Miss utwara Akamoto! Ibitekerezo bya Kalimpinya ku busugi, agakingirizo, kujya mu gisirikare n’ibindi

Yanditswe na Muvunyi Arsène
Kuya 17 Ukuboza 2018 saa 10:27
Yasuwe :
0 0

Kalimpinya Queen ni umwe mu bakobwa bamenyekanye cyane mu irushanwa rya Nyampinga w’u Rwanda ubwo yegukanaga umwanya w’igisonga cya gatatu.

Izina rye ryakomeje kumvikana kenshi mu matwi y’abanyarwanda bitewe n’ibikorwa bijyanye n’umushinga we yashyizemo imbaraga nyinshi ujyanye no kwigisha abato ubuzima bw’imyororokere.

Yashinze umuryango witwa Bambe ariwo akoreramo ubukangurambaga bwose ku bijyanye n’ubuzima bw’imyororokere mu bigo by’amashuri mu turere dutandukanye tw’u Rwanda.

Mu bakobwa bahataniye ikamba rya Nyampinga w’u Rwanda 2018 ni umwe mu bari bafite igikundiro, ndetse hari bamwe bamwe bababajwe n’uko atari we wegukanye ikamba.

Mu mibereho isanzwe, ni umuntu wicisha bugufi binagaragarira mu byemezo bimwe na bimwe afata. Asigaye agenda ku ka moto gato kazwi nka scooter, ni icyemezo yafashe nyuma yo kubona ko nta bushobozi afite bwo kugura imodoka kandi akeneye uburyo bumufasha mu ngendo ze.

IGIHE yaramwegereye, tuganira ku buzima bwe bwite no ku bijyanye n’ubuzima bw’imyirorokere nka bimwe mu byo yimirije imbere mu mishanga ye.

Kalimpinya Queen ni umwe mu bakobwa bahabwaga amahirwe yo kwegukana ikamba rya Nyampinga w'u Rwanda

Ikiganiro kirambuye

IGIHE: Nyuma y’aho uviriye muri Miss Rwanda uhugiye mu biki?

Kalimpinya: Ibyo mpugiyemo ni ishuri, imishinga yanjye n’akazi gasanzwe. Njye n’urubyiruko bagenzi banjye, dufite umuryango witwa Bambe Foundation, ufite intego yo kongerera uburyo bwo kubaho abana n’abagore bababaye kurusha abandi.

Nk’igikorwa duherutse gukora mu minsi ishize twafashe abana biga mu mashuri yisumbuye tubajyana gusura Isange One Stop Center, kugira ngo basobanurirwe serivisi zihatangirwa, bamenye uko bakwitwara baramutse bahuye n’ihohoterwa iryo ari ryo ryose.

IGIHE: byo kwigisha ubuzima bw’imyororokere mubikora mute?

Kalimpinya: Muri uwo muryango twita ku bintu byinshi bitandukanye, ariko cyane cyane twibanda ku bana b’abakobwa bari mu mashuri yisumbuye. Niho dushinga amatsinda, aho adahari, tukigisha ku buzima bw’imyororokere n’indangagaciro ziranga umunyarwanda muri rusange.

IGIHE: Irushanwa rya Miss Rwanda ryakumariye iki?

Kalimpinya: Irushanwa ryamiriye ibintu byinshi cyane. Ngerageje kuvuga muri rusange ryarantinyuye, nk’umwana w’umukobwa wari urangije amashuri yisumbuye, ntabwo nari nzi ko nshobora gufatanya na bagenzi banjye tugakora ibintu mu myaka ishize tumaze gukora. Ryanyeretse ko ibintu byinshi bishoboka.

IGIHE: Tubwire icyo ryagufashije mu buryo bufatika.

Kalimpinya: Iyo uvuye muri Miss Rwanda, ni nk’aho baba bakwerekanye, rero hari imishinga imwe n’imwe, ugenda ukora, hari abikorera bagenda bakwegera mugakorana ku bintu bimwe na bimwe bikagufasha.

IGIHE: Ujya utekereza kwitabira andi marushanwa y’ubwiza?

Kalimpinya: Yego! Irushanwa mpuzamahanga nta kibazo nshobora kurijyamo, ariko bitewe n’uburyo ndibonye. Hari amarushanwa ngiyemo naba nibeshye cyangwa mbeshye. Tuvuge nka Miss Earth kuko baba bashaka nyampinga w’ubwiza ariko ufite imishinga y’ibidukikije. Rero mu ntego yanjye nyamukuru ibidukikije yego ni byiza ariko ntibirimo. Naba ngiye gupfundikanya ibintu.

Uyu mukobwa ari gushyira mu bikorwa umushinga we wo gufasha urubyiruko gusobanukirwa ibijyanye n'ubuzima bw'imyororokere

IGIHE: Irushanwa basaba kwambara bikini warijyamo?

Kalimpinga: Nareka kujyayo. Njyewe ku giti cyanjye ntabwo nakwambara bikini ngo njye imbere y’abantu.

IGIHE: Wabonye ute ibikorwa bya Nyampinga w’u Rwanda wa 2018?

Kalimpinya: Ibyo nagerageje kubona, nabonye uko imyaka ihita niko Miss Rwanda igenda izamura ubushobozi. Mbere ku bwacu no ku bwa Liliane. Nkunda uburyo bunze ubumwe cyane, niba ari Elsa urabona yafashije Liliane, ukabona Jolly bari kumwe, ukabona mbese basenyera umugozi umwe.

IGIHE: Ubona ikibazo cy’inda zitateganyijwe mu bangavu giterwa n’iki?
Kalimpinya: Icya mbere mbona ari imyumvire. Rero abakobwa bamwe na bamwe dufite ukuntu twishyizemo ko icyerecyezo cyacu ari umugabo.

Nziga amashuri yisumbuye arangire, kaminuza ubundi nshaka umugabo w’umukire. Rero iyo ugeze nko mu gatatu mu mashuri yisumbuye, ukabona umuntu uguha ibyo ukeneye uhita uvuga uti ‘nahabonye niho hanjye.’

Ikindi ni ikoranabuhanga. Tureba filime, indirimbo, tureba ibindi abantu bakora natwe tugashaka kubigana. Tugashaka kubikora kandi tudafite gahunda zimwe. Ikindi ukwigisha ubuzima bw’imyororokere. Mama wanjye ntabwo yanyicaza ngo ambwire, ngo urabona, uzabigenze gutya, bigenda gutya, hari ibintu tutaganirizwa.

IGIHE: Politiki yo guha urubyiruko serivisi zo kuboneza urubyaro uyumva ute?

Kalimpinya: Ntekereza ko hakiri igaruriro tutari abo gutabwa, ngo umwana aboneze urubyaro atarageza n’igihe cyo kubyara. Mbere yo kugira ngo umuhe ibyo akoresha habanza kwigishwa. Mu gihe bigishijwe ibyo ntabwo bizaba ari ngombwa.

IGIHE: Gushyira udukingirizo mu bigo by’amashuri ubona hari icyo byafasha?

Kalimpinya: Gushyira udukingirizo mu bigo by’amashuri njye numva atari byo, kuko iyo umuntu agiye ku ishuri sinzi ikindi kintu aba agiye gukora kitari ukwiga. Ubwo uhashyize udukingirizo, waba uhahinduye ikindi kitari ishuri.

IGIHE: Wemeranya n’abavuga ko nta mukobwa w’isugi ukibaho?

Kalimpinya: Nta gipimo mfite ngo mvuge ngo ndabara abakobwa b’isugi bakiriho ni aba, cyangwa bashizeho. Ariko njye uko mbitekereza n’abo tuganira ntekereza ko bakiriho.

IGIHE: Kuri wowe ubusugi bufite akahe gaciro?

Kalimpinya: Ubusugi kuri njye ni ikintu cy’agaciro cyane. Mu myemerere yanjye no mu myumvire yanjye, numvaga ko umugore uwo ari we wese, agomba kuba uw’umugabo umwe. Ni ukuvuga ugomba gushakana n’umugabo wawe uri isugi, ukaba uwe mbese ugomba kumenyana n’umuntu umwe.

IGIHE: Ufite umukunzi?

Kalimpinya: Nta mukunzi mfite?

IGIHE: Uteganya kumugira ryari?

Kalimpinya: Ntekereza ko ari ibintu byizana, ntabwo ari ibintu umuntu apangira ngo nzakundana iki gihe, nzakunda uyu, ni ibintu byizana.

IGIHE: Umugabo w’inzozi zawe ni umeze ute?
Kalimpinya: Ntababeshye ntabwo ndafata igihe ngo mutekereze, mushushanye ariko hari ibya ngombwa. Kuba yitwara neza, kuba ari umuntu ufite indangagaciro za Kinyarwanda.

IGIHE: Wumva ushaka kuzaba umugore umeze ute?

Kalimpinya: Numva nifuza kuba umutegarugori ubereye u Rwanda, ufite uruhare runini agira mu kuzamura urubyiruko, abana n’abagore b’abanyarwanda. Ubwo uruhare mvuga ntibivuze ko ngomba kuba nkora muri leta.

Mu gihe yari mu irushanwa rya Miss Rwanda, hadutse inyogosho yitwa Kalimpinya

IGIHE: Ubukwe buciriritse cyangwa gusanga uwo mwakundanye mukibanira nta bukwe, wahitamo iki?

Kalimpinya: Njyewe nubaha umuco wacu. Mu muco wacu rero ibirori bibanzira ko ujya mu rugo biri mu by’ingenzi cyane.

Icyangombwa si amafaranga, icyangombwa ni uko ibyo birori byabaye. Uko bingana kose, bipfa kuba ababyeyi ku mpande zombi babyemeye n’iyo mihango ikaba. N’iyo byabera muri butiki y’irindazi ry’ijana nta kibazo.

IGIHE: Uracyafite gahunda yo kuba umusirikare?

Kalimpinya: Icyo gitekerezo narakigize nanagikomeyeho cyane, ariko haracyari igihe biracyashoboka, ni ahanjye ho guhitamo.

IGIHE: Twabonye uza kuri moto, watekereje ute kuyigura?

Kalimpinya: Igitekerezo cyo kugura akamoto, natekerezaga uburyo nshobora kugabanya amafaranga nkoresha. Narebye uburyo mfite, nsanga sinagura imodoka, ndeba ikintu cyanyorohera kandi kikangabanyiriza amafaranga nkoresha.

IGIHE: Ukagendaho ugiye he?

Kalimpinya: Ahantu hose ndagenda kereka mu ntara nk’i Gisenyi, ariko ku ishuri, ku kazi, no mu bikorwa byinshi mba ndimo, iby’imishinga nk’iyo ngiye kuganiriza abana ku kigo runaka.

IGIHE: Ntiwigeze utekereza ko abantu bazaguseka nk’ibyabaye kuri Anastasie?

Kalimpinya: Njye nagendaga no muri bus bisanzwe, uburyo bwose bukoreshwa mu Rwanda ndabukoresha. Iby’uko Anastasie yagiye kuri moto, nanjye ni uko nagize Imana bakanzana nari kuyizaho cyangwa ngatega bus. Ibyo nibaza ko atari ibintu umuntu yagakwiye gutindaho cyane.

IGIHE: Iyo uri mu muhanda urimo ibinyabiziga byinshi nta bwoba uba ufite?

Kalimpinya: Erega impamvu nkita akamoto ni uko nyine ari akamoto! Ni nko gutwara igare ariko rifite moteri, rero nta bwoba ugera aho ukamenyera. Ariko mu minsi ya mbere nagiraga ubwoba nkumva imodoka inyuma nkavuga nti ndapfuye.

IGIHE: Ntikarakugusha?

Kalimpinya: Karangushije mu minsi ya mbere! Mu cyumweru cya mbere nari ndi kukimenyereza ndangije ndakata cyane gahita kankubita hasi, ariko ntabwo byari bikabije.

Nyuma yo kubona ko akoresha amafaranga menshi mu ngendo, Kalimpinya yahisemo kugura moto imufasha mu bikorwa bye byose
Iyo aparitse akamoto ke casque arayitwara
Yashiritse ubwoba yiyemeza kujya mu muhanda yitwaye kuri scooter
Abazi neza uyu mukobwa, bashima imyitwarire ye n'ibitekerezo agira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza