Kubura abarimu ni cyo cyateye abanyeshuri ba GS Musheri kwitabaza Umurenge

Yanditswe na

Philbert Hagengimana

Kuya 27 Gicurasi 2015 saa 11:19
Yasuwe :
0 0

Abanyeshuri biga mu Rwunge rw’amashuri rwa Musheri mu Karere ka Nyagatare, mu gitondo cyo kuwa mbere bazindukiye mu bisa n’imyigaragambyo, aho kujya mu mashuri bahitamo kujya ku Murenge ngo bagaragaze ikibazo cy’uko bari bamaze iminsi 3 batigishwa.

Ku wa mbere tariki ya 25 Gicurasi 2015, abanyeshuri b’abakobwa n’abahungu biga ku rwunge rw’amashuri rwa Musheri mu mwaka wa gatandatu mu ishami rya HEG (History Economics and Geography) hamwe n’abo mu ishami rya MEG (Mathematics Economics and Geography), babyukiye ku biro by’Umurenge wa Musheri, aho bavuga ko bajyanywe no kugaragariza ubuyobozi akababaro kabo.

Nk’uko twari twabigaragaje mu nkuru yavugaga kuri icyo gikorwa kimeze nk’imyigaragambyo y’abanyeshuri, bagaragazaga ikibazo cy’uko batigishwa nk’abandi bitegura ibizamini bisoza amashuri yisumbuye, imirire mibi n’imibereho idahwitse, n’ibindi bibazo bishingiye ku ikipe y’Umupira w’amaguru yitwa Nyagatare FC ikina mu cyiciro cya kabiri, aho twavugaga ko uburyo bafatwa ndetse n’imyitwarire y’abakinnyi bayikinamo, bibangamira abandi banyeshuri.

Ubuyobozi bw’Ikigo bubyamaganira kure….

Magezi Bonny, Ubuyobozi bw’urwunge rw’amashuri bwamaganira kure iby’imyigaragambyo ivugwa, bukanatangaza ko abanyeshuri nta kindi kibazo na kimwe bafite usibye icy’uko bari bamaze iminsi 2 batabona abarimu (Uwigisha imibare n’uwigisha Entrepreneurship), iki kikaba ari cyo cyonyine cyabateye gusohoka amashuri abiri bakerekeza ku biro by’Umurenge wa Musheri.

Magezi yagize ati “Ikibazo cyari gihari cyari icy’abarimu babiri batibonye ku rutonde rw’abazahembwa bitewe n’uko Akarere kasanze batujuje ibisabwa ngo babe abarimu b’umwuga.”

Abanyeshuri bagandagaje ku Murenge mu nama n'Umunyamabanga Nshingwabikorwa, ushinzwe Uburezi hamwe n'abayobozi b'ikigo

Umuyobozi w’ishuri akomeza avuga ko abo barimu bari bamaze iminsi bahagaritswe, maze abanyeshuri basobanurirwa ikibazo cya bo, ariko barebye ukuntu bamaze iminsi 3 batiga bibaza ko barimo kudindira mu gutegura ibizamini bya Leta, maze bati “Ntabwo tubyumva rwose, reka tujye kwibariza ku Murenge….”

Mu gushaka kumenya uburyo abo bana bageze aho bafata icyemezo cyo kwibariza ku Murenge kandi bakagenda bose icya rimwe basimbutse inzego zose z’ubuyobozi bw’ikigo, Magezi yasubije ko ari bo babahaye uburenganzira bwo kujyayo.

Ati “None se ko biga mu mwaka wa 6 ubwo urumva bari gusohoka mu kigo badahawe uburenganzira se bari bigaragambije?”

Umuyobozi w’ishuri akomeza avuga ko nta kibazo cy’isenyuka ry’amashuri gihari, ko kurya na byo abanyeshuri bagaburirwa neza, ko kandi ikipe ya Nyagatare FC ari ikipe igizwe n’abanyeshuri bo muri GS Musheri, abatiga bakaba bacumbikirwa hanze y’ikigo.

Kuba ngo abakinnyi bayikinira baba bafatwa mu buryo butandukanye n’abandi banyeshuri, ngo ibyo na byo si byo, ahubwo ubuyobozi bw’ishuri buvuga ko “bafatwa nk’abakinnyi kandi bakagaburirwa indyo nyir’izina nk’iy’abandi banyeshuri.”

Gitifu asanga ibyo bakoze ari nko kwigarambya ariko abanyeshuri bo bagasaba imbabazi

Kamugisha Charles, Umunyamabanga Nshingwabikorwa w’Umurenge wa Musheri, yatangarije IGIHE ko abo banyeshuri baje kubagezaho ikibazo gishingiye ku kuba batari bafite abarimu babigisha, gusa ngo nta kindi kibazo abanyeshuri bamugejejeho n’ubwo na we asanga ibyo bakoze ari nk’imyigaragambyo.

Kamugisha yagize ati “Abanyeshuri barabyutse kuwa mbere mu gitondo baraza bansanga ku office (ibiro) ku Murenge kuko uhana imbibe n’ikigo, baje kumbwira ko bamaze iminsi 3 batiga. Naje kubabwira nti ‘kuki mutandika mubimenyesha ngo nkurikirane icyo kibazo?”
Nk’uko yakomeje abitangaza ngo abo banyeshuri bamusubije bati “Twasanze biri butinde duhitamo kuza kubikwibwirira”, ibyo bikaba byaratumye ahita abasaba ko basubira ku ishuri akaza gukurikirana ikibazo cya bo, maze barabimwemerera basubira mu mashuri.

Kamugisha akomeza kandi avuga ko abanyeshuri bavugaga ko bamaze iminsi babwiye icyo kibazo Umuyobozi w’ishuri, ariko icyagaragaye ngo ni uko atahise akurikirana icyo kibazo cy’abarimu, ngo uretse ko atamurenganya kuko hari hashize iminsi itatu yonyine.

Ati “Any way (ibyo ari byo byose) nanjye nashatse kubibabwira mbabwira nti ‘ese ntibyagaragara nk’imyigaragambyo kuba muje ku Murenge mutararanyandikiye? Abanyeshuri ubwabo ni bo bansabye imbabazi bati tubabarire wibyita imyigaragambyo.”

Gusa ngo umuyobozi ntiyashizwe kuko na we yabonaga bakoze ibisa nk’imyigaragambyo, maze arababaza ati “…kandi reba mwataye umuyobozi wanyu mu kigo muza kunyigaragambyaho nk’aho mwambwiye ikibazo cyanyu jye nkanga kugikemura”, gusa ngo abo banyeshuri bakomeje bamubwira bati “tubabarire rwose wibyita imyigaragambyo.”
Mbere y’uko hagera aho abo banyeshuri bakora igisa n’imyigaragambyo mu mutuzo, umwe muri abo banyeshuri utarashatse ko izina rye ritangazwa, yatangarije IGIHE ko batigishwa neza nk’abitegura gukora ibizamini bisoza amashuri yisumbuye.

Yari yagize ati “Dufite ibibazo bitandukanye, birimo kuba abarimu batwigishwa badahembwa bigatuma na bo bigisha uko bishakiye, ugereranyije n’uko abiga ku bindi bigo turi mu mwaka umwe bigishwa.Twigira ahantu hadakinze, amashuri amwe ni ibirangarira kandi dutanga amafaranga y’ishuri.”

Undi na we yari yagize ati “Urebye uburyo tugaburirwa, uburyo twigishwa biteye agahinda, dufashwe nabi ku buryo bugaragara. Ikibazo umuyobozi w’ikigo arakizi ariko ubona ko ntacyo bimubwiye, kubera gusuzugurwa n’ubuyobozi bw’ikigo.”

Kugeza ubu ikibazo cy’abarimu abanyeshuri bajyanye ku Murenge, cyamaze gukemuka hazanwa abandi, ibindi na byo inzego zitandukanye zirimo ingabo Polisi n’abashinzwe uburezi, barabihagurukiye ndetse harimo kugenzurwa niba koko byaba bihari n’ubwo ubuyobozi bw’ishuri buvuga ko nta kindi kibazo gihari.

GS Musheri ngo abanyeshuri bameze neza, biga neza, barya neza, mbese nta kibazo bagifite kuko icy'abarimu cyarakemutse
N'ubwo aho kujya mu ishuri bigiriye inama yo kwerekeza ku Murenge bose batagombye kwandika cyangwa kwitoramo abo batuma, ibyo bakoze si imyigaragambyo

Mukande hano musome inkuru ivuga iti "Nyagatare: Abanyeshuri bo muri GS Musheri bigaragambirije uruhuri rw’ibibazo"

Amafoto: Aimable/GS Musheri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza