Ibiba ku mubiri w’umuntu igihe adafite akazi

Yanditswe na Twarabanye Venuste
Kuya 17 Mata 2020 saa 09:15
Yasuwe :
0 0

Abahanga mu buzima bwo mu mutwe berekana ko kubura akazi ari kimwe mu bitera guhangayika, cyane iyo umuntu akabuze bitunguranye nkuko byabaye kuri bamwe muri ibi bihe bya Coronavirus.

Iyo umuntu atakaje akazi ntabwo aba abuze icyo yinjiza mu buryo bw’ubukungu gusa. Abahanga berekana ko umuntu ashobora no gutakaza intego ku byo yari agamije kugeraho ndetse ko bishobora no kugira ingaruka ku mubiri we.

Umuhanga ku buzima bwo mu mutwe, Lisa Orbé-Austin, yabwiye Huffpost ko abantu baba batekereza ibitandukanye igihe babuze akazi.

Iyo umuntu abuze akazi ibyiyumviro agira bigira ingaruka ku buzima bwe muri rusange. Abahanga bagaragaza ingaruka zitandukanye umuntu ashobora kugira mu buzima bwe.

-  Kubura ibitotsi cyangwa gusinzira cyane

Ibibazo mu gusinzira ni kimwe mu byerekana ko kubura akazi biri kugira ingaruka ku buzima bw’umuntu.

Umuhanga mu buzima bwo mu mutwe wo muri leta ya Maryland muri Leta Zunze Ubumwe za Amerika, Kristin Bianchi, avuga ko "ushobora kugira ibibazo byo kubura ibitotsi, gusinzira igihe kirekire cyangwa ugasanga uri kubyuka kare kurusha uko biteganyijwe."

Mu busanzwe kuba wabura ibitotsi umunsi umwe cyangwa ibiri ngo ntacyo bitwaye ariko iyo bikomeje biba ikibazo.

Ku rundi ruhande, Umwarimu muri Kaminuza ya Arizona mu ishami ry’ubuzima, Patricia Haynes, avuga ko imihangayiko umuntu yagiraga mu kazi ishobora gukomeza nyuma yo kukabura.

Mu bushakashatsi yakoze, we na bagenzi berekanye ko umuntu wari ufite ibibazo by’umutekano mu kazi abangamiwe na politiki y’ikigo akoramo agira ibibazo byo kubura ibitotsi nyuma yo kukabura.

Ati “Imbogamizi nyinshi, zirimo iza politiki cyangwa izerekeye kuzamurwa mu kazi, ibintu bituma abantu badakora neza. Twabonye ko bituma abahuye nabyo bakomeza kubura ibitotsi nyuma yo kubura akazi.”

-  Guhungabana

Ubushakashatsi bwerekana ko uko umuntu amara igihe kinini nta kazi ariko arushaho guhungabana. Umwe mu Banyamerika batanu badafite akazi mu gihe kigera ku mwaka byagaragaye baba bafite uburwayi ku buryo benshi bafata imiti ibarinda kugira ihungabana.

Batangira kubihirwa n’ibyabaryoheraga, bakagira kwishima guke kurusha uko bari basanzwe.

-  Ibyishimo biragabanyuka

Inyigo yo mu 2015 yasohotse muri Journal of Applied Psychology yerekana ko kubura akazi bihindura umuntu.

Mu Badage bakuze 6 769 bakoreweho iyo nyigo, bamaze imyaka ine basuzumwa, ababuze akazi mu gihe cy’iyo nyigo bahinduye ku buryo bukomeye imyitwarire kurusha abagumye mu kazi.

Yerekanye ko abagore bagiye batakaza ibyishimo gake gake buri mwaka naho abagabo biba mu myaka ibiri ya mbere bikagenda bishira nyuma yayo. Muri rusange ariko mu minsi ya mbere abantu baba batarahinduka bashaka ikindi bakora.

-  Kumva umubiri utameze neza, kuribwa umutwe w’uruhande rumwe n’igifu

Iyo umubiri wawe uhangayitse, imikaya yishakamo imbaraga kugira ngo ihangane n’icyo kibazo. Abahanga bakavuga ko ari uburyo bw’umubiri bwo gushaka igisubizo.

Iyo ubwo buryo bubaye igihe kirekire bitera kuribwa umutwe w’uruhande rumwe. Umuryango w’Abanyamerika wita ku buzima bwo mu mutwe, uvuga ko kubabara umugongo wo hasi n’igice cyo hejuru uhereye mu bitugu bifite aho bihuriye n’imihangayiko y’akazi.

-  Ubushake bwo kurya burahinduka cyane

Guhangayika bishobora kongera cyangwa kugabanya ubushobozi bwo kurya. Ibyo bigira ingaruka ku igabanyuka ry’ibiro cyangwa bikiyongera.

Ibyo wakora mu gihe udafite akazi

Kugira ngo umuntu abashe kunyura muri ibyo bihe; yashyiraho gahunda y’umunsi kandi akayubahiriza, akumva ko ibyabaye atabihindura agashyiraho igikorwa kimushimisha yajya akora no gutekereza ku bikorwa byiza yakoze kurusha ibyamugoye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .