Zimwe mu nama z’ingenzi zagufasha kubaho wishimye

Yanditswe na Iradukunda Serge
Kuya 16 Ugushyingo 2019 saa 10:18
Yasuwe :
0 0

Umwanditsi akaba na nyiri Lifecoachspotter.com, urubuga rutanga inama z’ubuzima, Tom Casano, yashyize hanze inama zafasha umuntu kubaho yishimye n’ubwo yaba adafite akazi keza, inzu nziza n’imodoka y’igiciro.

“Ibyishimo ni igisobanuro n’impamvu y’ubuzima, nibyo imigambi yose n’intumbero mu kubaho kwa muntu.” Aya magambo yavuzwe n’Umugiriki w’umuhanga mu by’imitekerereze w’ibihe byose Aristotle mu myaka 2000 ishize.

N’ubwo hashize igihe kinini abivuze, bigaragara ko ibyishimo mu buzima bw’umuntu bigifite ubusobanuro bunini ndetse ni impamvu y’ibyo abantu bakora byose byaba ibibi n’ibyiza.

Hifashishijwe inyandiko y’Inzobere mu mibereho ya muntu n’Umutoza mu bijyanye no kubaho, Tom Casano, IGIHE yateguye inama icyenda zagufasha kubaho wishimye.

-  Ha agaciro ibyiza: Kugira ngo ugere ku byishimo by’igihe kirekire, ni byiza ko utoza ubwonko bwawe kudatekereza ikibi ahubwo ugahora ugambirira icyiza.

Abahanga mu by’imitekerereze bavuga ko iyo ufashe iminota ibiri ugatekereza ku byiza wishimira mu buzima bwawe, ukabikora ubugira gatatu ku munsi, mu gihe cy’iminsi 45 ubwonko bwawe buba bumaze kubifata nk’umuco bityo ntube ugiha umwanya munini ibitagenda.

-  Iga gukoresha neza amafaranga: Hari benshi bumva ko gutunga amafaranga menshi ari byo bizana ibyishimo, nyamara ahubwo uko uyakoresha ari wo musingi wo kubaho ubuzima burangwa no kwishima.

Nta shiti ko ibituma abantu batishima muri iyi minsi, ibyinshi bishingiye ku bibazo by’amafaranga bituruka ku kugira menshi, kugira make no kuyakoresha nabi.

Wagira amafaranga menshi cyangwa make ushobora kwishima igihe uzi kuyakoresha neza ndetse ugafata n’umwanya wo kwishimisha igihe hari icyo wagezeho.

-  Fasha abandi: Rimwe na rimwe nyuma yo kugera kuri byinshi hari igihe mu mutima usigara wumva umeze nk’uwakoze ubusa kubera ko utagize icyo ukora mu guhimdura ubuzima bw’abandi.

Gufasha abandi bituma wiyumva neza kuko uba ubona ko hari icyo umariye abandi, ibi bikakubera isoko y’ibyishimo.

-  Iga kunyurwa: Nusubiza amaso inyuma urasanga hari byinshi mu buzima bwawe byagakwiye kuba bigutera ishema nko kuba ubasha kubona aho uryama hari abatahafite, kubona ibyo kurya hari ababibuze no kuba ugihumeka hari abavuye mu bugingo. Si byiza guhumwa amaso n’umuco mubi wo kutanyurwa kuko wumva ko n’ubundi wari ubikwiriye.

-  Iga kubabarira kandi wibagirwe: Kurwara inzika bizakuvuna cyane ndetse no kurusha uwo uyirwariye, kumenya ko nta kosa rinini ritari iryo kubabarirwa bizagufasha kubona imbaraga zo kubabarira n’abaguhemukiye cyane.

Igihe wateye intambwe yo kubabarira ni byiza ko wibagirwa, ntuhore ucyurira uwaguhemukiye kandi umubwira ko wamubabariye.

-  Ba uwo uri we: Nk’uko Steve Jobs washinze uruganda rwa Apple yabivuze kumenya uwo uri we kandi ukabaho nkawe bizana ikinyuranyo mu buzima bwawe kuko ibyo ukora uba utabyihingamo ndetse ntuhangayikire gutekereza uko abantu babifata baramutse bamenye uwo uri we bya nyabyo.

Yagize ati “Igihe cyawe kirabaze ku bw’ibyo wigitakaza ubaho ubuzima bw’undi, emera uwo uri we, ube uwo uri we uzumva ikinyuranyo mu buryo wari ubayeho.”

-  Wimara igihe cyawe cyose mu kazi: Akazi gatwara amasaha menshi y’umuntu ariko si cyo kintu cyonyine ukwiye guhugiraho ubuzima bwawe bwose. Ni ingenzi cyane gufata umwanya ugakora bimwe mu bindi ukunda nko gukina imikino itandukanye, kureba filimi, gutembera no kuganira n’inshuti.

Iyi mirimo yose ukora hanze y’akazi igufasha kurwanya umunaniro uba wakuye mu kazi no kubona ibyishimo.

-  Emera ko udashoboye byose: Ubuzima bw’umuntu abumara ashaka gukora neza 100% ibintu byose, ibi bituma rimwe na rimwe wihatira gukora ibyo udashoboye, byakunanira ukagira agahinda ndetse haba hari uwo wabikoreraga ukumva ko umutengushye.

Ukuri k’ubuzima ni uko ntawushobora byose kandi na we ni byiza ko ubona ko hari ibyo udashoboye ukemera kubana n’uko kuri.

-  Gabanya guhangayika: Birashoboka ko udashobora kurwanya guhangayika ku kigero 100% kuko ubwabyo hari umusaruro bitanga urimo kugutera gukora cyane no kwitondera imyanzuro ufata.

Gusa iyo uku guhangayika gukabije ukagera aho n’utuntu duto tugutera gutekereza cyane, ugahorana ubwoba no ku bintu udashobora guhindura, ibi bishobora kukubuza ibyishimo kandi mu nta mpamvu ifatika.

Kubaho mu buzima bw'umunezero ni indoto za buri wese ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza