00:00:00 IGIHE NETWORK KN KINYARWANDA EN ENGLISH FR FRANCAIS

Tureke kwigiza nkana; Abanyarwanda n’akabariro rwarahize!

Yanditswe na Ndahayo Emmanuel
Kuya 4 Nzeri 2021 saa 11:54
Yasuwe :
0 0

Burya koko uwapfuye yarihuse! Ejobundi naganiriye n’umusaza mu rusisiro ambwira uburyo mu mabyiruka ye yanyagiwe kakahava, ubwo yirukaga amasigamana agiye ku giti cyo ku muhanda wagereranya n’ibyapa by’ubu, kugira ngo yakire akabaruwa koherejwe na taxi iturutse mu Majyaruguru, aho umukunzi we yigaga.

Kugira ngo umusaza adacikwa n’imodoka irimo akabaruwa k’umukunzi we, byari ihame ko azinduka iya rubika agatanga imodoka ku giti kuko iyo ihamutanga ikamubura, byashobokaga ko iyo baruwa azayibura burundu, yaba umunyamugisha akayibona nyuma y’ukwezi cyangwa abiri, ndetse akaba yanayakira yaramaze kubonana na nyirayo.

Ibi ariko byari kera Facebook itaragera mu Rwanda, ngo ihindure uburyo bwo guteretana. Kuva muri za 2010 ubwo uru rubuga nkoranyambaga rwatangiraga kwamamara cyane, rwashoboje abasore n’inkumi koroherwa no kubona ubutumwa n’amafoto by’abakunzi babo, ndetse bigera ubwo bamwe mu basore bahimbarwa bigwizaho inkumi karahava ari na ho bamwe bahera bashinja Facebook, kuba igicumbi cy’umuco mubi wo gutendeka.

Icyakora kwijundika Facebook byari nka bimwe byo kuvuga utarabona, kuko nyuma y’imyaka mike ahagana muri za 2015, izindi mbuga nkoranyambaga zatangiye gukoreshwa n’abantu benshi mu Rwanda, ku isonga hakaza Twitter yari iharawe na ba nyakubahwa kimwe na ba ‘influencers’, ndetse na Instagram yabanje kuregwa kuba indiri y’abakobwa batajya gusenga ku Cyumweru, icyakora bakabona umwanya wo kwirirwa bamurika ikimero cyabo.

Ibintu ariko byari bitaragera iwa Ndabaga kuko haburaga gato ngo YouTube yinjire ku isoko ry’u Rwanda, aho yazanye amatwara mashya yari buzagire impinduka zikomeye ku mibereho y’Abanyarwanda. Uru rubuga rwaciye ibintu ahagana muri za 2017, ubwo amakuru y’uko ruhemba abatuma rurebwa cyane yatangiraga gucicikana, bigatuma buri wese n’iyonka ashamaduka, akifuza gutunga ‘Cano’ ye ku giti cye kugira ngo abone uko akirigita kuri iryo faranga.

Nyuma y’uko igitsure cy’ababyeyi n’abavugabutumwa kitahinduye byinshi, kera kabaye imbuga nkoranyambaga zakiriwe mu Muryango Nyarwanda, ndetse kuri ubu zahindutse nk’uruganiriro rw’urubyiruko, aho uzarusanga kuri iyi ‘mihanda’ (akabyiniriro k’imbuga nkoranyambaga) rutebya, ruhanurana, ruhana inkwenene ndetse runiteza imbere, kuko hari n’abatunzwe n’izi mbuga mu buzima bwabo. Muri macye uramutse wifuza kumenya impumeko y’urubyiruko rw’i Kigali, wayisanga ku mbuga nkoranyambaga.

Birumvikana ko buri wese wifuza kwisanisha n’uru rubyiruko rugize igice kinini cy’Abanyarwanda, agomba kurusanga aho rutaramira, ukazahabwirwa n’uko buri gihe utazasobanukirwa n’amazina y’abataramyi, kuko hari abifuza kwinigura bisanzuye bakiyita amazina mahimbano arimo nka ‘Ndakwiyamye’, ‘Ndamaze’, ‘I need to Pee’, ’Safari nyubaha’ n’andi menshi.

Gusa nubwo bimeze bityo, ‘kugafata’ (kwamamara) kuri izi mbuga nkoranyambaga si ibya buri wese, kuko gukurikirwa n’abantu ibihumbi bitoroshye, ari na yo mpamvu bihira bacye, icyakora ku bantu bazi ‘kata’ z’igikenewe ku isoko, birashoboka ko bakwandika izina mu kanya nk’ako guhumbya.

Fille (izina ryahinduwe) ni umwe mu bakobwa bakurikira cyane imbuga nkoranyambaga mu Rwanda. Yavuze ko hari ibanga rikoreshwa n’abifuza kubaka izina byihuse kandi bikaba bishobora kubahesha umugati cyane kuko ibigo by’ubucuruzi byifuza kwegera urubyiruko bisigaye byifashisha ibyamamare bikurikirwa na benshi kuri izi mbuga.

Mu kiganiro na IGIHE, yagize ati “Kugafata kuri Instagram ni ugushirika ubute, ukajya ushyiraho amafoto [wambaye utwenda duto] cyangwa video uri kubyina. Iyo uzi kubyinisha ikibuno bwo birihuta, iminsi micye uba wabaye umu-star. Ni byo abantu bakunze muri iyi minsi, ni yo mpamvu ushobora kuzamuka vuba.”

Akaje karemerwa!

Nta gushidikanya ko iterambere ry’ikoranabuhanga, ryanatumye imbuga nkoranyambaga zitangira gukoreshwa cyane mu Rwanda, ryagize uruhare ntagereranywa mu iterambere ry’ubuzima rusange bw’Abanyarwanda.

Icyakora iri terambere ry’ikoranabuhanga ryaje nka ya nkota y’amugi abiri, kuko nubwo ryahinduye imibereho y’Abanyarwanda, ryanaciye kirazira, kuko nk’ingingo y’imibonano mpuzabitsina itarajyaga ivugirwa mu ruhame, kuri ubu yabaye ingingo isusurutsa abataramyi binyuze mu bihangano birimo indirimbo na filime, byamaze kubonerwa akabyiniriro ‘k’ibishegu.’

Ibi ni “uguta umuco”, nk’uko Umuhanga mu mateka n’umuco by’u Rwanda, Nsanzabera Jean de Dieu, yabitangaje. Mu kiganiro na IGIHE, yasobanuye ko imico urubyiruko rwadukanye yo guhimba no kuganira ku mibonano mpuzabitsina mu ruhame, ihabanye n’indangagaciro z’umuco Nyarwanda.

Yagize ati “Mu bigize umuco w’u Rwanda, harimo ibintu bibiri bikomeye, ari byo kwirinda kwiyandarika no kugira ibanga, ukamenya ko hari ibivugwa n’ibitavugwa, hari ibyo ukora mu kigero runaka n’ibyo udakora.”

Nsanzabera avuga ko abaturarwanda benshi bagira isuku kuko bifatwa nko kwiyubaha ariko ntibarire ku muhanda, cyangwa bavuge ibyo bazi mu mazina yabyo, nk’uko bimeze ku mazina y’ibitsina, kuko bifatwa nko kwiyandarika.

Iki gitekerezo agihuriyeho n’ikindi gice cy’Abanyarwanda biganjemo abakuze, kidakozwa iby’imico irimo kwambara impenure no kuririmba ibishegu iharawe n’urubyiruko. Muri bo hari n’abadatinya kugaragaza impungenge ku hazaza h’igihugu, bibaza niba kizabona abakiyobora bakarinda iterambere ryagezweho mu myaka iri imbere. Iri tsinda ry’abadakozwa imyitwarire y’urubyiruko rw’iki gihe ryabonewe akabyiniriro ka ‘Umuco Gang’.

Ku ruhande rwa Emma-Claudine Ntirenganya, ukunda gutanga ibiganiro mu by’Ubuzima bw’Imyirorokere, yavuze ko ibikorwa byo kuganira ku mibonano mpuzabitsina byahozeho mu Rwanda, ariko bigakorwa mu buryo bw’imizimizo ku buryo urubyiruko rutarabukwaga ibiri kuvugwa.

Kuri ubu ariko ibintu byahinduye isura, kuko ikoranabuhanga ryorohereje urubyiruko kugera ku makuru menshi arimo n’agaruka ku mibonano mpuzabitsina, icyakora mu kwirinda igitutu cy’ababyeyi n’abandi bagize ‘Umuco Gang’, rugahimba imizimizo ituma abakuze batarabukwa.

Ntirenganya yagize ati “[Kuzimiza ibiganiro bigaruka ku mibonano mpuzabitsina] byatumaga byumvwa n’abagomba kubyumva, kandi n’ubu usanga ari bwa buvanganzo wavuga ko bugezweho, itandukaniro ni uko ibya kera byumvwaga n’abakuru, none iby’ubu byumvwa n’abato.”

Ikoranabuhanga ryatumye ingingo y'imibonano mpuzabitsina isakara kuri bose, bitandukanye n'uko byari bimeze mu Rwanda rwo hambere

Abaciye akenge bamenye icyo isoko rikeneye

Fille yavuze ko ingingo y’imibonano mpuzabitsina ifite isoko rifatika mu Rwanda, bikagaragarira mu buryo ibihangano by’ibishegu bikunzwe cyane.

Abahanzi baciye akenge bamenye igikenewe ku isoko na bo bagitanga batizigamye. Nk’ubu turebye mu ndirimbo zaciye ibintu mu mwaka ushize, izirimo ibishegu ziri mu zarebwe, zikanumvwa na benshi kurusha izindi ku buryo hari abahanzi basa nk’ababihinduye umurongo bakoreramo ibihangano byabo.

Indirimbo zirimo nka ‘Ifarasi’ na ‘Micro’ za Davis D, ‘Saa Moya’ ya Bruce Melodie, ‘Ikinyafu’ ya Kenny Sol na Bruce Melodie, ‘Ntiza’ ya Mr Kagame na Bruce Melodie n’izindi nk’izo, ziri mu zaciye ibintu kandi zose zifitanye isano n’imibonano mpuzabitsina.

Undi muhanzi wabiciye muri uyu mujyo ni Mico The Best. Kuva na kera, uyu mugabo atangirwa ubuhamya ku buhanga budasanzwe buranga imyandikire ye, icyakora ntiyari yarigeze agira izina rikomeye mu muziki w’u Rwanda, kugeza igihe yatangiriye kwandika indirimbo zikubiyemo ibishegu bijimije cyane bigatuma aba umwe mu bahanzi barebwa neza n’abakunzi b’umuziki mu Rwanda.

Yabanje gukora indirimbo yise ‘Igare’, imaze kurebwa n’abarenga miliyoni 2.6 kuri YouTube, ayikurikiza ‘Umunamba’ na yo imaze kurebwa n’abarenga miliyoni 1.6, ndetse n’iyitwa ‘Amabiya’, imaze kurebwa n’abarenga miliyoni mu mezi atarenze atatu imaze isohotse. Nta na rimwe byari byarigeze bibaho ko indirimbo za Mico the Best zikundwa kuri iki kigero, kandi si uko kera yahoze yandika indirimbo zitanyuze amatwi, cyangwa se atashyiraga imbaraga mu byo akora kuko burya mumureba agirana indirimbo na Diamond Platnumz, byumvikanisha ko yari yarihirinze uko ashoboye, ndetse bisa nk’aho icyo yaburiye ahandi yagisanze mu bishegu.

Mico the Best ni umwe mu bahanzi bahagaze neza mu Rwanda, cyane cyane nyuma yo gutangira kuririmba ibishegu

Abanditsi ba filime bavumbuye ibanga

Uretse indirimbo, abanditsi ba filime na bo babonye umuvuno, kuko urebye imyandikire isigaye igezweho, ikubiyemo ubutumwa n’amashusho atari asanzwe amenyerewe mu Rwanda.

Muri izi filime harimo inyura kuri shene ya ‘Nziza Films’ igaragaza umupadiri uba aryamana n’abanyeshuri yakabaye agenzura mu kigo cy’ishuri.

Hari kandi inyura kuri shene yitwa ‘Moon Galaxy TV’ igaragaza ‘Umuyobozi w’imyitwarire (animateur)’ mu kigo cy’ishuri, uba ahura n’ibigeragezo byo kwikura imbere y’ibibero by’abanyeshuri baba bashaka kumuhonga imibonano mpuzabitsina kugira ngo badahanwa.

Muri izi filime, kimwe n’izindi nyinshi ziri hanze, nta n’imwe iragaragaramo abakinnyi bakora imibonano mpuzabitsina mu buryo bwuzuye, uretse ko baba bagaragaje utwenda tw’imbere, ndetse rimwe na rimwe umusore akajya hejuru y’inkumi nk’uri kwiha akabyizi, ku buryo ku muntu utashishoje neza ashobora kwibwira ko ibintu byacitse.

Uretse izi filime, ibiganiro bigaruka ku gusobanura imiterere y’ibikorwa by’imibonano mpuzabitsina na byo bimaze kugira isoko rinini mu Rwanda. Mbere y’umwaduko wa YouTube, ibi biganiro byabanje kujya binyura kuri za radio zitandukanye mu Rwanda, bigakunda gutambuka mu masaha y’ijoro cyane kandi bigakorwa n’abantu bamwe, ariko ubanza ibi byaraterwaga no kutabona uruvugiro, kuko abarimu ku mibonano mpuzabitsina basigaye bavukira kuri YouTube buri munsi.

Inkubiri y’ibi biganiro na yo imaze kubica cyane muri iyi minsi, ndetse ihangana ry’ababikora rituma bamwe bagerageza gukora ibidasanzwe kugira ngo bikubire isoko. Mbere byatangiye aba barimu batagaragara amasura, nyuma baza kwigaragaza ariko bakaba bicaye batuje, none basigaye bagerageza kwigisha ariko banakora ibyo bavuze, ku buryo niba akubwiye uburyo wategura umukunzi wawe mbere yo kwinjira mu mibonano mpuzamabitsina, ananyuzamo akabikwereka yikorakoraho, kandi ukabona bimwe by’amasoni ya Kinyarwanda bitamuciriye ishati na gato.

Amazina y’amasomo na yo si agafu k’imvugwarimwe. Uretse ibi biganiro, cyangwa se amasomo aba agamije kwigisha abantu iby’imibonano mpuzamabitsina, bimaze kugaragara ko n’ibiganiro bisanzwe, bikurikirwa cyane iyo biri kuganira ku ngingo y’imibonano mpuzabitsina.

Nk’ubu ikiganiro cyanyuze kuri shene ya Isimbi TV gifite umutwe ugira uti “PORONO ndayikina/Isimbi Noeline AHISHUYE ibyo mutazi/Narafunzwe/nta mugabo nshaka/ukuri mwahishwe”, kimaze kurebwa n’abarenga ibihumbi 472 mu gihe kitarenze amezi atatu kimaze kiri hanze. Ni kimwe mu biganiro byarebwe cyane kuri iyo shene muri uyu mwaka.

Ntabwo ari YouTube gusa abantu bagaragarizaho inyota yo kureba no kumenya ingingo zigaruka ku mibonano mpuzabitsina, kuko na Instagram itanga ayo mahirwe, nk’uko Fille yabitubwiye.

Nk’ubu Umunyarwanda wa mbere ukurikirwa kuri uru rubuga ni Shadia Mbabazi tuzi nka Shaddyboo ukurikirwa n’abarenze ibihumbi 917. Shaddyboo ni inshuti y’abaririmbyi, barimo n’abakomeye nka Diamond Platnumz, icyakora ntabikora nk’umwuga ku giti cye, ku buryo twavuga ko ari yo ntandaro y’igikundiro cye.

Abamukurikira bazakubwira ko ari umunyabuntu, ku buryo ajya anyuzamo akaremera abareba video ze ari gukaraga umubyimba, ndetse ibi bikaba ari imwe mu mpamvu ituma akundwa ku kigero kiri hejuru.

Shaddy boo ni we Munyarwanda wa mbere ukurikirwa n'abantu benshi kuri Instagram, aho yubatse izina binyuze mu bikorwa byo kwerekana amafoto ashobora gukurura abantu

Amazi yarenze inkombe?

Ibi bikorwa byo kurarikira ibintu biganisha ku mibonano mpuzabitsina ndetse no kubitegura mu buryo bworoheje ari na bwo bukoreshwa mu Rwanda, bikubiye mu kizwi nka ‘Soft Porno’.

Ni “Aho abantu badakora imibonano mpuzabitsina mu buryo bweruye ariko ukabona ko ubwo buryo bundi bakoresha bushobora gukurura abantu, cyangwa se bukabatera ubushake bwo kujya muri ya mibonano mpuzabitsina”, nk’uko Ntirenganya abisobanura.

Ikoranabuhanga ryatumye abantu bagera ku makuru arimo n’aganisha ku mibonano mpuzabitsina ni imwe mu mpamvu y’ingenzi yatumye ‘soft porno’ zibona isoko mu Rwanda rutuwe n’urubyiruko rwinshi, kandi ugasanga rutaragize amahirwe yo kwigishwa ku ngingo y’imibonano mpuzabitsina hakiri kare, ku buryo iyo ruciye urwaho agafaranga rugatangira kwigurira telefoni na internet mu buryo buhoraho, iyi ngingo iri mu za mbere rubanza kwimaraho amatsiko.

Ntirenganya yavuze ko bigoye kugenzura urubyiruko rukoresha ikoranabuhanga, ndetse ko ababyeyi bakwiye kubyakira, ariko bagakora ibishoboka byose kugira ngo buzuze inshingano zo kwigisha abana babo ku bijyanye n’imibonano mpuzabitsina.

Yagize ati “Ababyeyi bakwiye kumenya ko ibintu byahindutse, bakibuka kujya baganiriza abana ntibagire isoni, ibyo bizatuma [umwana] akwizera, nubwo bitamubuza kugira ibyo agwamo, ariko iyo wamuganirije aba afite ubumenyi bwo guhangana n’ibibazo ahuye na byo, ndetse biramworohera kukugisha inama.”

Ku kijyanye no kugenzura ibihangano bigiye gusohoka kugira hirindwe ko byaba bikubiyemo ubutumwa bushora abantu mu mibonano mpuzabitsina, Ntirenganya yavuze ko ‘bitaba ari byo kuko hari ababikunda nubwo abantu babyita bibi’, anagaragaza impungenge ko biramutse bikozwe gutyo, byabangamira iterambere ry’urwego rw’imyidagaduro muri rusange kuko abahanga udushya bacika intege.

Yasobanuye ko uruhare rwa Leta rushobora kugaragarira mu guteza imbere ibihangano yifuza, ikabishoramo amafaranga noneho abahanzi babona ari byo bishobora kubatunga, bakaba ari byo bibandaho.

Emma Cluadine Ntirenganya avuga ko ababyeyi bakwiye gufata iya mbere mu kuganiriza abana babo ku bijyanye n'imibonano mpuzabitsina kugira ngo bibarinde kwishakira amakuru mu buryo butari bwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .