibintu bigezweho, yaba ibicuruzwa, indirimbo nshya z’abahanzi, ibitaramo n’ibindi. Ni hamwe mu hantu hamaze kwandika izina ku Isi ku buryo uwo igikorwa cye cyahagaragaye, aba yateye indi ntambwe ikomeye mu kukimenyekanisha.

Kwamamaza ku byapa bya Nasdaq ntabwo ari ibintu byoroshye kuko ku isaha imwe bisaba kwishyura 250$ gusa bigenda bitandukana bitewe n’uburebure bw’icyapa kuko hari nk’ibireshya na metero 36 bikunze kwiharirwa na sosiyete zikomeye mu bucuruzi bw’amafaranga yifashisha ikoranabuhanga.

Kuri uyu wa 9 Kamena 2022, Abanyarwanda bashimishijwe no kubona ibi byapa binyuzwaho Umunyarwanda mugenzi wabo.

Uyu nta wundi ni Kagirimpundu Kevine, umwe mu bakobwa babiri batangije uruganda rukora inkweto rwa Uzuri K&Y.

Kagirimpundu Kevine yanyujijwe kuri izi bose babireba hamwe n’abandi bantu 12 barangizanyije amasomo agenerwa ba rwiyemezamirimo binyuze muri gahunda ya ‘Milestone Makers program’.

Iyi gahunda itangirwamo amasomo n’ubujyanama mu by’ubucuruzi bimara amezi atatu. Yitabirwa na ba rwiyemezamirimo baturutse hirya no hino. Itegurwa n’Umuryango ‘Nasdaq Entrepreneurial Center’ ukorera muri Silicon Valley muri Leta Zunze Ubumwe za Amerika.

Uyu muryango udaharanira inyungu watangijwe mu 2014 bigizwemo uruhare n’Isoko ry’Imari n’Imigabane ryo muri New York rya ‘Nasdaq’ ari naryo nyiri ziriya bose babireba aba ba rwiyemezamirimo barimo Kagirimpundu banyujijweho.

Nasdaq ni ryo soko ry’imari n’imigabane riza ku mwanya wa kabiri ku Isi mu kugira ibikorwa byagutse nyuma ya New York Stock Exchange kuko mu 2021 ryabarirwaga agaciro k’arenga miliyari ibihumbi 19$.

Iri soko ribarizwaho imigabane y’ibigo bikomeye mu by’ikoranabuhanga nka Apple, Microsoft, Amazon, Google na Facebook.

Mu kiganiro na IGIHE, Kagirimpundu Kevine, yavuze ko kuba yanyuze kuri bose babireba za New York Times Square ari iby’agaciro kuri we na Uzuri K&Y.

Ati “Kuri Uzuri K&Y bivuze ko twatangiye kugera ku rwego mpuzamahanga. Kuri njye ndabyishimiye kuko nakoze ntaruhuka. Ni amasomo amara igihe gito ariko asaba gukora amasaha menshi, amanywa n’ijoro, ni ukuri ntewe ishema n’ibyo nabashije kugeraho ntabwo byari byoroshye.”

Kagirimpundu yavuze ko ibyo yagezeho ari ikimenyetso cy’uko ba rwiyemezamirimo b’Abanyarwanda bagera kuri byinshi.

Ati “Bigaragaza ko dushobora gukora ibintu byinshi bidasanzwe, Isi yose ikabibona, ikabimenya ndetse ikabiha n’agaciro ndetse bikagira n’ingaruka nziza ku Banyarwanda.”

Inkweto za Uzuri K&Y ni zimwe mu zimaze kwigarurira imitima ya benshi mu Rwanda biganjemo ab’igitsina gore.

Uru ruganda kandi rushimirwa uruhare rugira mu kurengera ibidukikije binyuze mu kubyaza umusaruro ibikoresho bishobora kwangiza ibidukikije birimo amapine.

Uzuri K&Y kandi iri mu bigo biherutse gutsinda mu irushanwa ryitwa ‘Fashion Frontier Challenge’ ritegurwa n’Inzu ikomeye ku Isi mu gutunganya imideli ya Tommy Hilfiger.

Uzuri K&Y ni sosiyete yo mu Rwanda ikora inkweto. Yashinzwe na Kagirimpundu Kevine na Shimwe Ysolde aho ubu imaze imyaka umunani ikora inkweto.

Mu gihe bamaze bakora, bashyize ku isoko inkweto zirenga ibihumbi 40, kandi bafite amashami atatu mu Mujyi wa Kigali aho n’uruganda rwabo rubarizwa.

Kagirimpundu uri mu bashinze Uzuri K&Y yagaragaye ku byapa bya ‘New York Times Square'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .