Byinshi kuri Musenyeri Bilindabagabo Alexis umaze imyaka 27 ari umushumba muri Angilikani

Yanditswe na Hakizimana Jean Paul
Kuya 22 Nzeri 2018 saa 10:42
Yasuwe :
0 0

Musenyeri Bilindabagabo Alexis, ni umwe mu nkingi z’Itorero ry’Abangilikani mu Rwanda, akaba ari n’Umushumba wa Diyoseze ya Gahini. Ni umugabo wibitseho amateka menshi dore ko uretse kuba ari Musenyeri anahagarariye amadini n’amatorero muri gahunda yo kurwanya ibiyobyabwenge mu Rwanda.

Bilindabagabo akaba yitegura kujya mu za bukuru aho azasimburwa na Gahima Manasseh.

Bilindabagabo yaganiriye na IGIHE atubwira bimwe mu byo ateganya gukora mu kiruhuko cy’izabukuru n’andi mateka menshi yerekeye ubuzima bwe.

IGIHE: Musenyeri Bilindabagabo ni muntu ki?

Bilindabagabo: Nitwa Bilindabagabo Alexis. Navutse mu 1955 mvukira ahitwa i Nyage mu Karere ka Gisagara mu Ntara y’Amajyepfo. Bitewe n’amateka y’igihugu cyacu amashuri yisumbuye nayize i Gitwe, niho honyine mu Rwanda habaga ishuri ryigenga, Kaminuza nayize mu Ishuri rya Tewologiya muri Kenya mfite kandi n’impamyabumenyi y’ikirenge (PhD) nahawe n’imwe mu ma kaminuza yo muri Amerika.

Mfite abana batandatu n’abandi batanu ndera. Bose ni 11.

IGIHE: Mwabaye Pasiteri mu wuhe mwaka? Muhabwa inshingano z’ubushumba ryari?

Bilindabagabo: Mu 1985 nabanje kuba Umudiyakoni hanyuma mu 1986 ndobanurirwa kuba Pasiteri. Ni cyo gihe nashatse umugore urumva ko imigisha yaziye rimwe. Ubupasteri nabuherewe muri Diyoseze ya Butare nyuma bahita banyohereza kujya gukomeza amashuri muri Kenya mvuyeyo nkora imirimo myinshi yo mu itorero yari igamije kurushaho kurizamura. Icyo gihe nayoboye urubyiruko rwose rwo muri Diyoseze ya Butare yari nini cyane ubu yakaswemo izindi diyosezi enye.

IGIHE: Wahawe ubwepisikopi ryari?

Bilindabagabo: Nabuhawe mu Ugushyingo 1991. Ubu maze imyaka 27 mu buyobozi bukuru bw’itorero. Ntekereza ko muri iki gihugu ndi mu baburambyemo cyane uteranyije amadini n’amatorero yose hano mu Rwanda.

Maze guhabwa ubwepisikopi, nahise njya gutangira Diyoseze nshya i Kamembe muri Cyangugu. Icyo gihe ntabwo byari byoroshye kujya gutangiza itorero ahantu hatari Paruwasi n’imwe hatari n’abakirisitu bacu nsanze. Kubera Imana twagiyeyo bigenda neza ndabyibuka nagombye kwitwaza abadiyakoni babiri kugira ngo bamfashe gusoma ibice.

Nyuma nakomereje no mu zindi diyoseze zitandukanye kugeza ku wa 25 Gicurasi 1997 ubwo bampaga kuza gutangiza Diyoseze ya Gahini aha akaba ari naho nkiri n’ubu. Mpamaze imyaka 21.

IGIHE: Imyaka 27 irashize uri Umwepisikopi w’Itorero, ni iki cyagufashije kuyobora iyo myaka yose?

Bilindabagabo: Navuga ko nafashijwe n’ibintu bibiri. Icya mbere ni ukuba umuntu w’Imana, impamvu iyo ubaye umuntu w’Imana nta byaha ukora, nushatse kukugirira nabi biramugora cyane kuko asanga ufite ubuhamya bwiza. Ubu iyo ngendagenda ahantu runaka ngenda nemye kuko nta byaha runaka nshinjwa.

Icya kabiri ni ukutaba umunebwe, nkunda gukora cyane kandi ni byiza hari nkaho nageraga nkahasanga abantu bagashaka kumpima ariko kuko nari naramenyereye gukora iyo nabahaga imirimo ntibayikore narayikoreraga. Ibi ni byo byamfashije.

Musenyeri Bilindabagabo Alexis agiye kujya mu kiruhuko cy’izabukuru nyuma y’imyaka 27 ari umushumba mu itorero Angilikani

IGIHE: Ni ibihe bihe wibuka wagize ku buryo utazabyibagirwa?

Bilindabagabo: Ni igihe nari Pasiteri wa Paruwasi ya Hanika [ubu ni mu Karere ka Nyanza]. Niba ntibeshye icyo gihe nagezeyo turi abakirisitu 200 mvayo dukabakaba 4000. Icyo gihe abantu barakizwaga ukabona ko koko bavuye mu byaha neza neza.

Ni ahantu habaga abakirisitu banezezaga cyane kuko twashyiraga hamwe cyane. Reka nkuhe nk’urugero, hari abana baciye kuri bariyeri barabahagarika bati ‘kuki mugenda kandi muri mwe harimo Abahutu n’Abatutsi?’ Abana barabasubiza bati ‘twese turi abana b’Imana ibindi muvuga ntabyo tuzi.’ Mbese wabonaga ari itorero rishyize hamwe cyane nubwo icyo gihe bitari byoroshye.

IGIHE: Ni izihe mbogamizi mwibuka zikomeye mwahuye na zo mu murimo w’Imana?

Bilindabagabo: Imbogamizi nahuye na zo ni ukwizera abantu cyane bakampemukira. Hari nk’igihe hazaga nk’umupasiteri warangiza ukabona akoze ibyo utamukekeraga umuntu ukamushyira mu mwanya runaka w’ubuyobozi umwizeye warangiza ugasanga wa mwanya arawukoresha akugambanira cyangwa akawukoresha mu nyungu ze bwite.

IGIHE: Ni iki wishimira nka Diyoseze ya Gahini uyoboye yagezeho?

Bilindabagabo: Ikintu nishimira cyane twagezeho ni ukubaka urusengero rwiza (Cathédrale) kandi rukomeye rukaba rufite agaciro karenga miliyoni 700. Ni rwiza kandi rurakomeye. Ikindi ni uko abapasiteri mfite ubu uko ari 60 muri Diyoseze yose uretse umwe gusa abandi bose ninjye wabatoranyije. Abenshi mbazi kuva bakiri abana baririmba muri korali urumva nibyo kwishimira kuko bose ngiye mbafiteho ubuhamya kandi bwiza bituma nshobora kukubwira nti ‘uyu ashoboye iki uyu yabasha iki.’

IGIHE: Ni uruhe ruhare rw’amadini n’amatorero mu kugarura ubumwe n’ubwiyunge mu Banyarwanda nyuma ya Jenoside yakorewe Abatutsi?

Bilindabagabo: Navuga ko amadini n’amatorero yagize uruhare runini mu kwihana kwa benshi kuko umuntu yarazaga akihana ndetse agasaba n’imbabazi biturutse ku butumwa bwiza amatorero yigishaga. Mbona byaratanze umusaruro.

IGIHE: Ni iki wumva utakoze wasaba uzagusimbura ko yazashyiramo imbaraga?

Bilindabagabo: Umushinga wo kubaka Kaminuza hano i Gahini nifuza ko yazawukora. Undi ni umushinga wo kubaka Ikigo cy’Ububyutse kizahuriramo abo muri Afurika y’Uburasirazuba.

IGIHE: Ninde muntu ufataho nk’icyitegererezo?

Bilindabagabo: Icyitegererezo kuri njye ni Yesu kuko ni we nkunda kurebaho cyane. Mu bantu ba hano ku Isi navuga databukwe Pasiteri Kayizari André, yari umuntu w’inyangamugayo. Iyo wajyaga kumugisha inama yaguhaga inama nzima pe.

IGIHE: Ni iyihe mirimo ugiye guhugiraho nyuma yo gusoza kuyobora itorero?

Bilindabagabo: Hari byinshi byo gukora. Aka kanya sinavuga ngo nzakora iki n’iki kuko hari byinshi nshobora gukora ariko icy’ingenzi ngiye kubanza gukora ni ugusenga Imana ikanyereka icyo ngomba gukora. Ariko mu byo nzakora harimo korora kuko mbikunda ndetse no kubyutsa siporo nkunda cyane Tennis de Table.


IGIHE: Iyo utaza kuba Musenyeri wari gukora iki?

Bilindabagabo: Iyo ntaza kujya mu murimo w’Imana nari gucuruza ahubwo nari narabitangiye nkiri umusore, hari umuntu twajyaga tujyana kugura ihene ubundi tukongera tukazigurisha. Nakuze numva nzikorera, intego yanjye yari uko nzatunga amafaranga menshi.

IGIHE: Ni iyihe nama wagira urubyiruko rw’iki gihe yarufasha gutera imbere?

Bilindabagabo: Inama nabagira ni ugukura amaboko mu mufuka bagakora bakareka kuba abanebwe. Urubyiruko rw’iki gihe ntabwo rushaka kwivuna nyamara ntacyo wageraho utavunitse. Ikindi nibamenye gutekereza kure ntibumve ko mu Rwanda ariho bakorera gusa bashakishe n’ahandi. RwandAir isigaye igera henshi n’igihugu cyacu cyafunguye imiryango ahantu henshi hose nibajyeyo bashakireyo ubuzima birinde guhemuka barebe ko badatera imbere.

Musenyeri Bilindabagabo (Hagati) amaze imyaka 27 ari umushumba mu itorero ry'Angilicani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza