00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yafunguye icyumba cyamwitiriwe mu kigo kivura kanseri mu Bufaransa

Yanditswe na Ferdinand Maniraguha
Kuya 19 Gicurasi 2021 saa 07:08
Yasuwe :
0 0

Perezida Paul Kagame yafunguye ku mugaragaro icyumba cyamwitiriwe kiri mu Kigo cy’Ubushakashatsi ku ndwara ya kanseri (IRCAD) giherereye mu Mujyi wa Strasbourg, mu Majyaruguru ashyira Uburasirazuba bw’u Bufaransa.

Icyo cyumba cyafunguwe kuri uyu wa Gatatu, tariki ya 19 Gicurasi 2021. Perezida Kagame wagifunguye amaze iminsi mu Bufaransa aho yitabiriye inama zitandukanye zirimo iyigaga ku kuzahura ubukungu bw’Umugabane wa Afurika bwahungabanyijwe na Covid-19.

IRCAD ni Ikigo cy’Abafaransa kizobereye mu kubaga no kuvura kanseri hifashishijwe ikoranabuhanga, aho kiri mu bya mbere ku Isi mu kugira ubuhanga bwo kuvura izo ndwara. Cyashinzwe na Prof Jacques Marescaux mu 1994.

IRCAD yibanda cyane ku buvuzi bwa kanseri zifata urwungano ngogozi ziri mu zibasiye benshi ku Isi. Ishami ry’Umuryango w’Abibumbye ryita ku Buzima (OMS) rigaragaza ko mu bantu bagera kuri miliyoni 10 bishwe na kanseri mu mwaka wa 2020, kanseri y’urura runini (colon and rectum) yahitanye abantu miliyoni 1.93 mu gihe kanseri y’igifu yahitanye 1.09. Izi kanseri ziza muri esheshatu zihitana abantu benshi ku Isi.

Iki kigo IRCAD kiri kubaka Ishami ryacyo mu Rwanda, ari naryo rya mbere ku Mugabane wa Afurika. Icyicaro Gikuru cyacyo kizaba kiri i Masaka mu Mujyi wa Kigali. Imirimo yo kucyubaka yaratangiye ndetse kizatahwa uyu mwaka.

Nikimara gutangira imirimo cyitezweho kuzaziba icyuho kigaragara ku Mugabane wa Afurika mu buvuzi bwa kanseri, yaba mu rwego rw’ubushakashatsi ndetse no mu rwego rwo guhugura abahanga mu kuvura kanseri.

IRCAD Africa Center yitezweho gufasha mu guhangana n’iki kibazo binyuze mu bushakashatsi ndetse n’amahugurwa ari ku rwego rwo hejuru azatangira gutangirwa mu Rwanda muri uyu mwaka.

Iki kigo kandi cyatangiye gukorana n’Abanyarwanda mu bushakashatsi mu by’ubuvuzi mu bya kanseri binyuze mu ikoranabuhanga, aho batoranywa muri Kaminuza y’u Rwanda, Carnegie Mellon University Africa (CMU-Africa) ndetse na African Institute for Mathematical Sciences (AIMS).

Magingo aya, IRCAD Africa iri gushakisha no gukorana n’abandi bahanga mu ikorabuhanga ry’ubwenge bw’ubukorano (Artificial Intelligence) kugira ngo hahangwe udushya mu by’ikoranabuhanga dushobora kwifashishwa mu buvuzi bwa kanseri.

Ubwo Perezida Kagame yatahaga icyumba cyamwitiriwe muri IRCAD iherereye i Strasbourg
IRCAD izwiho gukora ubushakashatsi bwimbitse ku ndwara za kanseri ziganjemo izo mu nda
Prof Jacques Marescaux washinze IRCAD
Igishushanyo mbonera cy'Ishami rya IRCAD riri kubakwa i Masaka muri Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .