Kamembe: Gukundirana, amasano n’icyenewabo bituma Magendu n’urumogi bihishirwa

Yanditswe na

Thamimu Hakizimana

Kuya 1 Gashyantare 2014 saa 08:30
Yasuwe :
0 0

Bamwe mu baturage batuye akarere ka Rusizi mu murenge wa Kamembe mu kagari ka Kamashange bavuga ko kuba benshi mu baturage batuye Kamembe cyane cyane ahitwa Ku Ryambere, baba hafi ya bose bafitanye isano rya bugufi hagati yabo, ari kimwe mu bituma ibiyobyabwenge bitapfa kuhacika kuko baba bahishirana. Ubwo IGIHE yaganiraga n’abatuye akagari ka Kamashange bavugaga ko kuba abaturage benshi bahatuye bagiye bafitanye amasano, ari kimwe mu bituma ahitwa ku Ryambere hakomeza kuba indiri (...)

Bamwe mu baturage batuye akarere ka Rusizi mu murenge wa Kamembe mu kagari ka Kamashange bavuga ko kuba benshi mu baturage batuye Kamembe cyane cyane ahitwa Ku Ryambere, baba hafi ya bose bafitanye isano rya bugufi hagati yabo, ari kimwe mu bituma ibiyobyabwenge bitapfa kuhacika kuko baba bahishirana.

Umuhanda wo ku Ryambere mu kagari ka Kamashege i Kamembe

Ubwo IGIHE yaganiraga n’abatuye akagari ka Kamashange bavugaga ko kuba abaturage benshi bahatuye bagiye bafitanye amasano, ari kimwe mu bituma ahitwa ku Ryambere hakomeza kuba indiri y’abacuruza ibiyobyabwenge ndetse n’ababinywa, bitewe nuko ntawe ushobora gutungira ubuyobozi agatoki ababicuruza, cyangwa se ngo arange uwinjije magendu y’ibitenge n’amamesa mu gihe yaba azi ko agiye gushyirishamo mwene wabo basangiye amaraso cyangwa se atanaba mwene wabo akaba ari mwene wabo w’uwo bashakanye.

Amazina y’abaturage akoreshwa muri iyi nkuru yahinduwe kuko bamwe mu bemeye gutanga amakuru batifuje ko imyirondoro yabo ishyirwa ahagaragara ku bw’impamvu bita iz’umutekano wabo.

Musafiri utuye ahitwa kurya Kabiri cyangwa muri “Cité”, avuga ko muri Kamembe, icyitwa urumogi cyabaye nk’amazi yo kunywa, cyane cyane ahitwa kurya Mbere, kuko ngo n’ababicuruza bose baba bazwi ariko ntibabe bapfa gufatwa.

Yagize ati: “Aha icyo twavuga ni uko hari ruswa ikaze cyane, kuko ntitwumva uburyo inzu zigera no ku 10 zonyine zegeranye, ziba zicuruza urumogi ariko ntihagirwe ufatwa ngo ahanwe, kandi n’iyo ari umuntu ufite amafaranga menshi afungwa iminsi mike nk’amezi 6 gusa agahita arekurwa, mu gihe ufashwe arunywa cyangwa afite akabule kamwe ahita amanurwa kandi agakatirwa igihe kirerekire kuko nta mafaranga aba afite, kenshi unasanga ari urubyiruko ruhafungirwa mu gihe ababibacuruza bo baba bidegembya uko bishakiye. Ubwo se umuntu yabyita iki?”

Uzamushaka, umugore ufite abana bane utuye ku rya mbere, nawe avuga ko ngo iyaba byabaga bishoboka hakajya hakorwa umukwabo cyane cyane ku rya Mbere ngo byabafasha, kuko ari agace kazwi na buri muntu wese ko ariko karangwamo abacuruzi b’ibiyobyabwengwe benshi ndetse n’ababinywa.

Yagize ati “Ubuyobozi bwa Polisi bugiye bukora umukwabo, nta muntu n’umwe bwabibwiye byajya biba byiza cyane kuko hajya hafatwa abantu benshi. Naho kubera ko abantu benshi aha baba bafitanye isano n’iyo umuyobozi amenye ko hazaba umukwabo aburira umuvandimwe we mbere, bigatuma iki kibazo kitarwanywa nk’uko gikwiye.”

Uyu mugore yakomeje asaba itangazamakuru kuzabavugira iki kibazo kuko kurerera abana ahantu nk’aha bituma nta burere bwiza bakurana uretse kwishora mu biyobyabwenge bitewe n’uko bakura babona uko binywebwa mu maso yabo ndetse n’uko bicuruzwa.

Umuyobozi w’Akarere ka Rusizi, Oscar Nzeyimana, we avuga ko ibyo abaturage bavuga ataribyo kuko bagerageza kubirwanya ndetse n’ababifatanywe ko bahanwa, naho ngo kuba benshi batuye mu Kagari ka Kamashange bafitanye isano byo ntago yari abizi aretse ko kuri we abaturanyi bose azi ko baba bafitanye isano.

Yagize ati: “Nta kidasanzwe ku bivugwa ko muri Kamashange habaye indiri y’ibiyobyabwenge, cyangwa byabaye icyorezo, kuko tugerageza kubirwanya kandi n’iyo tumenye amakuru yose y’abitwara nabi n’ashobora guhungabanya umutekano turabahana cyane, kandi tunakora ubukangurambaga tubigisha uburyo bakwiye kubyirinda ndetse tugahana n’ababonetse bose bagurisha ibyo biyobyabwenge cyangwa ababinywa.”

Meya wa Rusisi yakomeje ahakana ibyo abaturage bamwe bavuga batunga agatoki ko hari n’abayobozi babigurisha cyangwa kubera isano rya hafi baba bafitanye n’ababigurisha bakanga kubata muri yombi.

Ati: “N’ubwo abaturage bavuga ko hari abayobozi b’inzego z’ibanze bacuruza ibiyobyabwenge cyangwa bahishira ababicuruza, nti tubizi nta n’abo twari twumva cyangwa ngo tubone.”

Akarusho ka Kamembe cyane cyane kuri iyi muhanda yitirirwa nimero zayo, ni uko ngo hari igihe usanga nk’umugabo umwe afite nk’abagore bane, buri wese atuye ku muhanda umwe umwe, ngo bikaba aribyo bituma usanga isano ryabo ridacika bunze ubumwe cyane muri byose ku buryo n’iyo byaba bibi bahishirana.

Ikindi ni uko haba ku Ryambere kugeza ku Ryanyuma hose iyo uhageze usanga bivugira ururimi rw’Igiswayile cyane, ku buryo ushobora ku gira ngo abahatuye si Abanyarwanda..

Ku Ryambere mu kagari ka Kamashenge aho bakunze kwita muri Cité hazwiho kugurishirizwa no kunyobwa urumogi rwinshi muri Kamembe
Ahantu abacuruza urumogi mu kagari ka Kamashenge bakunda kuba bahagaze kuri Kaburimbo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza