Amatariki y’ubukwe bw’uyu mukinnyi yagiye ahagaragara ku wa Mbere, ariko ntiyashatse kugira byinshi abuvugaho ndetse yirinda gutangaza amazina yombi y’uwo bazarushingana.

Amakuru IGIHE yamenye ni uko umukobwa Usengimana Danny yari amaze igihe akundana na we batandukanye, agakundana n’undi bagiye kurushinga.

Usengimana w’imyaka 24 y’amavuko, yatangiriye umupira w’amaguru mu makipe y’abato ya Gasabo United na SEC Academy. Mu mwaka w’imikino wa 2014/15 yagiye mu Isonga FC, ayikinira umwaka umwe, aho yigaragaje ahita agurwa na Police FC.

Usengimana yahiriwe n’umwaka wa mbere w’imikino aba umukinnyi watsinze ibitego byinshi muri Shampiyona ya 2015/16 ndetse no muri shampiyona ya 2016/17.

Nyuma yo kugira ibihe byiza muri Police FC, uyu rutahizamu wari waratangiye guhamagarwa mu ikipe y’Igihugu guhera muri CHAN 2016, yabengutswe na Singida United yo muri Tanzania, ayikinira umwaka umwe.

Muri Kanama 2018, Usengimana Danny yerekeje muri Tersana Sporting Club yo mu Misiri, ariko ntiyahatinze kuko muri Gashyantare 2019 yerekanywe nk’umukinnyi mushya wa APR FC akinira kugeza ubu. Mu mwaka ushize w’imikino yatwaranye nayo igikombe cya shampiyona, ayitsindira ibitego 11.

Usengimana Danny yatangaje ko ubukwe bwe buzaba mu kwezi gutaha

Usengimana Danny amaze umwaka umwe n'igice akinira APR FC, yatwaranye nayo igikombe cya Shampiyona n'icy'Ubutwari 2020