Ubuzima busharira, gushinga urugo, kuva muri ADEPR... - Ikiganiro na Dominic Ashimwe

Yanditswe na Ishimwe Israel
Kuya 28 Mutarama 2019 saa 08:32
Yasuwe :
0 0

Izina Ashimwe Dominic si rishya kuri benshi! Ntirisiba kumvikana mu matwi y’abihebeye ubuzima bwo kuramya no guhimbaza Imana. Ni umunyamuziki ufite ibihangano bigusha neza, bikanahembura imitima y’abihebye.

Ashimwe ari mu bahanzi babarizwa mu itorero rya ADEPR ufite izina mu muziki uhimbaza Imana, kuva mu myaka isaga icumi ishize. Yamamaye mu bihangano birimo “Nemerewe kwinjira’’, “Ashimwe”, “Ndishimye”, “Azanyibuka’’, “Wambereye imfura’’ n’izindi.

Uyu muhanzi uvuka mu Karere ka Rubavu aho yaboneye izuba ku wa 10 Ukuboza 1985, ni imfura mu muryango w’abana batandatu barimo abahungu bane n’abakobwa babiri. Asigaranye umubyeyi umwe, Kamashyuza Véronique kuko se yitabye Imana.

Mu buhamya bwe avuga ko yakuriye mu buzima bushaririye no kubona ifunguro bigoye. Hari aho yibazaga niba “Hari igihe nzishyirira isukari mu cyayi cyangwa nkahaga umuceri?”

Mu kiganiro cyihariye yagiranye na IGIHE, Ashimwe yavuze ko nubwo yakuriye mu buzima bugoye, Imana yamurinze ndetse ikamuhindurira ubuzima ku buryo bugaragara.

Uyu muramyi yanavuye imuzi ukuri ku byavuzwe ko yavuye muri ADEPR mu nkubiri ya 2017 yasize abari abayobozi bakomeye barimo Bishop Sibomana Jean na Tom Rwagasana bafungwa, icyo atekereza ku gushinga urugo n’ibindi.

IGIHE: Umwaka wa 2018 wagusigiye uruhe rwibutso?

Ashimwe: Ni umwaka Uwiteka yampereyemo umugisha, afungura imiryango, njya kuvuga ubutumwa ku mugabane w’u Burayi. Nagezeyo mpabonera gukora kw’Imana bundi bushya. Imana yandokoye impanuka nyinshi ndetse yahaye abo mu muryango wanjye umugisha, turashima. Ntacyo nyishinja yambereye imfura.

IGIHE: Wakunze kuvugwa mu nkuru z’urukundo ukaruca ukarumira. Twitegure ubutumire ryari?

Ashimwe: (Aseka) Mu by’ukuri sinjya mvuga kuri iyo ngingo, nyifata nk’ubuzima bwanjye bwite. Nshobora kuyiganiraho n’inshuti zanjye za hafi gusa ariko simbishyire mu itangazamakuru. Ibiri ngombwa urabivuga ariko kuba icyamamare, ntibikuraho ko hari ibiguma ari ibyawe bwite.

IGIHE: Wumva ari yo nzira umuhanzi ukunzwe n’uwashaka kukwigiraho akwiye gukoresha?

Ashimwe: Si byiza ko gukundana n’umuntu biba nk’itangazo ryihutirwa. Hari aho umuntu akundana n’uwe ugasanga murishimira kwamamara kwabyo ari naho rimwe na rimwe hava kutizerana no gukekana. Hari igihe iyo mwakinguriye amarembo abantu bose, umubano wanyu winjirwamo n’abatawishimiye, mukarwana iyo ntambara mutagoheka.

IGIHE: Utekereza iki ku mvugo yuko abizerana badakwiye guhisha amarangamutima y’urukundo mu ruhame?

Ashimwe: Buriya se ni ko kuri? Hari abantu birirwa babwirana amagambo aryoshye ku mbuga nkoranyambaga n’imbere y’imbaga bahisha ibitagenda neza.

Simvuga ko kubitangariza abandi benshi ko umugore cyangwa umugabo wawe umukunda ari bibi, ni byiza cyane rwose, ariko ntibihinduke ihame ridakuka nk’aho ari yo nzira ikwiye yerekana urukundo rw’ukuri.

IGIHE: Hari abavugabutumwa bavuga ko gushinga urugo kare bikingira ibishuko? Niko ubibona?

Ashimwe: Sinzi icyo abavuga ibyo bashingiraho. Njye simbibona kimwe na bo. Aho mpita nibaza icyo bita “hakiri kare” ni iki? Babipima bate? Gushaka ni igikorwa kitagirwamo uruhare n’igitutu cy’amajwi y’abantu, ni icyemezo gifatwa n’umuntu kandi yabitekerejeho bitewe n’ishusho y’urugo yifuza.

Hari abashinga ingo ariko ingeso bahoranye kera ikabananira, bagaca inyuma abo bashakanye kandi twari tubazi nk’abakozi b’Imana. Umuntu ntarindwa no kubikora kare cyangwa atinze, ahubwo biterwa n’uko asanzwe.

IGIHE: Mu 2017 ubwo ADEPR yari mu bibazo, byavuzwe ko wayobotse irindi torero. Byarabaye?

Ashimwe: Ntuzakore ikosa ryo guhunga ikibazo kuko nta kikwemeza ko aho ugihungiye ari shyashya. Iyo uhunze ikibazo uko byagenda kose ntubura kongera guhura nacyo cyangwa ikikirenze. Guhunga ikibazo si byo bigikemura ahubwo ni byiza gufatanya gushaka igisubizo kirambye. Umugabo rero ni uhangana n’ikibazo, akagishakira umuti aho kugihunga.

Simba mu buyobozi bwa ADEPR ndi umukirisitu usanzwe ariko ibyariberagamo nabikurikiranaga nk’abandi. Hari inshuti zanjye zabonye bimeze nabi zirigendera, tujya duhura iyo natumiwe mu bitaramo mu matorero zerekejemo.

Iyo ngira gahunda yo kuva muri ADEPR byari kuba cya gihe tugongana kubera Salax Awards nahawe bavuga ko ari iy’abapagani ngo sinagombaga kuyakira.

IGIHE: Ugirana ibibazo na ADEPR ntiwatekereje kuyivamo ugakurikira inzira y’abahiriwe no gushinga ayabo matorero?

Ashimwe: Kugenda ntibitangaje kuko kwihangana kw’abantu ntikungana. Ukuri guhari ni uko gushinga itorero ari umuhamagaro w’Imana; si nkuko ubyuka ufite amafaranga ugashinga ikipe y’umupira cyangwa iduka.

Sinabitekereje kandi si n’umuhamagaro wanjye cyane ko ubwiyongere bw’insengero atari ikimenyetso ko abazishinga bose bahamagariwe kubikora. Rimwe na rimwe biba bifite n’izindi mpamvu zinyuranye zibiri inyuma.

IGIHE: Nk’umuhanzi uhimbaza Imana uvuga iki ku bwiyongere bw’insengero bwanatumye zimwe zifungwa?

Ashimwe: Nibajije mpamvu ki insengero ziyongera ariko ibyaha ntibigabanuke. Mu gihugu gifite abakirisitu benshi, inzego zishinzwe umutekano ntizihura n’akazi kenshi kuko abantu bahindurwa n’ibyo bigishwa n’abashumba babo iyo ari bizima koko.

Ese abigishwa ni bo batumva ngo banashyire mu bikorwa ibyo bigishwa cyangwa ikibazo ari abashumba badatanga iby’ukuri bikwiye guhabwa intama bayoboye?

Ntekereza ko abashumba b’amatorero n’abarota kuzayashinga ari bo bafie igisubizo kirambye. Gushinga itorero si ikibazo, wabirebera ku mpamvu n’intego byakoranywe.

IGIHE: Kera wishyuzaga ibitaramo byawe, uza kubihagarika. Ni iyerekwa rishingiye kuki?

Ashimwe: Ibitaramo nahereyeho kera narabyishyuzaga kandi abantu bakabyitabira cyane. Abari bahari muri ibyo bihe barabyibuka. Nanzuye kutazongera kwishyuza mu bitaramo byanjye ku mpamvu ntashyira mu itangazamakuru. Ibindi bijyanye no kugurisha CD birakomeza.

Njye kuririmba simbikora nk’umwuga, ni umuhamagaro gusa. Icyo nkora ni ugushaka akandi kazi kambeshaho n’umuryango wanjye. Ayo ni yo mahitamo yanjye kandi numva nyuzwe.

IGIHE: Abahanzi babikora mu buryo butandukanye n’ubwawe ubavugaho iki?

Ashimwe: Nta we ncira urubanza! Nta n’umuntu ku Isi numva akwiye gucira undi urubanza kuko buri wese afite uko yahamagawe n’uko azabazwa ibyo yahamagariwe.

Abahanzi bagenzi banjye mpa agaciro kanini umurimo bakora nk’abakozi b’Imana, ndabibubahira cyane. Icy’ingenzi ni uko byose bigira umusaruro mwiza mu Bwami bw’Imana.

IGIHE: Mu gitaramo gisoza 2018 watumiwemo muri ADEPR ku Gisozi, wakomoje ku buzima bushaririye wakuriyemo. Kuki wahisemo kuvugira mu migani?

Ashimwe: Nashakaga kubwira abantu ko Imana ikora ibikomeye ari nayo ikora ibyoroheje. Hari ubuzima busharira twabayeho iwacu butuma njye n’abo tuvukana twibaza niba buzahinduka. Twibazaga niba hari igihe tuzarya tugahaga, umunsi uzabaho tukanywa igikoma kirimo isukari, niba igihe kizagera tukicara mu ishuri, tukiga dutuje tudafite ubwoba bw’abadusohora kubera amafaranga y’ishuri n’ibindi.

Mu mashuri yisumbuye nabuze diplôme ntari umuswa ahubwo kuko nageraga mu ishuri gake kubera kwirukanirwa amafaranga n’impuzankano yasaza kubona indi bikagorana.

Natanze ubuhamya nshaka gukomeza ufite umutima uhagaze bitewe n’ubuzima arimo. Sinterwa isoni no kuvuga ibyo Imana yankoreye n’iyo byakumvikana nk’ibisekeje. Ndi umuhamya w’uko Imana ijya ihindura amateka, ikarema ubuhamya bushya.

IGIHE: Ni iki uhishiye abakunzi bawe mu mwaka wa 2019?

Ashimwe: Umwaka wa 2019 mfitemo gahunda zagutse z’umurimo w’Imana. Hari indirimbo nshya ndi gutunganya zitangira gusohoka vuba. Uyu mwaka nzawukoramo n’igitaramo kinini nise “The Proof Of Heaven” kizabera i Kigali ku wa 30 Kamena 2019.

Ashimwe aritegura gukora igitaramo gikomeye ku wa 30 Kamena 2019, yise “The Proof Of Heaven”
Ashimwe Dominic ari mu bahanzi bakunzwe cyane mu babarizwa mu Itorero rya ADEPR
Umwaka wa 2018 wasigiye urwibutso Ashimwe Dominic, ku nshuro ya mbere yakoreye ivugabutumwa ry’indirimbo ku Mubagane w’u Burayi, ataramira mu Mujyi wa Bruxelles mu Bubiligi aho yamaze ibyumweru bibiri
Uyu muhanzi yamamaye kuva mu myaka 10 ishize mu bihangano birimo “Nemerewe kwinjira’’, “Ashimwe”, “Ndishimye”, “Azanyibuka’’ n'ibindi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza