00:00:00 IGIHE NETWORK KN KINYARWANDA EN ENGLISH FR FRANCAIS

Kwijandika mu busambanyi, imibereho mibi: Intandaro yo gutinda gushaka mu basore

Yanditswe na Mukahirwa Diane
Kuya 11 Nyakanga 2021 saa 09:19
Yasuwe :
0 0

Amateka y’Abanyarwanda agaragaza ko mu myaka yo hambere umusore wageraga mu gihe cy’ubugimbi yahitaga ashaka umugore, aho wasangaga umuntu agera imyaka 20 afite umugore n’abana.

Uko imyaka igenda ishira niko ubuzima buhinduka ndetse n’uburyo abantu babagaho bugahinduka. Muri iyi myaka biragoye kubona umusore wubatse urugo ari munsi y’imyaka 25, bibaho ariko si cyane nka mbere.

Ni ibisanzwe ko yarwubaka kuri iyi myaka ndetse hari n’abarenza, ariko iyo umusore yagejeje mu myaka 40 abantu bavuga ko yatinze gushaka ndetse bamwe bakaba bamubaza ikibazo yagize kuko baba bumva bidasanzwe.

Muri raporo y’Ikigo cy’Igihugu cy’ibarurishamibare (NISR), ivuga uburyo imibereho y’Abanyarwanda yari ihagaze mu 2020, yagaragaje ko mu bantu 30.859 bashyingiwe byemewe n’amategeko uwo mwaka, harimo abasore 3965 barengeje imyaka 40.

Bamwe mu bakurikiranira hafi umuryango baganiriye na IGIHE, bavuze ko hari impamvu nyinshi zishobora gutuma umusore atinda gushaka.

Mukanzigiye Marie Goretti washinze Umuryango uharanira uburinganire, Ubwuzuzanye n’Ubusugire bw’Umuryango mu Iterambere (GEFAPRODO), yavuze ko akenshi usanga abasore batinda gushaka baba bafite ibibazo bitandukanye mu bijyanye n’imibonano mpuzabitsina.

Yagize ati “Birashoboka ko bagira ibibazo bijyanye n’imibonano mpuzabitsina, aho babanza kwibana bakagira uko bifata mu buryo bwo kwifasha ku bijyanye n’imibonano mpuzabitsina, kuko iyo umuntu agejeje igihe cyo gushaka umukunzi yakabaye abijyamo kuko bihita byikora.”

“Turebeye nko ku barokore usanga abahungu baho aribo bashaka mbere ndetse bakaba bashaka n’abagore bakuze, bihita bigaragara ko kubera kwanga gukora ibyaha bahita bajya gushaka.”

Kuba abasore baba baratangiye kuryamana n’abakunzi babo batarabana byemewe n’amategeko, Mukanzigiye abibona nk’impamvu ishobora gutuma batinda gushaka.

Ati “Usanga hari abajya mu busambanyi no gutendeka abagore benshi cyangwa se afite ukundi kuntu yirwanaho nko kwikinisha. Hari no kuba abagabo basigaye babana n’abandi, bakaba bafite ahandi barangiriza ibyo.”

“Akazajya gushaka yaratinze kubera abantu bari kumushyiraho igitutu, akajya gushaka ari nko gushaka aho gusazira.”

Usibye ibi bibazo bijyanye n’imibonano mpuzabitsina, Mukanzigiye asanga gutinda gushaka bishobora guturuka ku mateka u Rwanda rwanyuzemo.

Ati “Hari abana baba ari impfubyi nta muryango afite , bikaba byatuma avuga ati ese ndashaka nshimishe nde? Ukabona ni wa muntu wibera mu nzoga n’ibiyobyabwenge.”

Yongeyeho ko kuba umuntu yakwisanga muri ibi bibazo atari ibintu byo guceceka ngo yumve ko ari ibisanzwe, ahubwo akwiye kwegera abajyanama b’indwara zo mu mutwe bakaba bamufasha.

Padiri Amerika Victor, umwanditsi w’ibitabo bigaruka ku muryango, yavuze ko kuri ubu abasore batinda gushaka bitewe n’impamvu zitandukanye ariko zose zifite aho zihuriye n’imibereho ikakaye abantu babayemo.

Ati “Kera wasangaga umusore abyiruka icyerekezo kiri imbere ari ukubaka urugo, nta wajyaga mu mashuri ngo ajye gushaka imibereho, umwana yagera mu myaka 19 ababyeyi bakamukorera byose bakamushyingira.”

“Ubu rero ntabwo aricyo cyerekezo gihari ngo umwana agire iyo myaka ajye kubaka urugo, ahubwo ajya gushakisha amashuri, akazi n’ibindi bigatuma ibyo gushaka atabyijyamo. Kandi n’ababyeyi b’ubu ntibagifashanya ngo babe bamwubakira.”

Yakomeje avuga ko indi mpamvu ikomeye ituma abasore batinda, ari ugutinya gufata inshingano.

Ati “Hari ubwo umuntu agera mu myaka myinshi gushaka atabishoboye kubera kugira indwara yo gutinya gufata inshingano, akaba atabasha gutangira ikintu cyo kwiyemeza.”

Ku ruhande rw’abasore nabo bavuga ko impamvu zishobora gutuma batinda gushaka, ari ubuzima bubasaba byinshi ndetse no kuba babona abashatse batarahiriwe nabyo.

Kamanzi Bosco yavuze ko ubushobozi n’urukundo ruke aribyo bibyihishe inyuma. Ati “Bitewe n’ubukungu bwifashe nabi muri ibi bihe ,abasore bamwe bashobora gutinda bagira ngo babanze gukora ikofi.”

“Ikindi usanga nta rukundo ruhamye ruri mu bifuza kurushinga. Bigaragarira muri za gatanya nyinshi ziriho muri ibi bihe kurenza mbere ,bityo bigatuma batinda gufata umwanzuro.”

Izi gatanya Kamanzi avuga ahanini zikomoka ku bibazo biri mu muryango nk’ihohoterwa rishingiye ku gitsina, gucana inyuma, imitungo n’ibindi. Ngo ibyo bitera abasore bamwe ubwoba, bakaba batinda cyangwa bakwanga gushaka kuko bakeka ko nabo ingo zabo zazamo ibibazo.

Abasore benshi batinda gushaka kubera imibereho mibi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .