Pariki y’Akagera yafunguye icumbi rizajya ryakira ba mukerarugendo bayigana. Iri cumbi ryafunguwe rifite izina rya Ruzizi Tender Lodge ryubakishije amahema ku nkombe z’ikiyaga cy’Ihema.

Iri cumbi ryubatswe ku bufatanye bwa Walton Family Faundation na Akagera Management Campany (AMC) watangiye kubakwa mu kwezi kwa Mutarama 2012.

Jes Gruner Umuyobozi wa AMC wagize uruhare mu kubaka iri cumbi yatangaje ko ari uburyo bwiza bwo kwakira ba mukerarugendo baza bagana Pariki y’Akagera. Agira ati “Ruzizi Tender Lodge ni ubwiza nyaburanga bwa Parike y’Akagera.”

Rob Walton Umuyobozi mukuru wa Walton Family Foundation yavuze ko Pariki y’Akagera ari ubukungu bukomeye bw’u Rwanda. Ati “Icumbi ryatashywe muri iyi Pariki rizongera ba Mukerarugendo bayigana, kubera ko babonye uburyo bwiza bwo gucumbika.”

Walton yakomeje avuga ko yiteguye gukomeza gukora ibikorwa byo guteza imbere Pariki y’Akagera, hashyirwamo ibikorwa bifasha abayigana n’abayituriye.

Umuyobozi ushinzwe ubukerarugendo no kubungabunga amapariki mu kigo cy’igihugu gishinzwe iterambere (RDB) Rica Rwigamba, yavuze ko gutaha iryo cumbi bifitiye akamaro Abanyarwanda kandi umubare w’abasura Pariki y’Akarera uziyongera.”

Parike y’Akagera ni imwe muri Pariki zo mu Rwanda isurwa n’abenegihugu benshi. Yashinzwe mu 1934, ifite abakozi bahoraho 130 na banyakabyizi basaga 200.