Umukambwe Ndagijimana Godfroid yatabarutse ku myaka 113 y’amavuko

Yanditswe na

Rene Anthere Rwanyange

Kuya 1 Kanama 2013 saa 08:43
Yasuwe :
0 0

Gukunda Imana n’abantu, kunena ikibi, kwirinda ishyari n’umushiha no kutiganda ku murimo ni umurage Umukambwe Ndagijimana Godfroid yatabarutse asigiye abamukomokaho. Ibi byagarutsweho ubwo uwo mukambwe yashyingurwaga ku wa 28 Nyakanga 2013, utabarutse akwije imyaka 113 y’amavuko, kandi akaba yari agifasha abaturage cyane cyane mu gukemura ibibazo by’imbonezamubano. Byageze aho abo bari baturanye bamubyiniriye izina ry’Umuvunyi.
Mu ijoro ryo ku wa kabiri tariki ya 22 Nyakanga 2013, Umukambwe (...)

Gukunda Imana n’abantu, kunena ikibi, kwirinda ishyari n’umushiha no kutiganda ku murimo ni umurage Umukambwe Ndagijimana Godfroid yatabarutse asigiye abamukomokaho. Ibi byagarutsweho ubwo uwo mukambwe yashyingurwaga ku wa 28 Nyakanga 2013, utabarutse akwije imyaka 113 y’amavuko, kandi akaba yari agifasha abaturage cyane cyane mu gukemura ibibazo by’imbonezamubano. Byageze aho abo bari baturanye bamubyiniriye izina ry’Umuvunyi.

Mu ijoro ryo ku wa kabiri tariki ya 22 Nyakanga 2013, Umukambwe Ndagijimana Godfroid yaratabarutse, ashyingurwa ku Cyumweru tariki ya 28 Nyakanga. Uyu mukambwe atabarutse afite imyaka 113. Yari yarabyaye abana icumi, hasigaye 4, abakobwa batatu n’umuhungu umwe. Abuzukuru bari 42, ariko 22 na bo bishwe muri Jenoside yakorewe Abatutsi, hasigaye 20. Mu buzukuru be uzwi cyane ni Kizito Mihigo. Asize abuzukuruza 20.

Umukambwe Ndagijimana yaranzwe n’ubutwari bukomeye, aho yari agikora ibikorwa byo kwongera kubaka u Rwanda nyuma ya Jenoside yakorewe Abatutsi. Mu mezi atatau ashize yahawe inka n’ubuyobozi bw’Akarere ka Kicukiro nk’ikimenyetso cy’ishimwe ry’ubwitange.

Ndagijimana Godefroid yabaye inyangamugayo y’inkiko Gacaca mu karere ka Kicukiro aho yari atuye. Abaturage bari bamuzi ku izina ry’Umuvunyi, kubera uruhare rutagereranywa yagiraga mu bikorwa byo kubanisha abaturanyi.

Ndagijimana yavukiye mu karere ka Nyaruguru mu mwaka wa 1900. Yabaye umwarimu kuva mu 1929 kugeza mu 1959, muri uwo mwaka yaje guhungira mu gihugu cya Congo Kinshasa nyuma yo guhigwa na Leta yariho icyo gihe. Yaje gutahuka mu Rwanda mu 1994.

Mu magambo yavuzwe mu gikorwa cyo kumushyingura, benshi bagarutse ku mibereho y’uyu musaza bemeza ko itari isanzwe, ko yaranzwe n’ubunyangamugayo buhebuje. Abana n’Abuzukuru be basangije abari aho zimwe mu mpanuro Ndagijimana Godefroid abasigiye, zirimo ibanga ryo kubaho neza no kuramba rizingiye mu ngingo enye arizo Gukunda Imana n’abantu, kunena ikibi, kwirinda ishyari n’umushiha no kutiganda ku murimo.

Umuyobozi w’Akarere ka Kicukiro Paul Jules Ndamage, yagarutse ku butwari bwaranze ubuzima bw’uyu mukambwe, avuga ko ubwo abandi basaba ikiruhuko cy’izabukuru, Ndagijimana we yahoraga yiteguye kugira umusanzu atanga, dore ko abaturage na bo babaga bamufitiye icyizere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .