Umunyarwanda yatorewe kuyobora Ihuriro ry’Urubyiruko Nyafurika rigamije guteza imbere ubworozi

Yanditswe na IGIHE
Kuya 27 Nyakanga 2018 saa 04:05
Yasuwe :
1 0

Umunyarwanda witwa Hategekimana Jean Baptiste yatorewe kuyobora Ihuriro ry’urubyiruko Nyafurika rigamije guteza imbere ubworozi, mu nama yabereye i Cairo mu Misiri.

Uyu musore usanzwe uyobora Ihuriro ry’Urubyiruko rukora ubuhinzi bugamije ubucuruzi (RYAF), yatangaje ko gutorerwa uyu mwanya byahuriranye no kuba yari yitabiriye inama nyafurika ya bagenzi be bahuriye muri uru rwego.

Amatora yaganishije Hategekimana ku buyobozi bw’iri huriro, yitabiriwe n’urubyiruko 77 rwari rwitabiriye Inama y’Ishami ry’Umuryango wa Afurika yunze Ubumwe rishinzwe guteza imbere ibikomoka ku bworozi.

Yari yatumiwemo ibihugu byose 54 bigize uyu muryango gusa 41 ni byo byabashije kwitabira.

Mu kiganiro yagiranye na IGIHE, Hategekimana yasobanuye ko inshingano z’ingenzi we na bagenzi be bahawe ari uguhuza urubyiruko kugira ngo ubworozi bube isoko y’umurimo unoze n’isoko y’ubucuruzi.

Ati “Ikibazo tugendereye ni ukubura akazi mu rubyiruko no kutabona ibiryo bihagije. Niba amahirwe atandukanye ari mu bworozi, uretse aborozi; urubyiruko rwinshi hari ubumenyi rufite bujyanye no guhanga udushya hagamijwe gufasha abari muri uru rwego ngo batere imbere. Muri uru rwego buri wese azaba yabonye akazi keza. Umusaruro twiteze ni uko urubyiruko ruzagira uruhare mu kurandura imirire mibi n’ibindi. Hari akazi kazaba kabonetse uhereye ku muntu uhinga kugera ku ufite inganda.”

Hategekimana yakomeje avuga kuva mu Rwanda hajyaho ihuriro ry’urubyiruko ruhuriye mu buhinzi, hari byinshi rumaze gukora bijyanye no kuruvuganira, guhanga imirimo ari nacyo cyitezwe no mu bindi bihugu bya Afurika.

Ati “Iyo sura n’ibindi bihugu birayibona bikumva ko twabafasha tukazana uko twabikoze mu myaka ibiri ishize dutangiye tugafatanya n’abandi.”

Mu bandi batowe mu buyobozi bw’iri huriro, usibye Hategekimana uriyobora ukomoka mu Rwanda; yungirijwe n’Umunya-Cameroon, umunya-Afurika y’Epfo, Umunya-Malawi n’Umunya-Mali.

Intego ni uko muri buri gihugu hashyirwa ihuriro rikora ibijyanye n’ubuhinzi n’ubworozi ku buryo amahirwe ahari arusaranganywa narwo rufite umurongo uhamye rugenderaho.

Impuguke zigaragaza ko kuba impuzandengo y’abakora ubuhinzi mu Rwanda iri ku myaka 55, biteye impungenge kuko umusaruro wabwo ushobora kugabanuka mu gihe cyose urubyiruko rutakwitabira kujya muri uru rwego rufatiye runini ubukungu bw’igihugu.

Ubuhinzi bwari bwihariye 31% ku musaruro mbumbe w’igihugu (GDP) mu 2017, bukurikira urwego rwa Serivisi rwihariye 46%.

Hategekimana Jean Baptiste watorewe kuyobora Ihuriro ry’urubyiruko Nyafurika rigamije guteza imbere ubworozi ari kumwe na Ambasaderi w’u Rwanda mu Misiri, Sheikh Habimana Saleh
Urubyiruko rwo mu Rwanda rwitabiriye iyi nama, rwasuye Ambasade y'u Rwanda mu Misiri
Ambasaderi w'u Rwanda mu Misiri n'abakozi ba Ambasade mu ifoto y'urwibutso hamwe n'urubyiruko rwo mu Rwanda rwitabiriye iyi nama nyafurika yiga ku ruhare rw'urubyiruko mu bworozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza