Intashyo zo ku musozi wa Ndengwa kwa Mwiseneza, wagiye muri Miss Rwanda n’amaguru (Amafoto & Video)

Yanditswe na Uwiduhaye Theos
Kuya 27 Ukuboza 2018 saa 11:45
Yasuwe :
0 0

Abakurikiye ijonjora ry’ugomba kuba Miss Rwanda 2019 ryabereye mu Karere ka Rubavu, bamenye Mwiseneza Josiane wakoze urugendo rurerure n’amaguru agana aho ryabereye, biranamuhira yemererwa gukomeza mu kindi cyiciro, ababonwaga nk’ibizungerezi abereka igihandure.

Ku wa 16 Ukuboza 2018 nibwo Mwiseneza yubatse izina, ku mbuga nkoranyambaga amafoto ye n’amashusho biratambagizwa ndetse abandi baca hirya no hino bashakisha nimero ye ya telefoni.

IGIHE yamusuye mu mudugudu wa Ndengwa, Akagari ka Kibirizi mu murenge wa Rubengera, i Karongi mu Ntara y’Iburengerazuba.

Ni urugendo rw’amasaha asaga atatu uturutse i Kigali, kuko umunyamakuru yahagurutse saa tatu n’igice za mu gitondo akagera iwabo saa sita zishyira saa saba.

Ku musozi wa Ndengwa, Mwiseneza ntagipfa gusohoka mu rugo kuko arangaza abaturanyi, babonye ko yambaye isura itandukanye n’iyo bamaze imyaka 23 bamuziho.

Iyo agize aho ashaka gutarabukira arisakasaka agatega moto, mu gihe mbere nko kujya mu Mujyi wa Karongi byari ukwikozayo n’amaguru. Kugerayo uvuye iwabo ni nk’ibikometero bitanu.

Mu baturanyi naho igikuba cyaracitse. Mukankusi Gwiza Anne Marie uturanye n’iwabo wa Mwiseneza, yabwiye IGIHE ko mbere bumvaga irushanwa rya Miss Rwanda ari iry’abanyamujyi gusa.

Ati “Natekerezaga niba ari Josiane twirirwana akubura, aharura yahirira inka, nkumva sibyo. Ubona abaturage baracitse igikuba bibaza uwamwoheje bikabayobera. Ariko ni ukuri turamushyigikiye kandi dutewe ishema no kuba ahagarariye agace kacu.”

Mwiseneza ni umuhererezi mu bana batandatu, ubu abana na nyina gusa. Afite uburebure bwa 1.70 n’ibiro 57. Yasoje amashuri yisumbuye mu byerekeye icungamutungo mu mwaka ushize.

Ubwo yitabiraga ijonjora rya Miss Rwanda wabonaga umusatsi we ukiri karemano ndetse ari muremure, ubu byarahindutse yatangiye kwikoraho, umusatsi yarawugabanyije arawusiga arawunogereza.

Imvano yo kwitwabira Miss Rwanda…

Mwiseneza avuga ko yakuze akunda amarushanwa ya Nyampinga w’u Rwanda, ariko igitekerezo gikomeye cyamujemo mu mwaka ushize, yanzura kuyitabira.

Ati “Mu 2017 nkisoza amashuri yisumbuye nahise numva binjemo cyane, numva ndabikunze birusha mbere. Byabaye akarusho numva ko inzozi zanjye ngomba kuzishyira mu bikorwa byanga bikunze.”

Icyo gihe ngo yatangiye kwitoza intambuko ya ba Nyampinga, agafata bagenzi be bakajya mu cyimbo cy’akanama nkemurampaka, akabatambuka imbere. Nyuma nibwo yiyemeje guhatana n’abandi bakobwa b’igihugu cyose.

Yahagurutse i Rubengera agana i Rubavu ku mufuka we afite 6000Frw gusa, yagombaga gukoresha ibyo akeneye byose. Icyo gihe ibyo gutunganya umusatsi ntiyari kubibonera ubushobozi.

Ati “Naturutse iwacu i Rubengera nerekeza ku Nyundo aho nari gucumbika kwa Masenge, mfite 6000 Frw. Ugereranyije n’urugendo nari mfite rwo kuva iwacu ngera i Rubavu nkishyura 2500 Frw, ukongeraho azangarura iwacu, numvaga bitazakunda ko mbona n’ayo kumvana mu mujyi wa Rubavu.”

Ni iyo mvano yo kuva i Rubavu n’amaguru agana i Nyamyumba, urugendo moto yishyurwa agera ku 1000Frw kandi ari kaburimbo. Google Maps igaragaza ko ari urugendo rw’ibilometero 10.8.

Agahanga umugenzi kaba iyo agiye…

Uyu mukobwa yageze kuri bagenzi be yasitaye ku ino ry’ibumoso, ndetse n’ababonye amafoto ye bamubazaga uko byamugendekeye.

Ati “Nkiva mu modoka ngeze mu mujyi wa Rubavu ngiye kwerekeza i Nyamyumba ahaberaga ijonjora, nibwo nasitaye bitewe no kugenda nihuta nambaye n’inkweto zisa nk’aho ari ndende.”

Mu bavandimwe be nta wamenye ibyo kujya muri Miss Rwanda

Mukuru wa Mwiseneza witwa Dushimimana Olive, yabwiye IGIHE ko umuvandimwe we yagiye muri Miss Rwanda ari nyina wenyine ubizi, bagatungurwa no kumubona mu bitangazamakuru.

Ati “Ubundi yavuye aha ku wa Gatandatu tariki 15 Ukuboza avuga ko agiye gusura nyirasenge utuye ku Nyundo. Twumva ni ibintu bisanzwe nta kibazo. Mu mugoroba nakomeje kubaza mama nti ‘ese ko Josiane ko yagiye ku Nyundo bitunguranye ni amahoro ?’ Bigoranye cyane Mama arambwira ko agiye kwitabira irushanwa rya Miss Rwanda ariko ko yamubujije kugira undi muntu abibwira.”

“Akimara kubimbwira rero numvise bintunguye numva bidashoboka, numva najya no kumuzana kuko sinabyiyumvishaga.”

Ngo uko amasaha yagiye akura yagiye atuza akumva ko byarangiye, ariko ku mutima akiha amahoro kuko yumvaga Josiane “atazatambuka mu irushanwa” yatekerezaga ko ari iry’abanyamujyi.

Bigeze ku Cyumweru mu ma saa munani ngo yatunguwe no gusanga mu itangazamakuru murumuna we “yabaye igitaramo, ngo umukobwa waje n’amaguru yabonye Yes ebyiri, ngo akanama nkemurampaka kagiye kwanzura abarakomeza.”

Ati “Twese twaguye mu kantu! Mu ma saa kumi n’imwe nibwo nasubiye kuri internet ntungurwa no gusanga yakomeje. Ariko numva ko byarangiye igisigaye ari ukumushyigikira kugira ngo urugendo yatangiye arugereho.”

Dushimimana yemeza ko umuvandimwe we ari umukobwa utava ku izima, kandi ko icyo yiyemeje aruhuka akigezeho.

Ati “Josiane mu busanzwe ni umuntu wiyemeza ikintu akagirukirana mpaka akigezeho, kuva no mu bwana bwe! Wamwereka ko bidashoboka cyangwa se bikomeye… ni ukuvuga ngo we ntajya ava ku izima arakomeza agahanyanyaza.”

Umushinga wa Mwiseneza wanyuze akanama nkemurampaka

Mwiseneza avuga ko ajya muri Miss Rwanda yatekerezaga kurwanya inda ziterwa abangavu, akagena uburyo bwo kuganira nk’urubyiruko, hagashakwa umuti w’icyo kibazo.

Ati “Harimo n’ubutumwa nzajya ngenera ababyeyi bakajya baganiriza abangavu cyane ku buzima bw’imyororokere. Nibyo nabonaga bibangamye cyane.”

Ashyigikiye ko udukingirizo dukwirakwizwa mu bangavu kugira ngo babashe kwirinda, ibyo binaniranye hagashyirwaho ingamba abakobwa bagashyirwa muri gahunda yo kuboneza urubyaro.

Ati “Kuboneza urubyaro umuntu atarabyara ni ibindi bindi. Njye ndabishyigikiye kuko biterwa impamvu nyinshi. Hari igihe baba bafite irari akabona iby’agakingirizo atazabibasha. Kuri njye nta kibazo.”

Uyu mukobwa avuga ko kuba yarabashije kuza mu bakobwa barenze ijonjora ryo mu ntara yizeye ko n’ibindi bizashoboka.

Ati “Icyizere mfite ndagikura ku kuba narabashije gutangira kugera ku byo niyemeje. Kuba byonyine naraje mu irushanwa nkemera nkavunika nkaza n’amaguru, ni igihamya cy’uko mfite inyota yo guteza imbere umuryango nyarwanda.”

Urusisiro rwaguye mu kantu!

Umuturanyi wa Mwiseneza witwa Mukankusi Gwiza Anne Marie, yemeza ko uyu mukobwa yatunguye agace k’iwabo kuko yakoze ibyo batatekerezaga.

Ati “Nari ndi mu nzu ndi kureba televiziyo, ngiye kubona mbona Josiane ngo ari kwiyamamariza kuba Nyampinga w’u Rwanda 2019. Byaradutunguye cyane nkajya mbwira umugabo nti ese uriya ni Josiane nsanzwe nzi?”

Amaze kubona neza ko ari we, ngo yahise asohoka mu nzu ajya iwabo kubaza neza iby’iyi nkuru, asanga bo bamaze kubyakira.

Ati “Byari byanteye isoni, byandenze kuvuga ko Josiane yaba agiye kwiyamamariza muri Miss Rwanda. Narakomeje nganira na mukuru we ngeze aho ndamubza nti ese ko nabonye umukobwa musa muri Miss Rwanda ni wowe? Arabyemera anambwira ko ari ibintu yatekerejeho igihe kinini.”

“Njye ariko nakomeje gushidikanya nkumva siwe. Turakomeza dutera ibiparu, abandi bagatangira kugenda babivuga hano mu mihanda … ariko rwose Josiane yaradutunguye.”

Abo kwa Josiane bose bahuriza ku kuba barumvaga ko irushanwa rya Miss Rwanda ari iry’abanyamujyi, bumva umukobwa wabo atahatana ngo akomeze mu irushanwa. Gusa baje kubona ko umuntu wese afite amahirwe, hatarebwe aho aturuka.

Abaterankunga babaye uruhuri

Mwiseneza avuga ko ubuzima bwe bwamaze guhinduka kubera abantu benshi bari kumuhamagara, barimo abifuza kumufasha mu rugendo agiye gutangira rwo guhatanira ikamba rya Nyampinga w’u Rwanda wa 2019.

Ati “Ubuzima bwahindutse cyane! Abantu bari kumpamagara buri kanya, hari n’abo nabonye batangiye kunyiyitirira ku mbuga nkoranyambaga zitandukanye.”

“Abantu benshi bashaka kumfasha bari mu byiciro bitandukanye hari abashaka kuzanyambika, kunshakira icumbi ryo kubamo i Kigali, amatike, make up n’ibindi.”

Biteganyijwe ko abazagera mu cyiciro cya nyuma muri Miss Rwanda bazamenyekana ku wa 5 Mutarama 2019 bagatangira umwiherero, Miss Rwanda mushya akamenyekana ku wa 26 Mutarama 2019.

Mwiseneza yifotoreza ku irembo ry'iwabo i Rubengera
Mwiseneza ashimangira ko yifitiye icyizere ku buryo azagera kuri byinshi
Mwiseneza ahamya ko kwitabira amarushanwa y'ubwiza byamujemo asoje amashuri yisumbuye
Aha niho mwiseneza n'abavadimwe be batuye, babana na nyina gusa kuko Se yitabye Imana
Mwiseneza yifitiye icyizere muri Miss Rwanda
Ku muharuro wa kwa Mwiseneza ni uko hateye
Mukankusi Gwiza Anne Marie uturanye no kwa Mwiseneza avuga mu rusisiro rwabo baguye mu kantu bumvise akomeje muri Miss Rwanda 2019
Mwiseneza yifotozanya na mukuru we Dushimimana Olive
Mwiseneza yabanje kwiyandikisha yitwaje ibimuranga

Amafoto ya Mwiseneza ubwo yari yitabiriye Miss Rwanda i Rubavu

Kimwe n'abandi bakobwa, abateguye irushanwa babanje kumupima uburebure harebwa niba yujuje ibisabwa
Mwiseneza yari afite n'igikomere ku ino ry'ibumoso
Ubwo Mwiseneza yari imbere y'akanama nkemurampaka
Kubera ubushobozi buke, nyuma yo gutsindira gukomeza muri Miss Rwanda, Mwiseneza yafashe umuhanda arataha
Aha yavaga muri Nyamyumba yerekeza i Rubavu mu mujyi
Kuva mu mujyi wa Rubavu ujya i Nyamyumba harimo ibilometero bigera ku 10

Amafoto na video: George Salomo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza