“Nta myaka ibaho kugira ngo umuntu abe yakorera igihugu cye”

Yanditswe na

Rene Anthere Rwanyange

Kuya 20 Kanama 2013 saa 06:24
Yasuwe :
0 0

Si abantu bakuru bonyine cyangwa se urubyiruko gusa bashobora kubaka igihugu. Kugira ngo iterambere rigerweho hagomba ubufatanye bwa bose, hakabaho guhuza imbaraga n’ibitekerezo, abantu bagafatanya guhuza ibikorwa bizamura igihugu n’abagituye ntawe usigaye inyuma. Ntawakwihanukira ngo avuge ko hari imyaka runaka igenwe kugira ngo umuntu abe yakorera igihugu cye.
Aya magambo ni asubirwamo na Kanangire Ngabo Christian, umusore muto cyane w’imyaka 24 y’amavuko. Amashuri abanza yayigiye mu ishuri (...)

Si abantu bakuru bonyine cyangwa se urubyiruko gusa bashobora kubaka igihugu. Kugira ngo iterambere rigerweho hagomba ubufatanye bwa bose, hakabaho guhuza imbaraga n’ibitekerezo, abantu bagafatanya guhuza ibikorwa bizamura igihugu n’abagituye ntawe usigaye inyuma. Ntawakwihanukira ngo avuge ko hari imyaka runaka igenwe kugira ngo umuntu abe yakorera igihugu cye.

Aya magambo ni asubirwamo na Kanangire Ngabo Christian, umusore muto cyane w’imyaka 24 y’amavuko. Amashuri abanza yayigiye mu ishuri rya Pigeonnier i Butare, ayisumbuye icyiciro cya mbere acyigira muri GSO Butare, akomereza muri IFAK ku Kimihurura i Kigali, aho yakurikiye amasomo y’Ubumenyi bw’Ibinyabuzima n’Ubutabire. Amashuri makuru yayize muri Kenya aho yakurikiye ibijyanye na Politiki, amaze umwaka umwe n’igice agarutse mu Rwanda, arikorera.

Uyu musore ukiri muto cyane, iyo muganiriye ntumubonamo iyo myaka. Aratuje kandi ibitekerezo bye bigaragaza ko akuze n’ubwo itoto ry’umubiri we rikwereka imyaka mike ku yo we yivugira. Ntasetswa n’ubusa, ariko indoro ye iroroshye. Aberewe cyane n’uko yambaye, bihita biguha isura y’uko na we ubwe yiyumvamo umuyobozi ugomba kwiha icyubahiro. Amagambo avuga arabaze, kuko arasa ku cyo muganiraho gusa, kandi ntahuzagurika mu bitekerezo.

Iyo umubajije, kugusubiza abanza gutekereza gato ariko abanje kukwitegereza mu maso. Ntashobora kureba hasi cyangwa hirya no hino, kandi ntiyagutumbira. Ibitekerezo bye abitondeka akurikije uko umubajije, yirinda cyane ko ushobora kumutanisha.

Mu kiganiro n’umunyamakuru wa IGIHE aho yamubajije impamvu yize amasomo ajyanye n’ubumenyi (Ibinyabuzima n’ubutabire), ntabe ari byo akomeza kandi urubyiruko rushishikarizwa kwiga amasomo y’ubumenyi n’ikoranabuhanga, ahubwo we agahitamo politiki; Kanangire yasubije atuje cyane, ati “Numvaga kwiga amasomo ya Politiki ari byo byanyura; numvaga kuva kera mbifitemo impano, kuko mbona ari n’uburyo bwiza bwo kuyobora abantu kugira ngo babashe kugera ku iterambere.”

Kanangire akomeza avuga ko kuva yajya mu ishuri, igihe kinini yagiye yisanga mu buyobozi bw’abanyeshuri. Ibyo ngo byatumye ageze mu mashuri yisumbuye ari umwana muto ugeze mu mwaka wa kabiri, yatorewe kuyobora Club Rugali yo muri GSO Butare, amahirwe atarabonwaga n’umunyeshuri utaragera mu cyiciro cya kabiri. Ati “Kuva ntorewe kuyobora iyo Club, nabonye ko bagenzi banjye n’ubundi bambonamo ubushobozi. Nanjye ubwanjye nabishyizemo ubushake ndetse bigera n’aho ubuyobozi bw’ikigo bunshima imbere y’abandi banyeshuri. Icyo kintu mu buzima bwanjye sinzakibagirwa.”

Arangije icyiciro rusange nk’uko abyivugira, ntiyatereye iyo, kuko yageze muri IFAK agahita ahatangiza ya Club Rugali, anatangiza indi nyuma yaje gukomera ubu ikaba ari na yo itegura urugendo rugamije kwibuka “Walk to remember”. Avuga ko icyizere imbere ya bagenzi be cyakomeje kuko ageze mu mwaka wa gatanu, yatorewe kuba umuyobozi w’abanyeshuri mu kigo yigagamo. Ati “Ubwo natangiye guhinduka, niyumvamo politiki cyane, ndetse ntangira no kujya nsoma ibitabo byanditswe n’abanyapolitiki, gukurikirana amakuru, ibyo bituma numva ngomba kwiga politiki uko byagenda kose.”

Mu banyapolitiki, Kanangire avuga ko Perezida Kagame amubera urugero rusumba izindi. Ati “Iyo ntekereje ingabo zabohoje u Rwanda, nkareba amateka yabo ko bacyitangiye ari bato nanjye ubwanjye bintera ishema. Untera ishema kurusha abandi ni Perezida Kagame. Iyo urebye igihugu cyacu uko cyihuta mu iterambere n’amateka mabi cyanyuzemo, usanga ari umuyobozi w’igitangaza.”

Mu masomo yize Kanangire avuga ko iryamunyuze cyane ari iry’amateka y’u Rwanda, na ho mu mirimo yakoze uwamushimishije ni ukuba umuyobozi wa Rugali ari umwana muto cyane, n’igihe nabaye Umuyobozi w’abanyeshuri muri IFAK. Ati “Icyo gihe muri IFAK twashyizeho ikigega cy’ubufatanye gifasha abanyeshuri batishoboye, kandi byatanze umusaruro mwiza cyane ndetse birushaho guhuza abanyeshuri no kwiyumvamo kwishakamo ibisubizo.”

Muri Kaminuza Kanangire Ngabo Christian avuga ko yashimishijwe n’isomo rijyanye no kutagira undi ushamikiraho n’iterambere ry’ibihugu. We asanga iryo somo ryigisha abantu kwigira bakareka kugengwa n’abandi, cyane cyane mu bukungu.

Asanga urubyiruko rw’u Rwanda umwanya rufite muri politiki rudakwiye kuwupfusha ubusa. Asanga ayo mahirwe bakwiye kuyakoresha batekereza ku gihugu cyabo, baharanira kugira ishema ryo kwitwa Abanyarwanda, kandi ibiganiro byabo bikagusha ku miyoborere myiza y’igihugu, bitabira cyane ibiganiro bya Politiki kandi batangamo ibitekerezo.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .