“Rabagirana Festival 2026” ni iserukiramuco ry’indirimbo zo kuramya no guhimbaza, rihuza abakunzi b’izo ndirimbo, amatorero, imiryango, urubyiruko ndetse n’abandi.

Ni iserukiramuco ryabaye ku wa 6 Nzeri 2026, ryitabirirwa n’ab’ingeri zinyuranye kuri Stade ya Bugesera.

Ahagana Saa Cyenda n’Igice z’amanywa ni bwo ryatangijwe n’umuhanga mu kuvanga indirimbo zo guhimbaza no kuramya Imana, DJ Spinny mu gihe yakurikiwe na DJ Biggy uri kuzamuka muri uyu mwuga.

Nyuma y’isaha n’igice, umuramyi Trésor yageze ku rubyiniro atangira gususurutsa abitabiriye iri serukiramuco asubiramo indirimbo zitandukanye zo kuramya no guhimbaza Imana zirimo Ebenezer ya Gisubizo Ministries, Nzaririmba ya Israel Mbonyi, Mana Urera ya True Promises na Iyo Niyo Data ya Alarm Ministries.

Yakomereje ku ndirimbo yitwa Umucunguzi ya Ngabo, asoreza ku ndirimbo ye yitwa Ni bande yasohoye mu 2023 ari kumwe na True Promises.

Ahagana Saa Kumi n’Imwe n’iminota 15 ni bwo Umuhanzi wo mu Karere ka Bugesera witwa Eunice Queen yahawe umwanya wo gutaramira imbere y’abakunzi be aririmba indirimbo ze zitandukanye.

MD Dieudonné uzwiho kuririmba indirimbo z’Imana mu njyana ya Hip Hop ni we wakuriyeho ari kumwe n’umugore we wamufashaga gususurutsa abitabiriye iki gitaramo, bakaba bararirimbye iminota 20 kuko yasoje Saa Kumi n’Ebyiri z’umugoroba.

Thacien Titus uheruka kwegukana igihembo cya ‘MTN Caller Tunez’ yakiranwe urugwiro n’Abanya-Bugesera kuko bamufashije kuririmba indirimbo ze eshatu zose yaririmbye kuko baziririmbaga ijambo ku rindi.

Mbere y’uko uyu muhanzi atangira kuririmba, yasabye abafana be kuzamura ibiganza byabo bagashimira Imana kubera ibyiza byose yagiye ibakorera mu buzima bwabo.

Ati “Zamura ibiganza tuzamure icyubahiro cy’Imana kuko intego yatuzanye ahangaha ni ukuvuga ijambo ry’Imana.”

Yahereye ku ndirimbo yitwa Mpisha mu Mababa na Aho Ugejeje ukora zose yasohoye mu 2017, asoreza kuri Uzaza ryari Yesu yo mu 2021.

Saa 18:43 ni bwo Gaby Kamanzi yinjiye ku rubyiniro, abanza gushimira no gusabira umugisha Abanya-Bugesera babakiriye neza.

Ati “Twaje hano guhimbaza umwami Yesu kandi niba utamuzi uyu munsi umumenye. Reka mukubwire gato, uwo mwami ni mwiza, atanga amahoro kandi iyo umwakiriye atanga amahoro, ahari umwijima hakaza umucyo.”

Uyu muhanzi yahereye ku ndirimbo ye yakoze mu 2012 yitwa Wowe, akurikizaho Ungirira neza yasohoye mu 2019.

Gabby Kamanzi yasoreje ku ndirimbo yitwa Arankunda yo mu 2016, yahagurikije abari bitabiriye iri serukiramuco kuko bamufashije kuyiririmba no kuyibyina.

Dominic Nic yakurikiye Gabby Kamanzi, kuko yageze ku rubyiniro Saa Moya zirenzeho iminota itandatu, na we atangira asabira umugisha abagize uruhare mu gutegura iri serukiramuco ndetse n’ababyitabiriye.

Yatangiye aririmba indirimbo ye yitwa ‘Ari kumwe natwe’ yaririmbyeho gato, akurikizaho Ashimwe yasohoye mu 2015, ndetse zombi zakiriwe neza n’abitabiriye iri serukiramuco.

Yakomeje aririmba izindi ndirimbo zirimo Nemerewe kwinjira yasohotse mu 2024 ndetse na Ndishimye yo mu 2016.

Hakurikiyeho Christian Vedaste waririmbye indirimbo zitandukanye zirimo Merci Papa, Imana Irabizi, Uzi gukunda ndetse n’izindi.

Iri serukiramuco ryasojwe na Hakizimana Evariste umaze imyaka myinshi aririmba indirimbo zo guhimbaza no kuramya Imana, aho yaririmbye indirimbo ebyiri ari zo Nzaririmbira Umuremyi na Itorero, zombi zimaze imyaka irenga 20 zisohotse.

Mu rwego rwo guha urubyiruko rwitabiriye iri serukiramuco amahirwe yo kwiyungura ubumenyi, Chancen International yafashije urubyiruko rufite hagati y’imyaka 18 na 35 kubona amahirwe yo kwiga binyuze mu buryo bwo kurwishyurira ishuri rukazishyura nyuma (Study-now, pay-later).

Muri iri serukiramuco kandi hatangiwe ubutumwa bukangurira abaturage kwizigamira no kujya muri Ejo Heza, ndetse hishyuriwe abaturage batishoboye ubwisungane mu kwivuza (Mutuelle de Santé).

Mu bindi bigo byatanze ubutumwa harimo MTN, Beta Paint n’Ishuri Rikuru ry’Iyobokamana, ACT (Africa College of Theology).

Nyuma ya Bugesera, Rabagirana Festival 2026 izakomereza no mu turere twa Muhanga, Ruhango na Rubavu.

Indirimbo za Christian Vedaste zirimo Merci Papa, Imana Irabizi n’izindi zahagurukije Abanya-Bugesera

Umuhanzi wo mu Karere ka Bugesera witwa Eunice Queen yahawe umwanya wo gutaramira imbere y’abakunzi be

Umuramyi Tresor yaririmbye indirimbo zitandukanye zashimishije abari bitabiriye iki gitaramo

Ababyeyi bari bazanye n'abana babo muri iri serukiramuco

Abana buzuye umwuka wera batangira guhimbaza Imana bayishimira ko yabarinze

DJ Biggy uri kuzamuka mu mwuga wo kuvanga indirimbo zo guhimbaza no kuramya Imana, yahawe umwanya wo kwiyereka abakunzi be mu Bugesera

DJ Spinny ni we wabanje gususurutsa abitabiriye iri serukiramuco mu ndirimbo zitandukanye

Umuhanzi Gabby Kamanzi yagaragaje ubuhanga mu miririmbire

Thacien Titus yasusurikije abakunzi be mu iserukiramuco rya Rabagirana ryabereye mu Karere ka Bugesera

Umuhanzi Hakizimana Evariste watangiye kuririmba indirimbo zo guhimbaza no kuramya Imana mu 1986, yasusurikije abitabiriye iri serukiramuco mu ndirimbo ze za kera