Imyaka 25 mu bigo bikomeye! Ingabire Nicole yahaye impanuro abifuza kuba abakozi b’indashyikirwa

Yanditswe na Ishimwe Israel
Kuya 7 Mutarama 2020 saa 03:43
Yasuwe :
0 0

Ingabire Nicole Munyangabe ari mu Banyarwanda bamaze kugira amahirwe yo gukora muri hoteli ebyiri mu zifite inyenyeri eshanu mu Rwanda ashinzwe gukurikirana no kwita ku bakozi.

Ingabire afite ubunararibonye bw’imyaka 25 mu kazi kuko yagatangiye afite 18 y’amavuko.

Uyu mubyeyi w’abana batanu ni Umuyobozi ushinzwe Abakozi muri Kigali Marriott Hotel, umwanya yanahozeho muri Radisson Blu Hotel & Kigali Convention Centre. Ibi bituma yiharira agahigo ko kuba Umunyarwandakazi washinzwe umwanya mwiza muri hoteli ebyiri ziri ku rwego rw’inyenyeri eshanu.

Ingabire yavukiye i Goma muri Repubulika Iharanira Demokarasi ya Congo, aho yigiye amashuri abanza n’ayisumbuye. Yize ibijyanye n’Ubuvanganzo yibanda kuri Filozofiya n’Ikilatini.

Afite Impamyabumenyi y’Icyiciro cya Kabiri cya Kaminuza mu by’Amategeko yakuye muri Kaminuza yigenga ya Kigali (ULK) mu 2008. Aritegura gusoza amasomo ya Masters muri Kaminuza ya AUCA mu bijyanye n’Imiyoborere mu Bucuruzi no gucunga abakozi (Business Administration with a focus in Human Resources).

Kuva mu myaka 25 ishize yanyuze mu biganza by’abakoresha icyenda kugera muri Kigali Marriott Hotel aho abarizwa kuva ku wa 10 Ukuboza 2018.

Yakandagiye muri iyi hoteli nyuma y’imyaka ibiri n’amezi icyenda yamaze muri Radisson Blu ari naho yinjiriye bwa mbere mu mwuga w’amahoteli n’ubukerarugendo, akanashyiraho Ishami rishinzwe abakozi kuko ari mu bakozi batangiranye na Radisson Blu Hotel mu Rwanda.

Mu mirimo yakoze yanyuze mu bigo byigenga n’ibya leta ahabwa inshingano zitandukanye.

Ingabire yabwiye IGIHE ko ataragera aho yifuza kuko hari intambwe ashaka gutera mu bijyanye n’ubukerarugendo n’amahoteli. Yanavuze byimbitse ku rugendo rwe anatanga inama mu birebana n’ubukerarugendo n’abashaka kubwinjiramo byimbitse.

IGIHE: Wadusangiza ku rugendo rwawe nk’umunyamwuga?

Ingabire: Nabonye akazi kanjye ka mbere gahoraho muri Ocir Thé, nakoraga nk’Umunyamabanga mu Ishami rishinzwe abakozi. Nyuma y’amezi atandatu nimukiye mu cyahoze ari Electrogaz nshinzwe ahabikwa ibikoresho by’amashanyarazi n’iby’amazi.

Muri Eletrogaz nakoze mu myanya itandukanye irimo, ushinzwe Ububiko bw’ibikoresho by’amashanyarazi n’iby’amazi, uw’ubunyamabanga mu mashami atandukanye nk’iry’imari, mu buyobozi bukuru, mu ishami rishinzwe abakozi, ushinzwe ububiko bw’amakuru (Archivist), nkora no muri serivisi ishinzwe kwishyuza ibirarane. Nakoze n’ahandi hatandukanye nka Rwandamotor, Global Fund, UNICEF, Radisson Blu &Kigali Convention Centre na Kigali Marriott Hotel.

IGIHE: Ni ryari wisanze neza mu kuyobora abakozi nk’inshingano za buri munsi?

Ingabire: Mu 2005 ninjiye muri Rwandamotor, aho niho nahawe kuyobora abakozi bwa mbere. Nahakoze imyaka umunani n’igice, mpigira akazi ko kuyobora abakozi, kuko nabaga njyenyine byatumye menya inshingano zose zikorwa muri iryo shami.

Nahavuye njya muri Plan International, mbere yo kwerekeza muri Radisson Blu & Kigali Convention Centre mu 2016. Icyo gihe nibwo ninjiye mu ishoramari ry’ubukerarugendo n’amahoteli.

Ingabire Nicole Munyangabe yavuze ko kwihangana no gukorana neza n’abandi ari izingiro ry’umusaruro w’ibyo umuntu ashobora kugeraho mu buzima

IGIHE: Bwa mbere utangira inshingano nk’ushinzwe abakozi muri hoteli y’inyenyeri eshanu, wabyifashemo ute?

Ingabire: Ikintu cyangoye cyane cyari ukwinjira mu mwuga mushya kandi hoteli itarafungura (pre-opening). Abakozi bari benshi, hari n’ibintu byinshi bigomba gushyirwaho. Burya ikintu cyose bisaba kugikorera mu gihe cyacyo no kucyubahiriza uko gikwiye gukorwa, buhoro buhoro umuntu agera ku ntego yihaye, cyangwa akabasha gutunganya ibyo asabwa.

IGIHE: Byagenze bite ngo winjire muri Kigali Marriott Hotel?
Ingabire: Ninjiye muri Marriott nk’Umuyobozi Mukuru ushinzwe abakozi (Senior Human Resources Manager), nyuma y’amezi atanu mpambwa inshingano zo kuba Umuyobozi w’Ishami rishinzwe abakozi (Director of Human Resources). Nahageze nyuma yo gukora muri Radison Blu & KCC. Mfite uburambe mu kazi bw’imyaka 25 ariko mu micungire y’abakozi mazemo imyaka 15.

IGIHE: Ni izihe nyungu wakuye mu gukorera muri hoteli ebyiri zikomeye mu Rwanda?

Ingabire: Gukora muri hoteli z’inyenyeri eshanu bigufungurira amarembo kurushaho, bikwigisha byinshi. Ni ikintu gikomeye kuko ubu ubunararibonye bwariyongereye, cyane ko muri Kigali Marriott Hotel kimwe mu byitabwaho ari uguhugura abakozi bihoraho. Aho umukozi afatwa nk’umwe mu bafatanyabikorwa, bigatuma arushaho gutanga serivisi nziza, akiyubaka akanahabwa n’ubumenyi.

IGIHE: Witwara ute nk’umuhuza w’umukoresha n’umukozi?

Ingabire: Ushinzwe imicungire y’abakozi aba agomba kureba impande ebyiri, kandi akora ibishoboka byose ntagire urwo abogamiraho, buri ruhande rwose rukanyurwa na serivisi rubona. Abakozi ugerageza kugenzura amarangamutima yabo, mbere yo kureba ikibazo cy’umuntu wishyira mu mwanya we, ukanishyira mu w’umushoramari, aho ubikora bikwiye nubwo utashimisha bose.

Si inshingano zoroshye kuko kugenzura amarangamutima bigoye ariko nicyo uba warahamagariwe. Iyo wakoze neza urabimenya, ni yo byagenze nabi urabimenya. Ibi bigufasha gufata ibyemezo bikwiye kuko uba washyize amarangamutima ku ruhande.

IGIHE: Nyuma y’akazi umwanya wanyu munini muwuharira iki?

Ingabire: Iyo namaze kwita ku muryango wanjye, nshobora kwandika iyo mfite umwanya. Mfite ibitabo bibiri ku isoko n’ibindi umunani ntarasohora. Kimwe cyagiye hanze mu 2012 gishingiye ku nkuru ndende, cyitwa “Le Bonheur Retrouvé” kivuga ku busesenguzi bw’imitekerereze ya gihanga n’urukundo (Psychological analysis & Love).

Numvaga kwandika ari ibintu bikomeye cyane, ariko nkabikunda. Umunsi umwe naranditse neretse musaza wanjye ambwira ko ari byiza ndakomeza. Hashize amezi atanu igitabo cyanjye kijya mu nzu y’icapiro yitwa Multicom Publishing House iracyemera, iragitangaza. Mu 2018, AfricAvenir Editions yo muri Cameroun yaragisomye nayo iragikunda irakigura yongera kugitangaza bwa kabiri.

Igitabo cya kabiri nanditse ni icy’abana cyitwa “Urukwavu Rwanjye Rwiza” cyashyizwe ku isoko na School Books Distributors (SBD) mu 2016, kigamije kwigisha abana bato kumenya amezi cumi n’abiri mu rurimi rw’Ikinyarwanda.

Nakuze nkunda gusoma no kwandika ndetse nahatiraga ababyeyi banjye kuncira imigani. Urwo rukundo rwashibutsemo inganzo yo kwandika ibitabo iyo mbishoboye.

IGIHE: Inama mutanga ku bashaka kwinjira mu bijyanye n’ubukerarugendo?

Ingabire: Akazi ko gukora muri hoteli ni keza kuko iyo wakiriye umuntu avuye kure umutima wawe unezezwa no kuzirikana ko hari uwo waremeye umunsi. Bikongera bikakunezeza iyo ubonye yasize ibyo mu rugo akaza kugira icyo afata muri hoteli.

IGIHE: Mufite ikihe cyerekezo bijyanye n’imirimo mukora?

Ingabire: Ngerageza gutekereza no kureba kure ku buryo numva ntaho ndagera. Ntekereza ko nava hano nkagera ku rundi rwego ku buryo mu zabukuru nzaba narabonye umwanya ushimishije haba muri Kigali Marriott Hotel cyangwa se mu zindi hoteli za Marriott.

Kwihangana no gukorana neza n’abandi ni izingiro ry’umusaruro w’ibyo nagezeho mu myaka yose yatambutse kandi nizera ko buri wese yabigeraho akoze atikoresheje.

Umuyobozi Ushinzwe Ishami ry’Abakozi muri Kigali Marriott Hotel, Nicole Ingabire Munyangabe ufite ubunararibonye bw'imyaka 25 yakuye mu nshingano zitandukanye yahaye impanuro abifuza kuba abakozi b’indashyikirwa

Amafoto: Muhizi Serge

Video: Hakizimana Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .