Uko waba hafi umuntu uri mu gahinda ko gupfusha

Yanditswe na Mukaneza M.Ange
Kuya 13 Nzeri 2018 saa 03:30
Yasuwe :
0 0

Mu buzima bwa hano ku Isi gupfusha ni ibintu bigera ku muntu uwo uwari wese, ariko uburyo tubyitwaramo usanga butandukanye biturutse ku byiyumviro byacu n’ubushobozi bwo kwihanganira amakuru atari meza.

Umuntu uri mu bihe byo kubura uwo yakundaga, iteka aba akeneye abamuba hafi kuko batuma urugendo rwo gukira ibikomere rworoha, ndetse akarushaho kubona ko adasigaye wenyine.

The Guardian igaragaza bimwe mu bintu ushobora gukora ukaba hafi uwagize ibyago, ndetse ukanamufasha kuba yakira ibikomere yatewe no kubura umuntu yakundaga

1. Wimuhunga

Gupfusha birababaza ndetse bigatuma umuntu yigunga, muri ibi bihe rero aba akeneye umuba hafi kugira ngo nibura yumve ko nubwo hari uwagiye hari abandi basigaye.

Nubwo waba wumva nawe byakurenze ku buryo ugorwa no kubona amagambo uvuga, ushobora kumuba hafi bitabaye ngombwa ko uvuga, kuko icy’ingenzi ari uko akubona.

Uramutse ufite ibintu byihariye wibuka ku muntu we wapfuye, ushobora kubimuganiriza kuko bimufasha kugira amateka mashya amenya ku wo yakundaga dore ko nta kindi gihe aba azongera kumubona akora ikintu runaka ngo nacyo ajye akimwibukiraho.

2. Musangize amateka y’ibyo nawe wanyuzemo
Niba nawe warigeze kugira ibyago byo gupfusha umuntu wakundaga, kumusangiza amateka y’urugendo rutoroshye wanyuzemo n’uburyo waje gukira ibikomere bizamufasha kubona ko nubwo uyu munsi bitoroshye azabasha kubivamo kandi agahinda katazamubaho karande.

Mu kumubwira amateka yawe ariko irinde kugereranya ibyago byawe n’ibye, cyangwa ngo ushaka kumwereka ko wumva uko amerewe, kuko burya buri wese agira uko yakira amakuru mabi bitandukanye na mugenzi we.

3. Wimubuza kurira

Mu gihe uri kwihanganisha umuntu wagize ibyago irinde kumubwira ijambo ‘wirira’, kuko nubwo wowe uba ukekako uri kumufasha, kuri we ni nko kumucecekesha umubuza kugaragaza amarangamutima ye.

Ntacyo bitwaye kuba wamuguma iruhande ucecetse, ahubwo ukajya umukoraho ndetse ukamuha agatambaro ko kwihanagura mu rwego rwo kumwereka ko uhari.

Amarira ni ingenzi kuko afasha umuntu kuruhuka mu mutwe, gusa n’utarira kandi yapfushije ntakwiye kubizira kuko nk’uko twabivuze ntitwakira ibintu kimwe.

4. Muherekeza gushyingura no kujya kwandukuza uwapfuye

Kimwe mu biha uwapfushije gutuza, ni ukubona uwe watabarutse aherekejwe n’abantu benshi kuko uretse kuba bimugaragariza ko atari wenyine. Ni ikimenyetso ko yaba we cyangwa uwo yakundaga wapfuye bazi kubana neza.

Ushobora kandi no kumusaba kumuherekeza kujya kwandukuza mu gitabo cy’irangamimerere umuntu we wapfuye bitewe n’isano bafitanye.

Aha uzaba umufashije cyane kuko bizamurinda gusubiza ibibazo bituma ahabwa icyemezo, kandi byinshi muri byo biba bimwibutsa uwe atazongera kubona na rimwe.

5. Irinde kwinjira cyane mu iyobokamana

Mu gihe uri kwihanganisha uwapfushije irinde kuzanamo amagambo ajyanye n’iyobokamana ngo utangire umwumvishe ukuntu umuntu we yageze ahantu heza.

Amagambo arimo “Imana imwakire mu bayo”, “Muzahurira aheza mu ijuru”, burya si byiza kuyabwira umuntu wagize ibyago, keretse igihe umuzi neza kandi usobanukiwe imyemerere ye.

Ni kimwe no kumubwira ngo “Byibura yabayeho imyaka myinshi kandi neza”, burya ku muntu ukunda nta myaka ashobora kubaho ngo wumve ko igihe kigeze ngo apfe.

6. Zamura ikiganiro kiganjemo inkuru zisekeje

Nubwo aba ari mu gahinda kenshi, kuba wamubwira inkuru zituma aseka nta kosa na rito ririmo, ahubwo ni uburyo bworoshye bwo gutuma adakomeza gutekereza ku bihe bitoroshye arimo.

Ushobora gusubiza amaso inyuma ukareba mu bintu uzi mwajyaga muganira agaseka, ukaba wabigarura ariko ubanje gushishoza neza ko ntabimukomeretsa birimo.

7. Witinya kuba wavuga izina ry’uwapfuye

Akenshi usanga umuntu atinya kuzana ibiganiro birimo uwapfuye kubera ubwoba ko bishobora kuriza cyangwa kubabaza uwapfushije.

Kumuzana mu biganiro ntabwo bishobora kumuriza keretse n’ubundi yari asanzwe afite amarira hafi. Irinde gusa gushyiramo amagambo akomeretse cyangwa inkuru zimuvuga nabi.

Ikindi kandi ukwiye gukomeza ukamuba hafi, yategura kujya gusura imva y’uwo yakundaga wapfuye ukaba wamuherekeza. Agahinda ko gupfusha umuntu ntabwo karangira mu cyumweru ahubwo ni urugendo rusaba igihe kirekire.

8. Mwibutse kugana abajyanama mu by’imitekerereze

Mwibutse ko nubwo bitihutirwa kuba yagana abajyanama mu bijyanye n’imitekerereza cyane cyane mu minsi ya mbere yo gupfusha, ari ingenzi kuba yazafata umwanya akajyayo kuko baba bafite ubuhanga mu guherekeza umuntu mu rugendo rwo kongera gusubira mu buzima busanzwe.

Ntugomba kwibagirwa ko hari iminsi yihariye aba agukeneye cyane, by’umwihariko ibihe bimwibutsa amateka meza yagiye agirana n’umuntu wapfuye nk’umunsi w’amavuko, uwo basezeraniyeho niba yari umufasha we n’indi.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza