Aho kuba Padiri w’umutindi nahisemo kujya aho barongora – Ikiganiro kirambuye na Pasiteri Antoine Rutayisire

Yanditswe na Emma-Marie Umurerwa
Kuya 31 Mutarama 2019 saa 12:11
Yasuwe :
0 0

Umushumba w’Itorero Angilikani muri Paruwasi ya Remera, Pasiteri Antoine Rutayisire, yavuze ku cyatumye ataba padiri kandi yarize mu iseminari, urugendo rwe nk’umupasiteri, impamvu hari abamwita umunyapolitiki n’uburyo abona ingingo zitandukanye zireba ubuzima bw’igihugu.

- Mu mashuri abanza, umwaka wa mbere n’uwa kabiri yabyigiye rimwe

- Umutingito wo mu busore watumye areka ubupadiri

- U Rwanda rumeze nk’umukobwa mwiza wavukiye mu mujyi

Pasiteri Rutayisire yavukiye mu Murenge wa Kiramuruzi mu Karere ka Gatsibo mu 1958, yiga amashuri yisumbuye mu Iseminari nto i Zaza, akomereza muri Kaminuza Nkuru y’u Rwanda no mu zindi zitandukanye mu Bwongereza no muri Leta Zunze Ubumwe za Amerika. Afite impamyabushobozi y’Ikirenga mu bijyanye n’imiyoborere.

Mu kiganiro kirambuye yagiranye na IGIHE, yavuze byinshi ku buzima bwe, uko yakuze, uko yize amashuri abanza n’ayisumbuye n’ibindi.

IGIHE: Bivugwa ko utize umwaka wa mbere w’amashuri abanza. Byagenze bite?

Rutayisire: Nize umwaka wa mbere n’uwa kabiri mu mwaka umwe njya mu wa gatatu. Ubwo sinzi uwo ntize. Nagiye kwiga nzi gusoma ariko ntazi kwandika, gusoma nari narabyiyigishije nkoresheje igitabo cy’Igifaransa nari naratoraguye, nkajya mbaza abana nti iyi nyuguti yitwa ngwiki bakambwira hanyuma nkaziteranya.

Ngeze mu ishuri mwarimu yabaza ati iyi nyuguti yitwa ngwiki nkamanika, aragenda ansabira kwigana n’abo mu wa kabiri.

IGIHE: Ni ayahe makosa wibuka wakoze muri iyo myaka?

Rutayisire: Ndi umwana nari inkubaganyi, ubwa mbere nibuka nakubiswe na Papa. Hari ukuntu ndi umunyabugeni, nari narabonye igishushanyo cy’Imparage. Papa rero yakundaga imbwa, mfata ikibwana cy’imbwa yari yaciririye, nzana amase y’inka n’ingwa, ikibwana ndagisiga kiba Imparage.

Nareba ibyo nakoze nkavuga nti barankomera amashyi. Noneho Papa atashye ikibwana ndagihamagara tujya kumusanganira, akubise ikibwana cye amaso yarankubise.

Indi shuro nakubiswe na Mama, ankubitira mu ruhame. Umunsi umwe ari ku wa Kabiri ntwara impamba ngiye ku ishuri sinajyayo, njyana n’undi mwana impamba turayirya turangije tujya ku isoko twirirwa yooo […] nari mfite data wacu wakoraga amagare, yashoboraga kumpa amafaranga nkarya ibintu bitaga ibitumbuwa, arabingurira ndarya. Ntaha nimugoroba.

Ku wa Gatatu ngiye ku ishuri nsanga mwarimu yarakaye, ati abana mwese mutize mujye kuzana ababyeyi […] tugeze ku ishuri mwarimu aramubaza ati ‘kuki wamusize ku rugo ukajya ku isoko?’ Mama yantumye inkoni arangije andyamisha hasi arankubita koko!

IGIHE: Kuki utabaye Padiri kandi warize mu Iseminari?

Rutayisire: Ibyo kutaba Padiri ni impamvu zanjye bwite […] Sinjya mbeshya ngo mvuge ngo ni uko numvaga ubupadiri ntabushaka. Urabizi iyo umuntu afite imyaka 19 ari umuhungu, hari imitingito iba imaze kuba myinshi mu mubiri kandi wareba hanze ukabona inkumi zose zabaye nziza.

Ukareba kuzaba ingaragu y’umupadiri, inkumi nziza hariya, imitingito mu mubiri nkumva bitazahura. Rero aho kugirango mbe padiri w’umutindi ugenda nkabyara abana ngasambana n’abagore b’abandi, mpitamo kujya aho barongora.

Rutayisire avuga ko yanze kujya mu gipadiri ngo hato atazananizwa n'uburyo yagombaga kubaho

IGIHE: Abandi bapasiteri bavuga ko uri umunyapolitiki. Kubera iki?

Rutayisire: Iyo nshaka kuba umunyapolitiki wenda mbere ya 1994 byari kungora kubera politiki twari dufite y’irondakoko, ariko nyuma ya 1994 amashyaka yose yari afunguye, nari mfite ‘masters’ mfite ‘licence’ kandi atari muri tewolojiya, mfite n’inararibonye mu bintu bitandukanye. Iyo nshaka kuba umunyapolitiki ntabwo mba narabuze umwanya.

Abantu benshi baravuga ngo Antoine ni umunyapolitiki kuruta ko ari umupasiteri, ariko ikintu kintangaza ni uko bahindukira bakantumira ngo njye kwigisha mu biterane by’abarokore. Nkavuga nti ‘ese niba ikiranga umupasiteri ari ukwigisha neza nkaba mfite Itorero ririmo abakirisitu buzuye urusengero, kuki batambona nk’umupasiteri bakambona nk’umunyapolitiki?’

Iyo wigishije ukavuga ku bibazo by’igihugu, ukavuga ku bahutu, ukavuga ku batutsi ukavuga ku batwa, abantu baratangira bati eee uriya muntu aravanga politike n’Itorero […] iyo wigishije ku bibazo biriho bumva wabaye umunyapolitiki, iyo utangiye guhuza ijambo ry’Imana n’ubuzima bwa buri munsi.

Iyo utangiye guhuza ijambo ry’Imana na politike y’igihugu bahita bakubonamo umunyapolitiki, abarwaye imvunja ngo icyo si ikibazo cya pasiteri, ubumwe n’ubwiyunge bw’abanyarwanda, inzangano zabo, mbese pasiteri avuga ivanjiri nziza y’ubwami bw’Ijuru. Ubundi ibyo ni ibibazo bahunga baba badashaka kubivugaho badashaka kubikoraho. Aho dufitemo ikibazo cy’imyumvire kandi njye siniteguye guhinduka.

IGIHE: Nk’umuntu wakoze muri Komisiyo y’Ubumwe n’Ubwiyunge, mubona bugeze ku ruhe rugero?

Rutayisire: Abantu bamwe barakubwira ngo byaratunganye, abandi bakavuga ngo ntibiratungana. Njye ndavuga ngo turi mu rugendo. Kunga abantu ni nko kunga igufwa ryavunitse, bitwara igihe kandi n’iyo rikize burya ntabwo riba rikomeye nk’iritaravunitse.

Twarabikoze ariko haracyarimo utuntu […] nureba mu gipimo cy’ubumwe n’ubwiyunge gikorwa buri mwaka, hari indwara imwe itarakira yitwa ‘urwikekwe’ […] urwikekwe rurahari, utarwemera uwo ameze nka ya nyoni ibona ifite ibibazo igashinga umutwe mu gihuru ikavuga ngo ubu noneho nta bibazo bihari kandi bihari.

IGIHE: Nyuma y’ibihe u Rwanda rwanyuzemo, ubona ute imiyoborere igihugu gifite?

Rutayisire: Imiyoborere yo mu Rwanda irivugira, iterambere ry’abaturage ririvugira, ibikorwa remezo dufite birivugira, ishyaka, umurava, kuvugwa neza hanze birivugira, ariko reka twe kwitiranya imiyoborere n’umuntu kuko imiyoborere y’u Rwanda irimo abantu benshi.

Muri rusange tumeze neza ariko ntibibuza ko hari utundi duce tugikeneye kwigiza imbere […] imiyoborere muri rusange tumeze neza, ariko iyo winjiye mo neza turacyafitemo urugendo.

IGIHE: Ku mibanire y’u Rwanda n’amahanga, ubona bihagaze gute?

Rutayisire: Aka Karere sinzi icyo dupfa nako. Burya u Rwanda rumeze nk’umukobwa mwiza wavukiye mu mujyi yamara kuba agakumi ibigabo byose bigatangira ngo ariko uriya mukobwa ngomba kumugiraho uruhare, yamwihorera ngo uriya mukobwa arasuzugura […].

Kujya imbere kwacu byababereye ikibazo, kuba tutavuza induru byababereye ikibazo, twabaye ikibazo kuko tudafite ibibazo byinshi, dufite ibyacu ariko batwitirira ibyabo. Biterwa n’ishyari.

Mu myaka ishize, uretse kuba Antoine Rutayisire yaramenyekanye nk’umupasiteri, yanatanze inyigisho nyinshi zirebana n’imiyoborere ndetse n’ubumwe n’ubwuyinge.

[email protected]

Pasiteri Rutayisire asanga inyigisho z'amadini zikwiye guhuzwa n'ubuzima bw'abaturage

Amafoto & Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza