Umusaruro w’icyanya cy’inganda i Kigali wazamutseho 554% mu mwaka umwe

Yanditswe na Rabbi Malo Umucunguzi
Kuya 19 Nyakanga 2018 saa 09:07
Yasuwe :
0 0

Guverinoma y’u Rwanda yatangaje ibigo bifite icyicaro mu cyanya cyahariwe inganda mu Mujyi wa Kigali ahazwi nka ‘Kigali Special Economic Zone’, byohereje mu mahanga ibicuruzwa bifite agaciro ka miliyoni $43.6 mu mwaka ushize wa 2017 bivuye kuri miliyoni $5.5 mu 2016, bingana n’izamuka rya 554%.

Iyi mibare yatangajwe kuri uyu wa Kane mu gihe Perezida Filipe Jacinto Nyusi wa Mozambique uri mu ruzinduko rw’iminsi itanu mu Rwanda yasuraga iki gice, aho uyu mugabo w’imyaka 59 yasuye inganda zirimo Africa Improved Food n’uruganda rwa C&H Garments Rwanda Ltd rukora imyambaro itandukanye.

Mu butumwa Guverinoma y’u Rwanda yashyize ahagaragara binyuze kuri Twitter, yagaragaje ko nk’uru ruganda rwa C&H Garments Ltd rufite ishoramari rya miliyoni $6, mu myaka itatu ishize rwohereje mu mahanga ibicuruzwa bifite agaciro ka miliyoni $6.2, rukaba rufite abakozi bagera ku 1500.

Africa Improved Foods ikora ibiribwa by’abana n’abakuru birimo ifu ya Nootri na Shisha Kibondo. Uru ruganda rwatangiye kubakwa muri Nyakanga 2015 ariko rutangira imirimo muri Mutarama 2017, rufite ishoramari rya miliyoni $60, mu mwaka ushize rukaba rwarohereje mu mahanga ibifite agaciro ka miliyoni $25.

Yakomeje igira iti “Ibigo biherereye mu Cyanya cyahariwe inganda cya Kigali byohereje mu mahanga ibicuruzwa bifite agaciro ka miliyoni $43.6 mu 2017, bivuye kuri miliyoni $5.5 mu 2016 (izamuka rya 554%).”

Iki cyanya cy’inganda cya Kigali kirimo ibikorwa birimo inganda n’ububiko bw’ibicuruzwa, kigizwe n’ibibanza 157 kuri hegitari 276 z’ubutaka. Ubu kirimo ibigo 69 biri gukora na 22 bikiri kubakwa.

Igitekerezo cyo gushyiraho iki gice cyavutse mu 2006 gitangira gushyirwa mu bikorwa 2008, hagamijwe gushyiraho ahantu hagenewe inganda zikora ibintu biciriritse n’inganda nini, ububiko bw’ibicuruzwa, inganda z’imiti, inzego za serivisi, ikoranabuhanga n’ibindi.

Cyatumye hongerwa ishoramari ry’abanyamahanga mu gihugu, hongerwa ibyo u Rwanda rwohereza mu mahanga, biteza imbere urwego rw’inganda mu gihugu ndetse bifasha mu guhererekanya ubumenyi n’abakozi b’abanyamahanga.

Kubaka iki cyanya cyahariwe inganda cya Kigali bimaze guhanga imirimo 7000 ihoraho n’indi mirimo 13000 y’igihe gito, yiganjemo iy’ubwubatsi.

Kubaka iki gice byanoroheje uburyo abashoramari bafashwa mu bikorwa byabo haba mu bijyanye n’ibiciro by’ingufu, ibibanza byo gukoreraho, uburyo bw’ingendo, guhura n’amasoko, kuzamura ubumenyi n’ibindi.

Iki cyanya cyagenewe inganda cyorohereje abashaka gushora imari yabo mu gihugu
Inganda zashishikarijwe kubyaza umusaruro amasaha abantu benshi badakoresha amashanyarazi
Iki gice cy'inganda cyongereye ibicuruzwa u Rwanda rwohereza mu mahanga
Kubaka iki cyanya cyahariwe inganda cya Kigali bimaze guhanga imirimo 7000 ihoraho n’indi 13000 y’igihe gito

Amafoto: Mazimpaka Jean Pierre


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza